Tru disaepol blong Sevya

Samples insaed long OlTesteman buk blong Hagae i tokbaot wan grup blong ol pipol we oli save yusum kaonsel blong Elda Holan. Oli bin mekem i rong blong no putum Kraes fastaem long senta blong laef mo seves blong olgeta. Hagae i givim sam pikja toktok taem hem i tok long ol pipol ia from oli stap slip long gudgudfala haos blong olgeta, be oli no bildim tempol blong Lod.

“Hem i taem blong yu, ?o yes, blong slip long ol gudgudfala haos, be haos blong mi i stap yet we i nogud yet?

“Nao olsem ia nao Lod blong Ol Pipol talem; Lukluk gud long ol wei blong yufala.

“[Yufala i planem plante kaekae, be smol nomo i kamaot; yufala i stap kakae, be i no naf, yufala i stap dring waen, be waen ia i no naf; yufala i gat klos, be ol klos ia oli no wom, mo man we i stap kasem mane i putum nomo i go long poket we i brok.]

“Olsem ia nao Lod blong Ol Pipol i talem; Lukluk gud long ol wei blong yufala.”¹

?Yu no laekem hao oli tokbaot ol nogud risal we i no save finis bitim long ol samting blong God?

Long wan sakramen miting we i jes pas, we mi bin atendem, wan riten misinari i kwotem wan papa we i putum gud aedia ia long wan stret fasin taem hem i talem long ol pikinini blong hem se,“!Wanem yumi nidim long ples ia i smol Wae–Fae be moa Nifae!”

Mi bin laef long Wes Afrika blong faef yia, mo mi bin luk plante eksampol blong ol pipol we oli mekem gospel i kam praeoriti blong olgeta mo oli no sem from. Wan long ol eksampol ia i nem blong man we i stap mekem bisnis blong riperem mo balensem wil blong trak long Gana. Ona i singaotem bisnis ia: “Stretem Wil blong Yu.”

Yumi save filim glad² we i gogohed taem Sevya mo gospel blong Hem oli kam olsem stamba pos we yumi save bildim laef blong yumi raon long hem. Be, i isi tumas blong stamba pos ia i kam olsem, ol samting blong wol, ples we gospel i stap olsem joes nomo, o i stap olsem blong go nomo long jos blong tu aoa long Sandei. Taem i olsem, hem i semmak nomo olsem yumi stap mane i go insaed long “poket we i brok.”

Hagae i talem long yumi blong yumi komitim yumi—blong mekem bes blong yumi, blong kam olsem, olsem yumi talem long Ostrelia, “ stap series” abaot laef folem gospel. Pipol oli series taem oli stap olsem wanem oli talem se oli olsem.

Mi bin lanem smol olsem wanem blong stap series mo givim bes blong mi taem mi plei ragbi. Mi bin lanem se taem mi plei wetem evri bes blong mi, taem mi givim evri samting, glad blong mi long saed blong gem i bigwan.

Pikja

Elda Vinson wetem ragbi tim blong hem

Fevret yia blong ragbi blong mi i bin yia afta long hae skul. Tim we mi bin memba long hem i bin gat plante talen mo oli komitim olgeta. Mifala i bin jampion tim long yia ia. Be, wan dei bae mifala i plei wetem wan tim we i no strong, mo afta long gem mifala evriwan i gat wan deit blong tekem i go long bigfala yia danis blong kolej. Mi ting se from se hemia bae i bin wan isi gem, bae mi traem blong protektem mi blong no kasem kil, blong mi save gat gud taem fulwan long danis. Long gem ia, mifala i bin komitim mifala tumas long had kontak olsem we mifala i sapos blong mekem mo mifala i bin lus. Blong mekem ol samting oli go mowas, mi bin finisim maj ia wetem maot we i fatfat we i mi no luk gud nomo wetem blong bigfala dei blong mi. Ating mi nidim blong lanem wan samting.

