ʻOfa ki he Niʻihi ʻoku Kehe Honau Tuʻunga ʻUlungāngá

ʻĪmisi

mother-with-daughters

Naʻe ohi hake hoku tokoua ʻi he fono ko Seiní (kuo liliu e hingoá) ʻi he ongoongoleleí pea naʻá ne hoko ko ha mēmipa mateaki ʻi he Siasí. Hili e movete mali temipale ne ngali fiefiá, naʻe kamata ke lauʻi ia ʻe ha niʻihi ʻi hono kiʻi koló mo nau fakamāuʻi ia. Naʻá ne fakamamaʻo mei he tokolahi hono ngaahi kaungāmeʻá pea fakaʻau pē ʻo ne mamaʻo mei he Siasí.

Naʻe kamata ke ne teiti mo ha talavou ko ʻEnitī, pea iku pē ʻo na nonofo fakamali. Naʻá ku hohaʻa pe ko e hā te u talaange ki heʻeku fānaú. Naʻe ʻofa ʻeku fānau fefine kei iiki ʻe toko tolú ʻi honau mehikitanga ko Sēiní. Naʻe ʻikai ngata pē ʻi he vāofi homau fāmilí, ka naʻá ne toe faiako tauʻolunga foki kiate kinautolu, ko ia naʻa nau toutou feʻiloaki ʻi he uike kotoa pē.

Naʻe lau māhina ʻenau pehē ʻoku fuʻu hokohoko e ʻeva ange ʻa ʻEnitií, ka naʻe faifai pea pau ke u talaange ʻoku nofo fakataha ʻa Seini mo ʻEnitī. Ne u fakamatala ange ko e fili naʻá na faí ko ha angahala mamafa ia. Naʻe hangē ne mahino pē kiate kinautolú, pea naʻa mau fealeaʻaki lelei ai kau ki he mahuʻinga ʻo e moʻui ʻaki e ngaahi tefitoʻi moʻoni ʻo e ongoongoleleí.

Naʻe hoko fakafokifā leva ha meʻa. Naʻe fakahaaʻi fiefia ʻe Sēini ki he fāmilí ʻokú ne feitama. Ne u toe loto-hohaʻa pe ʻe uesia fēfē ʻe he ongoongo ko ʻení ʻeku fānaú. Naʻa nau ʻiloʻi nai ʻoku ʻikai ke finangalo ʻetau Tamai Hēvaní ke ʻomi ʻEne fānaú ki he māmaní ʻi he founga ko ʻení? Kapau naʻa nau ʻi he ʻātakai ko ʻení, te nau fakakaukau nai ʻoku tali lelei ia pea ko e angamahení pe ia?

Ne u hohaʻa ʻi ha ngaahi uike ʻo ʻikai ke u fie talaange ki heʻeku fānaú ʻa e ongoongo foʻou ko ʻení. Hili ha māhina ʻe taha mei ai naʻe fakakaukau ʻa Sēini mo ʻEnitī ke na mali. Ko e hā naʻe ʻikai te na tatali ai ke na mali pea toki fanongonongo e feitamá?

Ne fakalalahi ʻeku loto tāufehiʻá. Te u ʻofa fēfē ʻia Sēini kae ʻikai ko e meʻa kuó ne faí? Te u akoʻi fēfē ʻeku fānaú ke nau kei ʻofa pē ʻi honau mehikitangá kae ʻikai ʻi he ngaahi fili kuó ne faí?

Naʻe talanoa mai ʻe hoku tokouá ʻi ha ʻaho ʻe taha ʻo kau ki ha finemui ʻi hono uōtí ne feitama. Naʻe maʻulotu maʻu pē ʻa e finemui ko ʻení pea hangē naʻe fiefia mo vekeveke ʻi he meʻa ʻoku ʻamanaki ke hoko ʻi heʻene moʻuí. Naʻe puputuʻu ʻa e toenga ʻo e kau finemuí ʻi heʻenau vakai hangē ʻoku ʻikai hohaʻa e taʻahiné ia ki he meʻa ʻoku hokó.

