Faleʻi ha ʻAposetolo fekauʻaki mo e Mītia Fakasōsialé
Ne pehē ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi ha lea ʻi he Uike Ako ʻi he ʻUnivēsiri Pilikihami ʻIongí ʻi he ʻaho 19 ʻo ʻAokosi, 2014, “ʻOku ou naʻinaʻi atu ʻi he feituʻú ni he ʻahó ni ke mou ʻoatu ki māmani ha ngaahi pōpoaki fonu he māʻoniʻoní mo e moʻoní, ko e ngaahi pōpoaki ʻoku totonu, langaki moʻui, pea taau ke vīkivikiʻí, pea ko e moʻoni te ne fakafonu ʻa māmani ʻaki ha lōmakí.
Naʻá ne pehē ʻi ha pōpoaki naʻe fakatefito ʻi he mālohi ʻo e mītia fakasōsialé ke fetuʻutaki ʻa e moʻoní, “ʻOku ou lotua he ʻikai te tau kau ʻi ha tāfea taimi nounou ʻoku vave ʻene huʻa mai pea toe vave pē ʻene holó.” Naʻe ui ʻe ʻEletā Petinā hotau kuongá ko ha “faʻahitaʻu makehe ʻi he hisitōlia ʻo e māmaní,” ʻa ia ʻoku tāpuekina kitautolu ʻaki “ha mana fakaofo ʻo e ngaahi fakalakalaka ʻo e fakakaukaú mo e ngaahi faʻu foʻou kuo tokoni ki hono fakavaveʻi e ngāue ʻo e fakamoʻuí.
Naʻá ne pehē “ʻoku fakafuofua ko e peseti nai ʻe 40 ʻo ʻetau kau ngāue fakafaifekau fakaemāmani lahí te nau fakaʻaongaʻi ʻe nāunau fakaʻilekitulōniká ko ha ngaahi meʻangāue ʻi he ngāue ʻa e fakauluí, pukepuké mo e fakamālohiá,”. “ʻOku ou loto falala ʻoku tau ʻiloʻi kotoa ʻa e founga ʻoku hanga ai ʻe he tekinolosiá ʻo fakavaveʻi e ngāue hisitōlia fakafāmilí mo fakatemipalé, ʻetau ako fakafoʻituitui mo fakafāmili e ongoongolelei kuo toe fakafoki maí, pea lava ke tau ako, vakai, pea aʻusia ʻa e māmaní ʻi ha founga fakaofo.”
Naʻá ne talanoa ki he ngaahi ngāue fakasōsiale he mītiá kimuí ni ʻo kau ai ha vitiō ʻo e Toetuʻú naʻe faʻu ʻe he Siasí, Because of Him, ʻa ia naʻe mamataʻi tuʻo nima miliona nai ʻi ha ngaahi fonua mo e vahefonua ʻe 191, pea ko e hashtag #didyouthinktopray, ne iku ki ha ngaahi fepōtalanoaʻaki ʻe 40,000 tupu ʻo fekauʻaki mo e fie maʻu ke lotú.
Naʻá ne pehē ko e ngaahi meʻa ko ʻení fakataha mo e ngaahi ngāue kehé ko ha “konga siʻi siʻi pē ia”, ʻo ne kole ai ki he kāinglotú ke “tokoni ke liliu e konga siʻí ni ko ha meʻa lahi.” Naʻá ne toe pehē ko e taimi ʻoku fakaʻaongaʻi ai e mītia fakasōsialé:
-
“ʻOku ʻikai totonu ke tau fakalahiʻi, fakaleleiʻi, pe feinga ke tau hangē ha taha kehé, pe ʻikai ke tau fai hotau anga totonú. ʻOku totonu ke tau falalaʻanga pea fai ha fokotuʻu ʻoku ʻaongá.”
-
“ʻOku totonu ke feinga ʻetau pōpoakí ke fakamāmaʻi mo langaki hake, kae ʻikai fakafekiki, fakakikihi, fakahalaiaʻi, pe tukuhifo.”
-
“Loto-toʻa mo loto-lahi, kae ʻoua ʻe fakamālohi, ʻi hono poupouʻi mo maluʻi ʻetau tuí, pea fakaʻehiʻehi mei he fakakikihí. ʻI heʻetau hoko ko e kau ākongá, ko ʻetau taumuʻá ke fakaʻaongaʻi e mītia fakasōsialé ko ha founga ia ki hono vahevahe ʻa e maama mo e moʻoni ʻo e ongoongolelei ʻa Sīsū Kalaisi kuo toe fakafoki maí”
-
“ʻE lava ke mole noa ha taimi lahi, maumau pe fakaʻauha e ngaahi vā fetuʻutaki lahi pea motuhia e ngaahi sīpinga ʻo e māʻoniʻoní ʻi he taimi ʻoku ʻikai fakaʻaongaʻi totonu ai ʻa e tekinolosiá. ʻOku ʻikai totonu ke tau fakaʻatā ke puleʻi ʻe he ngaahi polokalama lelei ʻo e mītia fakasōsialé ke muʻomuʻa ia ʻi hono fakongaʻi lelei ange hotau taimí, iví, mo e ngaahi maʻuʻanga tokoní.”
-
“ʻOku ʻikai fie maʻu ia ke tau hoko ko ha kau mataotao pe fuʻu taukei ʻi he mītia fakasōsialé. Pea ʻoku ʻikai fie maʻu ia ke tau fakaʻaongaʻi ha fuʻu taimi lahi ki hono faʻu pea mo hono fakamafola ʻo e ngaahi pōpoakí.”