Teuteu—pea Fakahoko
ʻEletā Hugo E. Martinez
ʻO e Kau Fitungofulú
ʻE liliu hoʻo moʻuí ʻi hoʻo teuteu ke fakahoko e ngāue ʻa e ʻEikí.
Ne u hoko ko ha faiako semineli ʻi ha taʻu ʻe ono. Naʻa mau kalasi ʻi he 6:00 a.m. he pongipongi kotoa pē ʻi hoku ʻapí ʻi Pueto Liko. Ko ha ngāue lahi ke teuteu e lēsoní ʻi he ʻaho kotoa pē, mei he Mōnite ki he Falaite. Ka naʻá ku fiefia ai, pea naʻe tokoni ia ke u fakatupulaki ha ʻofa lahi ange ki he toʻu tupu ʻo e Siasí.
Naʻá ku fakatokangaʻi ko e konga lahi ʻo e meʻa naʻe maʻu ʻe he kau akó ʻi he seminelí naʻe makatuʻunga ia mei heʻenau mateuteú. Ko ia kapau ʻokú ke fie ako lahi mei ha lēsoni seminelí, ʻoku ou fakaafeʻi koe ke ke tomuʻa ako e lēsoní pea fakalaulauloto fakamātoato. Haʻu ki he kalasí mo ha loto-vivili ki he ʻiló. Haʻu ʻo hangē ko ha tamasiʻi siʻí, ʻo fie ako maʻu pē. Mateuteu koeʻuhí ke mou lava ʻo kau ki he fealeaʻakí pea mou lava ʻo feakoʻiʻaki. Pea haʻu mo ha ngaahi fehuʻi. ʻE lava ʻe ha toʻu tupu ʻe taha, pe ha potufolofola ʻoku lau, pe mahalo ko ha fakamatala ʻa e faiakó ʻo tali hoʻo ngaahi fehuʻí.
ʻOku maʻu e ngaahi fakahinohino lelei taha lolotonga ha kalasi pe fakatahaʻanga ʻa e Siasí ʻi he taimi kuó ke mateuteu aí pea maʻu e ngaahi ueʻi fakalaumālie ko ha ngaahi fakakaukau. Hiki kinautolu pea ngāue ʻo fakatatau ki ai. Fekumi ki ha ngaahi potufolofola pe ngaahi lea lahi ange ʻi he konifelenisi lahí pe ngaahi fakamatala mei he ngaahi makasini ʻa e Siasí ʻo kau ki he ngaahi fakakaukaú ni. Fakalaulauloto kiate kinautolu ʻi ho ʻatamaí mo e lotó pea mateuteu ke ngāue, koeʻuhí ko e taimi pē te ke maʻu ai e ngaahi moʻoni ko ʻení, ʻe meʻangāue ʻaki koe ʻe he ʻEikí ke tokoniʻi e niʻihi kehé.
Kimui ange aí, ʻi heʻeku hoko ko ha palesiteni fakamisiona mo hoku uaifí, naʻá ku ʻiloʻi ko e seminelí ko ha tokoni lahi ia ki he teuteu ngāue fakafaifekaú. Kuó u mamata ʻi ha ngaahi taʻu lahi ki hono faitāpuekina ʻe he mālohi fakaofo ʻo e ongoongoleleí ʻa kinautolu naʻe hoko ko e fānau semineli faivelengá. Kuo nau moʻui ʻaki e ngaahi meʻa naʻe akoʻi ʻi he ʻū lēsoni ko iá ki he ngaahi pole lahi ʻi heʻenau moʻuí pea kuo nau ikunaʻi e ngaahi faingataʻá, ʻo aʻu pē ki haʻanau toe foki mai ki he Siasí hili ha vahaʻataimi ʻo e māmālohí.
ʻOkú ke mahuʻinga ʻaupito ki he ʻEikí. ʻOkú ke mahuʻinga moʻoni. Ko e ngāue ʻa e toʻu tupú ke teuteu pea fakahoko e ngāue fakafaifekaú. Kuo pau ke mahino kiate koe ko e taimi ʻokú ke hokohoko atu ai hono fakahoko e ngāue fakafaifekaú, pea hokohoko atu hoʻo teuteú, ʻe fakaivia mo tataki ke lahiange hoʻo tupulakí ʻi hoʻo hoko ko e faifekau ʻa e ʻEikí. ʻOku ʻikai fie maʻu ia ke ke tui ha pine hingoa fakafaifekau ka ke toki ngāue fakafaifekau, he ʻoku ʻai kiate koe ʻa e huafa ʻo Sīsū Kalaisí ʻi ho lotó koeʻuhí ko hoʻo ngaahi fuakavá.
ʻOku moʻoni tatau pē ʻi he hisitōlia fakafāmilí mo e ngāue fakatemipalé. Hangē ko ʻení ʻi he ʻĒlia Kalipiané, ʻa ia ne u ngāue aí, ko e ngaahi siteiki ko ia ʻoku nau ngāue ʻaki e toʻu tupú ko ha kau faifaleʻi ʻi he hisitōlia fakafāmilí, ʻoku peseti lahi ange e kāingalotu ʻoku nau maʻu e ngaahi hingoá mo fakahoko e ngāue fakatemipalé. Naʻe uiuiʻi ha toʻu tupu ʻe toko 20 ʻi ha siteiki ʻe taha ke nau hoko ko e kau faifaleʻi ʻi he hisitōlia fakafāmilí ʻi ha taʻu kakato ʻe taha kimuʻa pea nau toki matuʻotuʻa feʻunga ke ngāue fakafaifekaú. ʻI heʻenau ʻaʻahi ki he ʻapi ʻo e kāingalotú ke fakahinohinoʻi e founga hono fakahoko ʻo e hisitōlia fakafāmilí, ʻoku nau fakatalanoa ki he kakai ʻi he halá pea fakamatalaʻi kiate kinautolu kau ki he hisitōlia fakafāmilí mo e temipalé. Ko e ngāue fakafaifekaú ia!
ʻOku ou fakatauange pē ko e taimi te nau ngāue fakafaifekau aí, kuo nau ʻosi ongoʻi e Laumālié ʻi ha founga mālohi—ʻamanaki pē ʻi honau ʻapí, pea ka ʻikai, pea ʻi he taimi ʻoku nau fakahoko ai e ngāue fakafaifekaú, hisitōlia fakafāmilí, mo e ngāue fakatemipalé. Pea ʻi he taimi te nau hū ai ki he senitā akoʻanga fakafaifekaú, ʻoku ou fakatauange pē he ʻikai ke pehē mai ha taha ʻo kinautolu, “Kuó u ongoʻi mālohi ange ʻa e Laumālié ʻi heni ʻi ha toe taimi kimuʻa heʻeku moʻuí.” Naʻe totonu ke nau ongoʻi mālohi Hono ivi tākiekiná kimuʻa ange ai.
ʻOku ʻofa ʻa e ʻEikí ʻiate koe. Ko e ʻEne palaní ke ke fakahoko ʻa e hisitōlia fakafāmilí, ngāue fakatemipalé mo e ngāue fakafaifekaú. ʻOkú ke maʻu e pōtoʻi ngāué pea mo e ʻiló. ʻI he taimi ʻokú ke teuteu feʻunga aí, te ke lava ʻo fai e ngāue ko ʻení. Te ne tāpuekina mo liliu hoʻo moʻuí.