Feʻauhi ʻa Kalānesi mo e Haú
Naʻe sio fakamamaʻu ʻa Kalānesi ki tuʻa he matapā sioʻata ʻo e kaá ʻi he ʻasi mai ʻa e taulangá. Naʻe tētē e ʻū vaká ʻi he vaí ʻi muʻa ʻi ha ʻū fale mo ha falekoloa lanu kehekehe. Ko ha kolo fakaʻofoʻofa ʻa Koupeniheikeni ʻi Tenimaʻaké ʻoku lahi ai e ngaahi palasí, fale lalahí, mo e paʻaké. Naʻe matuʻaki kehe ia mei he kolo ʻoku haʻu mei ai ʻa Kalānesi ʻi ʻIutā, USA. Naʻe fakakaukauloto ʻa Kalānesi ki he ngaahi hala efua naʻá ne faʻa lova ai heʻene kei siʻí. Ko ʻeni naʻá ne kau ʻi he timi lova ʻa e ʻIunaiteti Siteití, pea te ne feʻauhi mo ha tangata Tenimaʻake lova ʻiloa ʻapongipongi ʻi ha feʻauhi lova mahuʻinga.
Naʻe tuʻu e kaá ʻi ha falelotu siʻisiʻi ʻa e Siasí pea kuo ʻosi kamata ha houalotu.
ʻI he moulu atu ʻa Kalānesi ki mui ʻi he lotú, naʻe fakatokangaʻi mai ia ʻe ha taha ʻo e ongo faifekau naʻá na tangutu mei muʻá he naʻá ne hā he fakamatala ʻi he ongoongó fekauʻaki mo e lova ʻapongipongí. Naʻe kole ange e palesiteni fakakoló kia Kalānesi ke haʻu ʻo fai ha lea.
Hili hono talaange ʻe Kalānesi ʻa e ʻuhinga ʻo ʻene ʻaʻahí, ne tuʻu hake ha kiʻi tamasiʻi ʻo hiki hono nimá. Naʻá ne fehuʻi ange, “ʻOkú ke pehē te ke mālohi ʻi he hau Tenimaʻaké?”
Naʻe ʻikai ke fakapapauʻi ʻe Kalānesi ʻa e meʻa ke lea ʻakí. Ko e moʻoni, naʻe lelei ange e taimi ʻa e tangata lele Tenimaʻaké ʻi he lova mailé ʻi he faʻahitaʻu ko iá.
Kimuʻa pea fai ʻe Kalānesi ha talí, naʻe pehē ange ha taha ʻo e ongo faifekaú, “ʻIo te ne lava.” “Koeʻuhí ʻokú ne tauhi e Lea ʻo e Potó.” Naʻá ne kumi ʻi heʻene folofolá ʻa e Tokāteline mo e Ngaahi Fuakava vahe 89. Naʻá ne lau e talaʻofa kiate kinautolu ʻoku nau tauhi e Lea ʻo e Potó te nau “lele kae ʻikai ongosia, pea ʻalu ʻo ʻikai pongia” (veesi 20).
Ko e hā ha meʻa ne mei lea ʻaki ʻe Kalānesí? Naʻá ne ʻiloʻi ʻoku moʻoni ʻa e Lea ʻo e Potó. Pea naʻá ne palōmesi ʻi heʻene kei siʻí te ne tauhi maʻu pē ia. Ka naʻe ʻikai ʻuhinga ia te ne ikunaʻi ai e lova koʻení. ʻOku fie maʻu foki e akoakó mo e taukeí ke ikuna. ʻI he foki ʻa Kalānesi ʻi he tuku ʻa e houalotú, naʻá ne fakakaukau, “Sai pē, he ʻikai ke ʻi he lova ʻapongipongi ha taha ia mei he lotú.”
ʻI he faofao ʻa Kalānesi ʻi he efiafi hono hokó ʻo teuteu ki he lová, naʻá ne fakatokangaʻi e ongo faifekaú mo ha tamaiki tangata ʻe toko 17 nai. Ne nau haʻu!
ʻI heʻenau ofi maí, naʻe fanafana ange ʻe he taha ʻo e ongo faifekaú kia Kalānesi, “Kapau kuó ke lele ʻi hoʻo moʻuí, feinga mālohi ange ke ke lele he pooni.” Ko e tokolahi ʻo e tamaiki tangatá naʻe ʻikai ke nau kau ki he Siasí ka naʻa nau haʻu mo honau kaungāmeʻá ke sio pe ʻoku moʻoni nai e Lea ʻo e Potó.
Naʻe loto-hohaʻa ʻa Kalānesi. Mahalo he ʻikai ke feʻunga ʻene lelei tahá ʻi he lova ko ʻení. Ka naʻá ne lova koeʻuhí ko ha tefitoʻi moʻoni ʻo e ongoongolelei ʻo Sīsū Kalaisí. Kuo pau ke ne ikuna. Ne teʻeki ke ne lotu kimuʻa ke ikuna, ka naʻá ne maʻu ha loki naʻe ʻataʻatā ke fai ai haʻane lotu.
Naʻá ne lotu, “Tamai Hēvani, ʻoku ou ʻiloʻi ʻoku moʻoni ʻa e Lea ʻo e Potó, pea kuo teʻeki te u maumauʻi ia. Fakamolemole ʻo tāpuakiʻi au ke u ikuna ʻi he lova ko ʻení.” ʻI heʻene lue ki he laine kamatá, naʻá ne ʻiloʻi naʻe fanongo mai e Tamai Hēvaní ki heʻene lotú. Naʻá ne falala ki he finangalo ʻo e Tamai Hēvaní.
Naʻe ʻuhoʻuha pea pelepela e efiafi ko iá. ʻI he kamata ke lova ʻa Kalānesí, naʻe hangē pē ia ko e ʻū lova maile kuó ne ʻosi lele aí. Naʻe oma e lele ʻa e kau lová, pea naʻe muʻomuʻa ʻa e hau Tenimaʻaké. Ka ʻi he fakaʻosiʻosi ʻe Kalānesi e takai hono tolú, ne fakaʻohovale ʻa e ʻikai te ne toe ongosiá. Naʻe kamata ke oma ange ʻene lelé, pea naʻe ʻikai te ne mamahiʻia. Naʻa mo ʻene lele ʻo toe oma angé naʻe ʻikai pē te ne mamahiʻia. Naʻá ne fakalaka ʻi he hau Tenimaʻaké mo kei lele oma pē.
ʻI he aʻu mai ʻa Kalānesi ki he afé, naʻe kaila mai ʻene faiakó, “Māmālie hifo! He ʻikai te ke aʻu ki he tepí!” Ka naʻe ʻilo ʻe Kalānesi te ne kei lava pē ʻo lele. Pea ʻi he taimi naʻá ne ʻosiki ai e lová, naʻá ne mamaʻo ʻaki e ʻiate ʻe 50 (46m) mei he tokotaha lele Tenimaʻaké! Naʻá ne ʻiloʻi naʻá ne ikuná koeʻuhí naʻe tali ʻe he Tamai Hēvaní ʻa ʻene lotú pea koeʻuhí ʻoku moʻoni ʻa e Lea ʻo e Potó.