Ko e Lelei ʻo e Fakataha Alēlea ʻa e Kau Faiakó
ʻOku nofo ʻa e tokotaha naʻá ne faʻú ʻi Sikotilani.
Naʻe liliu ʻo lelei ange ʻeku founga fakafaiakó tuʻunga ʻi ha fakamatala ʻi he fakataha alēlea ʻe taha ʻa e kau faiakó.
ʻOku tokoni e fakataha alēlea fakafaiakó kia Sandra Cattell (ʻi lotó) ke toe lelei ange ai ʻene founga fakafaiakó.
ʻOku ou fuʻu motuʻa, pea ʻi he taimi naʻe ui ai au keu faiako ʻi he Kau Finemuí, naʻá ku fakakaukau, “Tamani! Ko e hā nai ʻoku nau ui ai aú?”
Naʻá ku fakahoko ha ngāue lahi ʻi hono teuteuʻi e lēsoní ke feʻunga mo e ngaahi fie maʻu e kau finemuí, pea ne u ʻamanaki te nau vekeveke ke vahevahe ʻa e meʻa kuo nau akó, mo e meʻa ne nau fai ki ai lolotonga ʻa e uiké. Ka ne nau faʻa fakalongolongo pē hono fai atu e fehuʻí.
Naʻe pehē ʻe ha faiako ʻe taha ʻi he taha ʻo e fuofua fakataha alēlea ʻa e kau faiako ʻi he uōtí, naʻá ne faingataʻaʻia foki mo ia he fakakau mai e toʻu tupú ki he lēsoní. Naʻe pehē ʻe ha faiako ʻe taha ʻi he fakatahá, “Tuku pē ʻe koe ke nau fakalongolongo.” Taimi ʻe niʻihi ʻoku fie maʻu ʻe he kakaí ha kiʻi taimi ke nau fakakaukau ai ki ha fehuʻi kimuʻa pea nau fai mai ha talí.
Naʻe liliu ʻe he fakamatala ko ia ʻi he fakataha alēlea ʻa e kau faiakó ʻo ʻikai ngata pē ʻi heʻeku founga fakafaiakó, kae ʻumaʻā foki ʻeku fānau akó. Naʻá ku fakakaukau lahi ki he meʻá ni. Naʻá ku ʻeke ki he kalasí, ʻi heʻeku lēsoni hoko mo e Kau Finemuí, pe ko e hā ʻa e tefitoʻi moʻoni ʻo e ongoongoleleí, naʻa nau fakahoko lolotonga e uiké. Ne nau faʻa fakalongolongo pē. ʻOku ou manatuʻi ne ʻikai ha fakatovave ia ke fai ha tali ke toʻo atu ai e lōngonoá, ka ne u manatuʻi ha fakalea ne pehē mai, “ʻOku ʻikai ha fakavavevave.”
ʻI he momeniti ne u lea pehē aí, ne kamata leva e fetalanoaʻakí. Naʻe kamata leva ke vahevahe ʻe he kau finemuí ʻenau fakakaukaú mo e aʻusiá. Naʻá ku loto leva he taimi pē ko iá ke u fakamālō ki he faiako ko ia naʻá ne fakahoko ʻa e kiʻi fakamatala faingofua fekauʻaki mo e fakalongolongó, ʻi he fakataha alēlea ʻa e kau faiakó. Naʻá ku ofo ʻi he liliu lahi mo vave ʻoku hoko ʻi hono akoako fakahoko e foʻi tefitoʻi moʻoni ko iá.
Ne u toki fakatokangaʻi kimui e liliu ne hoko aí mo ha ngaahi tefitoʻi moʻoni kehe pē ne u ako ki ai. Naʻe pehē mai ʻe ha faʻē ʻa ha taha ʻo e kau finemuí he tuku ʻa e lotú, naʻe talaange ʻe heʻene taʻahiné ʻokú ne ʻilo naʻe uiuiʻi au ʻe he ʻOtuá.
He ʻikai te u lava ʻo talaatu ʻa e ongo makehe ne u maʻu ʻi heʻeku fanongo ki he lea ko iá. Naʻá ku fakakaukau, “Ko e hā ha meʻa ʻoku ou maʻu ke akoʻi e kau finemuí ni?” Pau pē ʻoku nau ako ha meʻa meiate au. ʻOku ʻi ai ha taumuʻa naʻe ui ai au, pea ʻoku tokoniʻi au ʻe he ngaahi fakataha alēleá, ke u aʻusia ʻa e taumuʻa ko iá.