Wan defren eksperiens i bin hapen long wan gem afta we i luk se mi bin komitim mi fulwan long hem. Long wan taem mi bin ron wetem tru tingting blong mekem wan kontak, stret long taem ia, mi filim fes blong mi i soa. Olsem papa blong mi i bin tijim mi se mi neva letem oposisen i save sapos mi bin kasem kil, mi gohed blong plei long gem. Long naet ia, taem mi stap traem blong kakae, mi faenem se mi no save kakae. Long nekis moning, mi go long hospital, eksre i konfemem se jo blong mi i bin brok. Oli bin somap maot blong mi wetem waea mo i sat blong sikis wik.

Lesen we mi bin lanem long parabol ia blong fatfat maot mo jo we i brok. Nomata ol memori blong mi we mi wantem kakae strong kaekae tumas long ol sikis wik ia, be mi save tekem supsup nomo; mi no rigret se jo blong mi i brok from se i risal blong mi givim evri samting. Be mi rigret abaot fatfat maot from se i saen blong fasin blong holembak mi.

Givim evri evri samting i no minim se bae yumi gohed blong oli kavremap yumi wetem blesing o oltaem gat sakses. Be i minim se bae yumi gat glad. Glad i no blong harem gud blong wan smol taem o blong wan hapines blong smol taem. Glad bae i stap blong oltaem, mo i stanap long efot blong yumi we Lod i akseptem.³

Wan eksampol long fasin blong akseptem samting, i stori blong Oliva Granja. Olsem Presiden Boyd K. Packer i talem:“ Taem oli ronem ol sent oli aot long Ketlan, … oli lego Oliva i stap biaen blong salem ol propeti long wan praes we hem i save putum, nating i smol. I no bin plante janis blong hem i win. !Mo, i tru se hem i no bin win.!”⁴ Fas Presidensi i bin komisenem hem blong mekem wan wok we i had tumas, o i no posibol blong mekem. Be Lod i bin akseptem hem from hadwok blong hem we i no karem frut, wetem ol toktok ia:

“Mi tingbaot wokman blong mi, Oliva Granja; luk, i tru mi talem long hem se nem blong hem, bae oli tingbaot se hem i tabu, long wan jeneresen i go long narafala jeneresen, blong oltaem mo oltaem, Lod i talem.

“From hemia, hem i mas traehad strong blong pemaot kaon blong Fas Presidensi blong Jos blong mi, … o taem hem i foldaon, bae hem i girap bakegen, from sakrifaes blong hem bae i moa tabu long mi bitim eni gud wok blong hem, Lod i talem.”⁵

Hemia i tru long yumi evriwan—I no from ol sakses blong yumi, be ol sakrifaes blong yumi mo hadwok, we i impoten long Lod.

Wan nara eksampol blong wan tru disaepol blong Jisas Kraes i wan dia fren blong mifala long Kot divoar long Wes Afrika. Naesfala, fetful sista ia i bin safa wan nogud safaring long saed blong filing, mo iven sam abius long bodi we hasban blong hem i mekem ova long wan longfala taem, mo long en, tufala i bin divos. Hem i neva muvmuv long fet blong hem, be from rabis fasin man blong hem long hem, hem i harem nogud tumas blong wan longfala taem. Long toktok blong hemwan, hem i tokbaot wanem we i bin hapen:

“Nomata mi talem se mi fogivim hem, oltaem mi slip wetem wan open soa long mi: mi stap longtaem wetem soa ia. I olsem wan faea i stap bonem hat blong mi. Plante taem mi bin prea long Lod blong Hem i tekemaot soa ia long mi, be i soa tumas nomo we i mekem se mi biliv strong se bae mi spendem haf blong laef blong mi wetem soa ia. I soa moa bitim taem we mi bin lusum mama blong mi oltaem mi yangfala, i soa bitim taem we mi bin lusum papa, mo tu, boe blong mi. I luk olsem i stap kam bigwan mo i kavremap hat blong mi, i givim long mi tingting ia se bae mi save ded long eni taem nomo.

“Sam nara taem, taem mi askem miwan wanem Sevya bae i mekem long situesen blong mi, mo bae mi kolosap talem se, ‘Lod hemia i tumas.’

