Dua na Vunilagi Rarama Cake ni Noqu Matavuvale

Na yacaqu o Eute Kareketaake. Au yabaki 24 ka noqu takete meu dua na dauveiqaravi raraba vakaivola. Au a sotava na nona loloma kei na veikauwaitaki e dua na dauveiqaravi raraba ena dua na gauna dredre ni noqu bula me tekivu mai na gauna oya sa dau gole na yaloqu ki na cakacaka oya.

Ni keirau se lalai kei ganequ keirau a vakau ki Amerika me keirau laki tiko vata kei neirau nei ka vuli. Keirau vakavinavinakataka na madigi vinaka cake oqo ena vuli, ia a sega ni dau maroroi keirau vakavinaka o nei. Ena dua na gauna a lako vakagade ka biuti keirau taurua tu mai kei ganequ e vale. E dau mai raici keirau e vale e veisiga e dua, ia keirau se rui gone ka rere vakalevu me keirau tiko taurua.

Dau dredre vei au na moce ena bogi ia niu moce ena kalasi ena siga ka tarava era na taroga na qasenivuli se cava au rui oca kina. Au sega ni kila ni sa rui sega ni ciqomi na keirau ituvaki kau kidacalataka na nodra ivakarau ni rai ki na noqu isaunitaro. Keirau a vakatarogi kei ganequ mai vei ira na dauveiqaravi raraba kau vakila na nodra taleitaka nodra cakacaka kei na nodra gagadre dina me ra vukei keirau. Au vinakata meu vakataki ira ka vukei ira na gonelalai vakataki keirau ena sala ni loloma vata era a vakayacora. A sega ni yali vei au na gagadre oya.

Na veika au a sotava mai Amerika e sega ni o koya na madigi cecere ni vuli a dodonu me vakakina, ia na Kalou e dau cakacaka ena veisala vuni ka liutaki au na veika au sotava meu kunea na ka au taleitaka ena noqu bula. E dina niu a guta tikoga meu dauveiqaravi raraba, a sega ni rawarawa na sala ki na sasaga oqo; ena so na gauna e vaka me sa sega ni rawa. Au sa vulica, ni kila na Tamada Vakalomalagi na gagadre ni lomada ka dua na nona ituvatuva me baleti keda kece.

Ena 2017 au a vakamautaka na turaga na watiqu, e dua e lesu mai ena kaulotu ni Lotu I Jisu Karisito ni Yalododonu Edaidai. Ni oti e dua na gauna vakaciriloloma ka vakadeitaka kina vei au na yalotabu na dina ni kosipeli, au a papitaiso.

Noqu kunea na kosipeli sa dua na ikalawa levu ni noqu rawata noqu takete vakavuli. Sa dau vakabibitaka sara na vuli na Lotu me vakataki au ka sa vakarautaka na veitokoni me vaka na parokaramu ni ‘Pathway’ ka rawa kina vei ira na tamata ena ituvaki kecega me ra vuli. E sega tiko ni rawarawa na sala, ia au sa vulica ni solia na Kalou e dua na ivakaro vei ira na Luvena, ena vakarautaka o Koya na kena sala vakacakacaka ka vakayalo.

Na parokaramu ni Pathway sa iwali cakacakataki ni noqu gagadre meu vuli ka solia vei keirau kei na watiqu e levu cake mai na dua ga na madigi me keirau vakarabailevutaka na neirau vuli. Keirau sa vulica na bula rawati koya kei na isema ni matavuvale mamarau, kei na veika bibi tale eso ni bula.

Me ikuri ni nona vakarautaka na parokaramu ni Pathway, sa vakasinaiti keirau na Turaga ena Nona mana kei na Yalona.

Keirau vakila ni levu cake neirau yalodei. Au vakila e dua na yaloqaqa veivakurabuitaki ni lutuki au mai ena gauna meu tu kina e matadra na vakaitavi ena Pathway meu vosa. Keirau sa vakila kei na watiqu na levu cake ni mana kei na kaukauwa me keirau lewa vinaka neirau gauna ka cakacaka vakaukauwa me rawa niu vakaotia na itavilesi.

A dredre na kena vakatulewataki na curu ki na pathway. E sega na kompiutatene kei na isema ni initaneti ena neirau vale. Dina ga ni yalani na veika e tu, keirau sa vakila na liga ni Kalou ena neirau itosotoso, nona solia mai na veicakacaka mana me vaka na kena kune eso tale na vanua me keirau cakava kina neirau cakacaka, se o ira na lewenilotu era raici keirau ena taubale balavu ki na laiberi ka vakavodoki keirau.

Au vinakata me dua na vunilagi serau ena noqu matavuvale. Au kila ni levu cake na vuli ena rawa kina ki na noqu matavuvale na madigi levu cake ni qaqa kei na bula rawati koya. Au kila ni ratou a tiko vata kei keitou na Tamada Vakalomalagi, o Jisu Karisito kei na Yalo Tabu ena neitou ilakolako ka ratou vakarawarawataka na neitou icolacola ka vakamamadataka.