Mālohi Fakatoʻú & Pisitoó

ʻĪmisi

girl at party

ʻI hoku taʻu 12, naʻe fakaafeʻi au ʻe ha niʻihi ʻo e tamaiki fefine ʻi hoku ʻapiako foʻoú ki ha paati faiʻaho. Ko e fuofua paati ia kuo fakaafeʻi au ki ai mo hoku kaungāmeʻa ko ʻeni mei he akó. ʻI he taimi naʻá ku kole ai ki heʻeku ongomātuʻá ha ngofua ke u ʻalú, naʻe ʻikai te na tali koeʻuhí naʻe fuʻu tōmui e taimi kamata ʻa e pātí.

Hili pē ha taimi nounou mei ai, ne u maʻu ha toe fakaafe ki ha paati ʻe taha. Ne u toe kole ha ngofua mei heʻeku ongomātuʻá, ka naʻá na toe tali ʻikai pē, pea ne u ʻita. Meʻa ní he ʻikai ngofua ke u kiʻi fiefia?

Naʻe palani leva ʻe ha taha hoku kaungāmeʻa ofí ha paati. Naʻá ku kau ʻi he niʻihi naʻá ne fuofua fakaafeʻí. Naʻe ʻuluaki kamata e pātí ʻi he ngaahi paati kehé. Naʻe fakangatangata pē e kau fakaafé pea naʻe ofi pē ki homau ʻapí. Naʻá ku kole ha ngofua mei heʻeku ongomātuʻá, pea naʻá na tali ʻio! Naʻá ku fiefia.

Naʻe aʻu ki he ʻaho ko iá. Naʻe ʻave au heʻeku ongomātuʻá ki ai peá na talamai te na haʻu he 10:00 p.m. ke mau foki. ʻI heʻeku aʻu ki he pātí, ne u ʻilo hoku kaungāfefiné. Hili ha miniti ʻe uofulu mei ai, naʻe teʻeki pē ke u sio ki he taʻahine faiʻahó.

Ne ʻosi ha ngaahi miniti siʻi mei ai, naʻe haʻu ha talavou kiate kimautolu ʻo ne fehuʻi mai, “Kuo mou haʻu mo ha paʻanga ki he pisitoó?” Naʻá ne ʻai ha fakaʻilonga ke u ʻiloʻi ko e “pisitoó” ko e pia. Naʻe ʻoange ʻe hoku kaungāfefiné ha paʻanga kiate ia. Naʻe ʻikai ke ʻi ai haʻaku paʻanga, ko ia ne u fakakaukau ke mavahe mo ha niʻihi ʻo e tamaiki fefiné kae hoko atu ʻe he niʻihí ia ko ʻení ʻenau meʻa ʻoku faí.

Naʻe faifai pea aʻu mai e taʻahine faiʻahó—ʻo tōmui ʻaki e houa ʻe taha. Ne u talamonū ange kiate ia, pea lolotonga ʻema talanoá, naʻe aʻu mai ha fuʻu loli lahi. Naʻe hifo mai ha kau tangata ʻe toko nima ʻo fakahifo ha ongo puha pia lalahi. Naʻe fakatahataha mai e tokotaha kotoa ʻo kamata ke tufotufa atu e piá. Ne ʻalu hoku kaungāfefiné ke ʻomi haʻanau pia, pea ne u tuʻu toko taha pē ʻo siofi e toʻu tupú ʻi heʻenau faifeinga ke maʻu haʻanau piá.

Naʻe foki mai hoku kaungāfefiné ʻo ʻomi haʻaku pia. Naʻá ku talaange kiate kinautolu, “ʻIkai, mālō pē.” Naʻa nau toe vivili mai pē. Ne u toe pehē ange ʻikai. Naʻe kamata ke tā vave hoku mafú, peá u ongoʻi faikehe, ʻo hangē ha faiva naʻe tuku ai au ko e tokotaha ne fai ki ai e faivá ʻi ha feituʻu mamaʻo. Ne u fanongo leva ki he hooni ha meʻalele—ko ʻeku ongomātuʻá! Ne u fai ha kiʻi lea māvae, peá u hū ki tuʻa ʻo lele ki he kaá.

Ne u heka ki loto, ʻo fakatau ʻeku mānavá. Ne kamata ke u fakakaukau ki heʻeku ongoʻi manavahē ʻi he feituʻu naʻá ku ʻi aí. Naʻe ʻeke mai ʻe heʻeku faʻeé pe ʻoku ou sai pē. Naʻá ku tali ange, “ʻIo, ka naʻe ʻi ai e meʻa ne u ʻohovale ai.”

Naʻe ʻeke mai heʻeku tamaí, “Ko e hā e meʻa naʻá ke ʻohovale aí?”

“Naʻe inu kotoa hoku kaungāmeʻá, pea naʻá ku fuʻu ʻohovale ai mo fakaongoongo pē ke ʻi ai ha meʻa lelei ʻe hoko. Ne u fakaʻamu moʻoni ke fai mo mo aʻu mai, pea ko ʻeni kuó u ʻi heni.” Naʻá ku sio ki he uasi ʻo e meʻalelé; naʻe teʻeki ke hoko e 10:00.

Naʻe pehē mai ʻeku faʻeé, “Ko e founga paati ia ʻa e māmaní. Ko e ʻuhinga ia naʻe ʻikai te ma fakangofua ai koe ke ke ʻalu ki he ngaahi paati kimuʻá.”

ʻI heʻeku lotu ʻi he pō ko iá, naʻá ku fakamālō ki he Tamai Hēvaní ʻi he vave ange ʻeku ongomātuʻá.

Ko kitautolu kāingalotu ʻo e Siasí ʻoku tau ʻi he māmaní, ka ʻoku ʻikai te tau hangē ko e māmaní. Naʻá ku ako kapau naʻe hokohoko atu pē ʻeku ʻalu ki he ngaahi paati ko iá, mahalo kuó u tō ʻi hono maumauʻi e Lea ʻo e Potó mo e fono ʻo e angamaʻá. Kuo tokolahi hoku ngaahi maheni kuo nau tō ʻi he meʻá ni, ko e tokolahi tahá ʻoku ʻikai te nau kau ki he Siasí, ka naʻa mo e kāingalotu ʻo e Siasí te nau aʻu pē ʻo tō ʻo kapau he ʻikai ke nau tuʻu maʻu.

ʻOku ou ongoʻi fiefia ʻi heʻeku fili ke ʻoua ʻe inú. Naʻá ku fakakaukau ʻe fakamataliliʻi au ʻamui ange, ka naʻe iku ʻo fakaʻapaʻapaʻi lahi ange au ʻe hoku kaungāmeʻá koeʻuhí ʻoku nau ʻiloʻi ʻeku tuʻunga moʻuí. Hili iá, kuo teʻeki te u ilifia ke tali ʻikai ki he meʻa ʻoku ou ʻilo ʻe fakatuʻutāmaki kiate aú.