Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.
“Hangē ko e Fefine Uitou ʻo Salifatí: Ko e Mana ʻo e Foaki ʻAukaí,” peesi 24: Fakakaukau ke lau fakataha ʻe he fāmilí e fakamatala ko ʻení pea ako leva e talanoa ki he fefine uitou ʻo Salifatí ʻi he 1 Ngaahi Tuʻi 17. Te ke lava leva ʻo tali e ngaahi fehuʻi ko ʻení: ʻOku founga fēfē hono faitāpuekina fakafoʻituitui mo fakafāmili kitautolu ʻe he ʻaukaí? Ko hai ʻe lava ke faitāpuekina ʻe heʻetau foaki ʻaukaí? Ko e hā ha ngaahi tāpuaki te tau vakai ki ai ʻi hotau fāmilí ʻi heʻetau foaki ʻo lahi ange ʻetau foaki ʻaukaí? Te mou lava ʻo aleaʻi ʻa hoʻomou malava ke foaki ha foaki ʻaukai ʻoku lahí pe ko ha ngaahi founga kehe te mou lava ai ʻo tokoni fakafāmili ki he masivá mo e faingataʻaʻiá.
“Fuka ʻa e ʻEikitau ko Molonaí,” peesi 76: Te mou lava ʻo lau fakafāmili ʻa e fakamatala ko ʻení fekauʻaki mo e ʻEikitau ko Molonaí. Te ke lava leva ʻo lau e ʻAlamā 46:11–14 pea aleaʻi pe ko e hā naʻá ne ueʻi e ʻEikitau ko Molonaí ke maluʻi hono kakaí—“hotau ʻOtuá, mo ʻetau lotú, mo e tauʻatāiná, mo ʻetau melinó, hotau ngaahi uaifí, mo ʻetau fānaú.” ʻOku kei mahuʻinga pē ʻa e ngaahi meʻa tatau ko iá pea ʻoku kei ʻohofi pē ʻi he ʻahó ni. Fakakaukau ke faʻu haʻamou “fuka ʻo e tauʻatāiná” pea aleaʻi e ngaahi founga ke maluʻi ʻaki e ngaahi meʻa ʻoku mahuʻinga taha kiate kimoutolú.