Ka naʻe ʻilo ʻe hoku tokouá ʻa ia ne faiako ʻaʻahi ki he faʻē ʻa e finemuí ko ʻení, naʻe lahi e ngaahi pō naʻe taʻemamohe ai e finemuí pea tangi pē ʻo aʻu ki heʻene mohe ʻi heʻene mamahi koeʻuhí ko e ngaahi fili naʻá ne iku ai ki he faingataʻa ko ʻení. Hili ha ngaahi uike ʻo e loto mamahí, naʻe fakakaukau e finemuí ʻe kei hokohoko atu ʻene mamahi ʻi heʻene ngaahi ngāue naʻe faí, pe ko ʻene fakangaloʻi pea fiefia. ʻE lava ke ne tali ʻa e nunuʻa ʻo ʻene ngaahi filí pea koeʻuhí ko e feilaulau fakalelei ʻa Sīsū Kalaisí, te ne toe hoko ʻo maʻa ʻo fakafou ʻi he fakatomalá.

Ne u fifili pe kuo aʻusia nai ʻe Sēini e meʻa meimei tatau mo ia. Kuó ne fakatomala nai ʻi heʻene ngaahi filí, pea ʻi he ʻikai lava ʻo liliu ʻa e ngaahi nunuʻá, naʻá ne tali ia pea fakakaukau ke fakangaloʻi?

Ne u ongoʻi fakamāʻia ʻi heʻeku loto-fakamāú mo ʻeku taʻemalava ke fakahaaʻi ʻa e ʻofá ʻi he founga ʻoku finangalo ki ai ʻa Sīsū Kalaisi ke tau fai ʻaki ʻa e ʻofá. ʻI heʻeku fakakaukauloto ki he moʻui ʻa e Fakamoʻuí, ne u manatuʻi naʻá Ne fekumi maʻu pē ki he kau angahalá, pea akoʻi kinautolu ʻaki ʻEne ngaahi folofolá mo e tā sīpingá, pea ʻofa ʻiate kinautolu. Ko e ʻofa ʻeni naʻá ne fakavaivaiʻi e lotó mo liliu e moʻui ʻa e kakaí.

Ne u ʻiloʻi ko e taimi lahi naʻá ku ʻofa pē ʻi he kakaí ʻo kapau naʻa nau fai e meʻa ne u pehē ʻoku totonu ke nau faí, ka ko e tuai pē haʻanau fehalaaki, ne u fakahalaiaʻi kinautolu ʻi hoku lotó. He mālualoi moʻoni ko au! Naʻá ku fakatokangaʻi naʻe fie maʻu ke u fakatomala. Naʻe fie maʻu ke u ako ke ʻofa ʻi he tokotaha faiangahalá kae ʻoua pē te u poupouʻi ʻa e angahalá. Naʻe faifai peá u lava ʻo tukuange ʻeku loto ʻita kia Sēiní peá u toe ʻofa moʻoni kiate ia.

Ne u toe fai ha fealeaʻaki lelei mo ʻeku fānaú. Naʻá ku fakamamafaʻi ʻa e mahuʻinga ko ia ke tomuʻa mali pea toki feitamá. Naʻe lava ke mau fakatuʻamelie ki hono fāʻeleʻi mai ha pēpē foʻou ki he fāmilí. Naʻa mau fie poupou kotoa pē kia Sēini mo kau fakataha mo ia ʻi he taimi makehe ko ʻeni ʻo ʻene moʻuí. Naʻe ʻiloʻi heʻeku fānaú naʻe fai ʻe honau mehikitanga ko Sēiní ha fehalaaki, ka naʻa nau kei ʻofa pē ʻiate ia mo hono mali ko ʻEnitií mo fakaʻamu ʻe ʻi ai ha ʻaho ʻe fakakaukau ai hona fāmili fakaʻofoʻofá ke nau toe foki mai ki he toʻukupu ʻofa ʻo e Fakamoʻui ko Sīsū Kalaisí.