Founga ʻEku ʻIloʻí
Ako ke Hoko ko ha Maama ki Māmani
ʻOku nofo ʻa e taha naʻá ne faʻú ʻi he Lepupelika Tominikení.
Naʻe fāʻeleʻi au ʻi he Lepupelika Tominikení pea ne u tupu hake pē ʻi he Siasí. Ne u tupu hake ʻi ha kau taki lelei ʻa ia naʻa nau feinga ke tokoniʻi au ke muimui ʻi he hala ʻoku totonú. Naʻá ku fakaʻamu ke u ngāue fakafaifekau mo tokoni ki he niʻihi kehé.
Koeʻuhí naʻe hiki ʻeku tamaí ki he ʻIunaiteti Siteití ʻo feinga ke maʻu ha moʻui ʻoku lelei ange maʻamautolú, naʻe tauhi toko taha pē ʻe heʻeku faʻeé au mo hoku tuofāfiné. Naʻá ku faʻa ongoʻi tuēnoa ʻi he taimi ʻe niʻihi, ka naʻe ʻikai pē te u tuēnoa he naʻe lava ke u talanoa ki ha faʻahinga faingataʻa pē ʻi heʻeku moʻui mo hoku kau takí.
ʻI he taimi naʻa mau hiki ai ki he ʻIunaiteti Siteití, naʻe kamata ke ʻahiʻahiʻi lahi au. Ne mau maʻulotu ʻi ha kiʻi kolo tokosiʻi pea ne u maʻu ha kau taki lelei naʻa nau fie tokoniʻi au, ka naʻe feinga hoku kaungāmeʻa ʻi he akó ke taki au mei hala ʻo e ongoongoleleí. Meʻapangó, ne u kamata ke lea taʻetaau ki heʻeku faʻeé pea tātātaha ke u fanongo ki heʻene faleʻí.
Ne u maʻulotu ʻi he Sāpate kotoa pē, ka naʻe ʻikai te u maʻu ha holi moʻoni ke fai ia, pea naʻe ʻikai ke u ʻiloʻi pe naʻá ku fie ʻalu ʻo ngāue fakafaifekau pe ʻikai.
Ne u fakaava hake ʻa e Tohi ʻa Molomoná ʻi ha pongipongi ʻe taha pea naʻe fakaava tonu hake pē ki he peesi ʻo e potufolofola ʻoku ou saiʻia taha aí 3 Nīfai 12:14–16:
“Ko e moʻoni, ko e moʻoni, ʻoku ou pehē kiate kimoutolu, ʻoku ou fekau kiate kimoutolu ke mou hoko ko e maama ʻo e kakaí ni. Ko e kolo kuo fokotuʻu ʻi ha moʻungá ʻoku ʻikai faʻa fakapuli ia.
“Vakai, ʻoku tutu koā ʻe he tangatá ha teʻelango pea tuku ia ki he lalo puhá? ʻIkai, ka ki he tuʻunga māmá, pea ʻoku ulo ia kiate kinautolu kotoa pē ʻoku ʻi he falé;
“Ko ia tuku ke ulo pehē hoʻomou māmá ʻi he ʻao ʻo e kakaí ni, koeʻuhi ke nau mamata ki hoʻomou ngaahi ngāue leleí pea tuku ʻa e fakafetaʻi ki hoʻomou Tamai ʻa ia ʻoku ʻi he langí.”
Ne u maʻu ha fiefia lahi ʻi hono lau ʻení he naʻá ne tokoni ke fakamanatu mai ʻa e meʻa naʻá ku ako ʻi he seminelí mo hono fakaofo e palani ʻa ʻetau Tamaí. Ko ia ne u fakakaukau ai ke u feinga ke u hoko ko ha maama ki māmani.
Naʻá ku fakaafeʻi ki he lotú ha ongo tamaiki ʻoku ou tokoua ʻaki. Ko e tokotaha naʻe māmālohi, pea naʻá ne hoko ʻo mālohi. Ko e taha leva naʻe ʻikai te ne kau ki he Siasí, pea naʻá ku lava ʻo papitaiso ia.
Hili ha taʻu ʻe taha mei ai naʻá ku maʻu hoku uiuiʻí ke u ngāue ʻi Kalefōnia, USA. Naʻá ku ʻiloʻi taʻe toe veiveiua ʻi heʻeku ngāué, ko e ongoongolelei moʻoni ʻeni ʻo Sīsū Kalaisí. Naʻe toe tupulaki ange ʻeku fakamoʻoní ʻi heʻeku tokoni ki he niʻihi kehé, pea ko e taimi kotoa pē naʻá ku lau ai e folofolá, naʻá ku lau leʻolahi maʻu pē ʻa e potufolofola ʻi he 3 Nīfaí ke hoko ko ha maama ki māmani.