FAIAKO ʻI HE FOUNGA ʻA E FAKAMOʻUÍ
“Vakai ki Hoʻomou Fānau Īkí”: Ko e Ako ke Akoʻi e Fānaú
“Naʻá ne fua hake [ʻe Sīsū] ʻa ʻenau fānau īkí, taki taha, ʻo ne tāpuakiʻi ʻa kinautolu, mo hūfakiʻi ʻa kinautolu ki he Tamaí. … Pea folofola ia ki he kakaí ʻo pehē ange kiate kinautolu: Vakai ki hoʻomou fānau īkí” (3 Nīfai 17:21, 23).
Kapau ko ha mātuʻa koe pe kuo uiuiʻi koe ke ke akoʻi e fānaú, kuó ke maʻu ha meʻaʻofa maʻongoʻonga Kuo akoʻi mai ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “Ko [kimouolu] ʻa e niʻihi kuo fili ʻe he ʻOtuá ke takatakaiʻi ʻa e fānau ʻo e ʻaho ní ʻaki ʻa e ʻofa mo e māfana ʻo e tuí pea mo ha ʻiloʻi ko hai kinautolu.”1
ʻE ʻoatu kiate koe ʻe he fānaú ha fiefia pea ueʻi koe ke ke hoko ko ha faʻifaʻitakiʻanga lelei. ʻI hoʻo ʻiloʻi ʻa e faivelenga, ʻofa, falala mo e ʻamanaki lelei ʻa e fānaú, te ke ofi ange ai ki he ʻEikí pea mahino ange kiate koe ʻEne fekaú “ke tatau mo e tamaiki īkí” (Mātiu 18:3).
Ko ha ngaahi meʻa ʻeni ʻe valu ke ke manatuʻi fekauʻaki mo e fānaú ʻi hoʻo feinga ke ʻofa mo akoʻi kinautolu ʻi he founga ʻa e Fakamoʻuí.
1. ʻOku tui ʻa e fānaú. ʻOku nau tali ʻa e moʻoní. Akoʻi kinautolu ʻi he tokāteline totonú ʻi he founga faingofua mo mahino, ʻi he lea mo e sīpinga ʻe mahino kiate kinautolú.
2. ʻOku lava pē ke ʻiloʻi ʻe he fānaú ʻa e ivi takiekina ʻo e Laumālié. Akoʻi kiate kinautolu ʻoku haʻu mei he Laumālie Māʻoniʻoní ʻa e ongo ʻo e nongá, ʻofá, mo e fiefia ʻoku nau maʻu ʻi he taimi ʻoku nau talanoa pe hiva ai kau kia Sīsū Kalaisi mo ʻEne ongoongoleleí. Tokoni ke mahino kiate kinautolu ko e ngaahi ongo ko ʻení ko ha konga pē ia ʻo ha fakamoʻoni.
3. ʻOku mahino ki he fānaú ʻa e ngaahi fakakaukau totonú. ʻE lava ke puputuʻu e fānaú ʻi he ngaahi fakalea heliakí. ʻI he taimi te ke faiako aí, fakamatala ki ha ngaahi meʻa angamaheni ʻoku hoko mo ha ngaahi ʻekitivitī: ʻi ʻapí, fāmilí, mo e ʻātakai ʻoku nau ʻiaí.
4. ʻOku vēkeveke ʻa e fānaú ke ako. ʻOku nau fiefia ke ako ʻi he ngaahi aʻusia kehekehe mo e ongo (senses) kehekehe. ʻOku tautautefito ʻenau tokangá ʻi he taimi ʻoku fakaʻaongaʻi ai e ngaahi meʻa ʻoku tokoni ki he sió mo fakakau kinautolu ʻi he lēsoní. Tuku ke nau ʻalu holo, fekumi, pea feinga ke fakahoko ha ngaahi meʻa foʻou.
5. ʻOku vēkeveke ʻa e fānaú ke vahevahe mo tokoni. ʻOku nau lava ʻo feakoʻaki ʻiate kinautolu pea mo koe foki. Fakaafeʻi ke nau vahevahe ʻa e meʻa ʻoku nau akó. ʻOange ha ngaahi faingamālie ke nau lau ʻa e folofolá, pukepuke ʻa e ngaahi fakatātaá, tali e fehuʻí, pe tohi ʻi he palakipoé.
6. ʻOku angaʻofa ʻa e fānaú pea ʻoku nau fie maʻu ke ʻofaʻi kinautolu. Kumi ha ngaahi faingamālie ke fakamālohia ai e angalelei pea mo e angaʻofa ʻoku fakanatula pē ʻene hoko mai kiate kinautolú. Fakatupulaki ʻenau loto-falalá ʻaki haʻo fakahaaʻi ange hoʻo ʻofá, houngaʻiá mo e fakafanongo tokanga ki he meʻa ʻoku nau lea ʻakí.
7. ʻOku muimui ʻa e fānaú ki hoʻo tā sīpingá. ʻOkú ke hoko maʻu pē ko e faiako, ʻo aʻu pē ki he taimi ʻoku ʻikai te ke fakatokangaʻi aí. ʻE fakatokangaʻi ʻe he fānaú hoʻo moʻui ʻaki e ngaahi tefitoʻi moʻoni ʻokú ke akoʻí. ʻE lava hoʻo tā sīpinga angatonú ʻo takiekina mālohi ʻenau fakamoʻoni ʻoku lolotonga fakatupulakí.
8. ʻOku taimi nounou pē e tokanga ʻa e fānau ikí ki ha meʻá. Mahalo ʻe ʻuhinga e taʻetokanga ʻa e fānaú ʻoku nau ongosia pe fiekaia, pe ʻoku ʻikai ke mahino kiate kinautolu ha meʻa naʻá ke leʻa ʻakí, pe ʻoku fie maʻu ke nau ngaungaue, pe ʻoku nau taʻeoliʻia. ʻOku nau fiefia ke ako ʻo fou ʻi hono toutou fakahokó, ako ki he ngaahi meʻa kehekehe, ngaahi talanoa ʻoku faingofua, ngaahi hivá, mo e ʻū ʻekitivitií. Poupouʻi ke nau kau atu ʻi he ngaahi lēsoní.