“Afta wan moning mi lukaotem soa we i kam long evri samting ia insaed long hat blong mi, mo go moa dip, mi lukaotem insaed long sol blong mi. Mi no bin save faenem long eni ples. Maen blong mi i gobak kwiktaem nomo blong luklukbak evri risen we mi sapos blong harem i soa from, be mi no save filim soa ia. Mi bin wet ful dei blong luk sapos bae mi filim soa ia long hat blong mi, mi no bin filim. Afta mi nildaon mo talem tangkyu long God blong mekem sakrifaes blong Lod we i pem praes, i wok long mi.”⁶

Sista ia, i glad blong sil wetem wan naesfala, fetful man we i lavem hem tumas.

So, ?Bae ol fasin blong yumi oli olsem wanem sapos yumi ol tru disaepol blong Kraes? Mo ?wanem hem i praes blong gospel long yumi taem yumi “lukluk gud long ol wei blong [yumi],” olsem Hagae i talem?

Mi laekem eksampol blong stret fasin we papa blong King Lamonae i soem. Bae yu tingbaot kros blong hem long stat taem hem i faenem boe blong hem i folem Amon, wan Man blong Nifae—wan pipol we Ol Man blong Leman oli no laekem. Hem i pulum naef blong hem blong faet wetem Amon, mo i no longtaem afta, naef blong Amon i stap long trot blong hem bakegen. “Nao king, i bin fraet se bae hem i lusum laef blong hem, i bin talem: “Sapos yu sevem laef blong mi bae mi letem long yu eni samting we bae yu askem, i go kasem haf blong kingdom.”⁷

Tekem not long ofa blong hem—haf blong kingdom blong hem from laef blong hem.

Be afta, taem hem i andastanem gospel, hem i mekem wan nara ofa. “King i talem: ?Wanem bae mi mekem blong mi save kasem laef ia we i no save finis we yu bin tokbaot? Yes, ?wanem nao bae mi mekem blong mi save bon long God, mo mekem rabis spirit ia i nomo gat rus long jes blong mi, mo i kasem Spirit blong hem, blong mi save fulap long glad, blong hem i no save sakemaot mi long las dei? Hem i talem: Luk, bae mi lego evri samting we mi gat, yes, bae mi givim kingdom blong mi, blong mekem se mi save kasem bigfala glad ia.”⁸

!Naoia, hem i bin rere blong lego ful kingdom blong hem, from praes blong gospel i moa bitim wanem we hem i gat! Hem i bin series abaot gospel.

So, kwestin blong wanwan long yumi i: ?Yumi series abaot gospel? !From blong komitim yumi hafhaf i no series! Mo God i no man blong stap presem olgeta we oli mekem samting hafhaf.⁹

I no gat rij samting, o eni samting, o eni toktok, no eni sosol media, o eni vidio gem, o eni spot, o eni asosiesen wetem wan sta, o i no gat eni samting long wol we i moa spesel bitim laef we i no save finis. So advaes blong Lod long evriwan i blong “luklukgud long ol wei blong hem.”

Ol filing blong mi, mi save soemaot gud long ol toktok blong Nifae: “Mi glad long klia fasin; mi glad long trutok; mi glad long Jisas blong mi, from hem i bin pemaot sol blong mi long hel.”¹⁰

?Yumi ol tru man blong folem Hem we i givim evri samting blong Hem from yumi? ?Hem i Sevya mo Ridima blong yumi, i loya blong yumi long fored blong Papa.? ?Hem i bin, Hemwan, komitim Hem fulwan blong pem praes tru long sakrifaes blong Hem, mo Hem i olsem naoia long lav blong Hem, sore blong Hem, mo tingting blong Hem from yumi blong kasem glad we i no save finis? Mi plis long evriwan we i harem ol toktok ia: Plis, plis no stopem ful komitmen blong yufala kasem taem yufala i faenem wan nara wei raon long hemia, long fiuja. !Stap series naoia mo filim glad! Long nem blong Jisas Kraes, amen.