Nodra Rai na Yalododonu mai Viti ena Nona Veisiko na Parofita

Ena gauna e kacivaki kina na nodrau lako mai ki na Ceva ni Pasifika o Peresitedi Russell M. Nelson, na peresitedi ni Lotu i Jisu ni Yalododonu Edaidai, kei na watina, o Sister Wendy Nelson, era a marautaka na yalododonu e Viti.

E na veitomani tiko mai vua na parofita kei na watina o Elder Gerrit W. Gong ena Kuoramu ni iApositolo Le Tinikarua kei na watina o Sister Susan Gong; kei Elder O. Vincent Haleck kei Sister Peggy Haleck ka dua na gauna era a nanamaki kece kina.

Oqo eso na ivakarau ni rai a tukuni mai ena itukutuku mai vei ira na Yalododonu Edaidai e Viti:

“Ena imatai ni gauna au rogoca kina au a luvuci ka vakasinaiti ena vakavinavinaka. Nona lako mai o Peresitedi Nelson ki na neimami yanuyanu sa dua na veisiko au sa vakanamata kina ena nanamaki kei na marau. Au vakila ni na kauta mai na ivakaro, idusidusi kei na veivakauqeti ka baleti keimami vakatabakidua na veiyanuyanu ni wasawasa. Kau nanuma ni dodonu me keimami masulaka ka vakavakarau kina vakavinaka. Au nanuma ni sa ka ni veivakalougatataki vei au meu serauni mai vua e dua na parofita bula.” —Sister Ana Tabakisuva, Nasinu

“Au vakabauta, ni iotioti ni gauna a sikova mai kina na neimami vanua e dua na parofita na nona veisiko mai o Peresitedi Hinckley ena 1998. Au a lewena na matasere a lagata kina na ‘Turaga keitou vuabale’ ena National Stadium. Au se nanuma tikoga na raragi ni yaloqu ena neimami lagata ka raica ni sa curuma mai na rara ni qito. Ena loma ni serenilotu, au vakila ni sa drodro na wainimataqu, niu veiraiyaki, e voleka ni tamata kece era wavoliti au sa vakawai tu ka serau na matadra. Eso na tamata era sega vakadua ni bau sotava ena nodra bula taucoko ia o au e dua ka kalougata meu raica e dua na parofita bula sega ni vakadua walega, ia kena irairai ni na donumaki au tale na galala dokai ena vula mai qo. Io, au sa sega ni rawa ni waraka meu lagata na ‘Turaga keitou vuabale, Parofita ni sa lewa.’ Sa dua dina na veivakalougatataki vakasakiti me lako mai ki na neimami vanua na parofita.” —Bisopi Lote Qima, Tamavua.

“Ni sa kacivaki na veisiko ni parofita, au vakila ni nanumi ira tu na Nona tamata ena veiyanuyanu ni wasawasa na Turaga ka sa vaqaqacotaki kina na noqu ivakadinadina ena ka oqo. Au vakila na veivakalougatataki vakayalo meu nanamaki ki na nona veisiko mai na Parofita ka sa tubu cake tikoga noqu lomana na kosipeli.” —William Ratusaki, Qasenivuli Liu, Fiji Church College

“Au nanuma oqo e dua na veivakalougatataki vei keimami kece e Viti, sega ni lewenilotu walega ia na tamata kece.” —Bisopi Ratu G. Koroibanuve, Nasinu.