Vakananuma Vei Ira mai Viti o Peresitedi Nelson na Kedra iNaki Vakalou

“Au vakavinavinakataki kemuni ena cecere ni nomuni vakabauta, e kaya o Peresitedi Russell M. Nelson ena Lotu i Jisu Karisito ni Yalododonu Edaidai ena nona vosa vei ira e dua na ivavakoso vakaitamera ena rugurugua ni lomalagi mai Viti ena yakavi ni Vukelulu. “Au a taroga kevaka o ni na rawata ka o ni qai rawata. Ni tarova na uca.”

A dewa yani ki Viti mai Niu Siladi o Peresitedi Nelson kei na watina, o Wendy, vata kei Elder Gerrit W. Gong ena Kuoamu ni iApositolo Le Tinikarua kei na watina, o Susan. E ikalima ni vanua me sikova, o Viti, ena nona veiqaravi ciwa na siga ki na vitu na matanitu ena Pasifika ena dua na yasana sa toso tikoga na kena iwiliwili ni lewe ni Lotu.

Eratou a vosa na iliuliu e vuravura ni vakabauta vei ira e dua na ivavakoso sivia na 5000 na Yalododonu Edaidai mai Viti ena dua na lotu ena Ratu Cakobau Park ena koroturaga kei Viti o Suva, ka kilai tu me koroturaga ni veika vakailavo kei na itovo vakavanua ena Ceva ni Pasifika.

Ni oti nodra sere na matasere ni itabagone, a sureti ira na gonelalai na parofita me ra tucake ka qai liutaki ira o koya ena kena lagati e dua na qaqana ni sere na “Au Luve ni Kalou.”

A vosa talega o Peresitedi Nelson baleta na bibi ni iVola i Momani kei na inaki ni valetabu.

“Eda tukuna baleta noda luve ni Kalou, ka da lagata baleta ni da luve ni Kalou,” e kaya na parofita “Na cava beka e vinakata [mai vei keda] me baleti Koya? E kalougata, sa solia vei keda o Koya na kena isau. E kaya o Koya, ‘Na ka au vinakata taumada me ra tawamate rawa na luvequ ka me nodra na isolisoli ni bula tawamudu.’”

E bolei ira na ivavakoso o Sister Nelson me ra wilika na ivolanikalou kakua na itukutuku ni veimaliwai raraba me ra kunea na isau kece ni taro ni bula. “Au sureti kemuni mo ni vakatovotovotaka mada me 30 na siga ka vola na veika o ni sotava. . . . Raitayaloyalotaka na ka ena rawa ni yaco ki na nomu bula ni sa tekivu mo kila ni ivola ni saunitaro na ivolanikalou.”

“Keitou vakila na nomuni lomana na Tamada Vakalomalagi, ka keitou vakila na loloma ni Kalou vei kemuni,” e kaya o Elder Gong.

E vakayaloqaqataki ira na Yalododonu mai Viti o Elder Gong me ra vorata vakaukauwa na ua ni waigaga vakatabui sa curuma tiko na nodra vanua. “E rawa ni da lewa nikua ni da na sega ni vakayagataka. Eda rawa ni lewa nikua me da tu ena veivanua tabu. Sai koya oqori na veivanua ena noda itikotiko, ena noda Lotu kei na valetabu savasava.”

“E dua na ka eda gadreva me da vulica ena bula oqo na ivakarau me da dau vakavinavinakataka tikoga na veika kece, e rawa ni dredre toka oqori baleta ni dau yaco vei ira na tamata vinaka na ka ca,” e kaya o Sister Gong. “E tiko e dua na Tamada Vakalomalagi o Koya e lomani keda ka kila ni veigauna dredre e rawa ni itekitekivu ni veigauna vinaka cake.”

E tukuna talega o koya na bibi ni vuli. “Sa vakavuvulitaka o Peresitedi Nelson ni kedrau duidui na vinakata me da cakava na ka vinaka e vuravura kei na noda rawa ni cakava na ka vinaka e vuravura sai koya me da vuli. . . . Ni o sa vuli, sa rawa ni o vakayacora na duidui levu cake e vuravura.”

“E dua na kena ibalebale bibi noda soqoni voleka ki na valetabu ni vosa vei keda o Peresitedi Nelson,” e kaya o Elder O. Vincent Haleck, na Peresitedi ni iWasewase na Pasifika “Na valetabu sai koya na vanua e dau vakayacori kina na veiyalayalati tabu vata kei na Kalou. . . . Au nuitaka ni sa tiki ni nomuni bula mamarau na Valetabu e Suva Viti ka tiki saraga ni nomuni bula.”

“Keimami sa kalougata vakalevu ni rawa ni keimami serauni mai vua na neimami Peresitedi Nelson, na parofita ni Kalou,” e kaya o Bisopi Leonard Whippy, ka a tiko ena lotu vata kei na watina kei iratou na luvena. “Keirau a tovolea me keirau vakarautaki ira na luvei keirau ka nuitaka ena veiyabaki mai muri ni ra sa qase cake era na nanuma tu na siga nikua.”

E taleitaka o Keetu na watina, na bolebole 30 na siga nei Sister Nelson me wiliki na ivolanikalou “. . . ka masuta me rawa ni tukuna vei keda na Tamada Vakalomalagi—vakatakila ki na noda matavuvale—na cava me da cakava ki na noda matavuvale.”

Ni se bera na lotu, era a sota na iliuliu e cake ni Lotu vata kei ira na itabagone ka ra tiko ena dua na veikidavaki ena vukudra na veiliutaki ni matanitu kei na veimatavakabauta kei ira na vakailesilesi tale eso.

Ni cabo oti na isogomasu, era a lagata na ivavakoso na sere ni vakamoce vakaviti, “Isa Lei,” vei iratou na iliuliu ni Yalododonu Edaidai.