Tufala Hae Komanmen
Yumi mas traem blong obei tugeta hae komanmen. Blong mekem olsem, yumi wokbaot folem wan tintin laen bitwin loa mo lav.
Ol dia sista blong mi long gospel ia blong Jisas Kraes. Mi gritim yufala olsem ol tabu gadwoman we i gat wok blong lukaot long famli we i no save finis. Presiden Russel M. Nelson i bin tijim yumi: “Jos ia i bin kambak blong i save gat famli, oli save sil, mo go stap wetem God blong taem we i no save finis.”1 Tijing ia, i tajem fulap, laef blong olgeta we oli talem se oli lesbien, gei, baeseksuol, o transjenda, we long sot nem oli ol LGBT.2 Presiden Nelson i rimaenem yumi se “yumi no nid blong oltaem agri tugeta blong save lavlavem wanwan long yumi.”3 Ol tijing ia blong ol profet oli impoten blong famli i toktok raon long hem blong ansarem ol kwestin blong ol pikinini mo ol yut. Mi bin prea mo lukaotem insperesen blong toktok long yufala, from se, yufala nao, ol kwestin ia bae oli tajem yufala, mo bae i tajem tu evri famli insaed long Jos.
1.
Mi stat wetem wanem we Jisas i tijim se i tufala hae komanmen.
“Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.
“Hemia nao loa ya we i hae moa long ol narafala loa, mo i nambawan blong folem.
“Mo narawan we i kolosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.”4
Hemia i minim se yumi gat komanmen blong lavem evriwan, from se parabol blong Jisas abaot Gudfala Man Sameria, i tijim se evriwan i neba blong yumi.5 Be, i no se yumi glad tumas blong mekem seken komanmen nao yumi fogetem blong mekem nambawan, blong lavem God wetem olgeta hat, laef mo tingting blong yumi. Yumi soem lav ia taem yumi “[stap] obei ol komanmen [blong Hem].”6 God i askem yumi blong obei ol komanmen blong Hem from nomo se, tru long fasin ia blong obei, wetem blong sakem sin, yumi save gobak laef wetem Hem mo kam stret evriwan olsem Hem.
Long toktok blong hem, i no longtaem i pas, long ol yang adalt blong Jos, Presiden Russel M. Nelson i tokbaot wanem hem i singaotem, “strong koneksen bitwin lav blong God mo ol loa blong Hem.”7 Ol loa ia, we i tajem plante ol problem long saed blong olgeta we oli stap talem se oli ol LGBT, oli, loa blong mared mo kompanion loa blong hem blong jastiti. Tufala tugeta i nid blong stap long plan blong Papa, blong fasin blong sevem ol pikinini blong Hem. Olsem we Presiden Nelson i tijim: “ol loa blong God, biaen long ol i gat nomo bigfala lav we Hem i gat long yumi, mo hat blong Hem blong yumi kam evri samting we yumi save kam.8
Presiden Nelson i tijim: “Plante kantri … oli pasem loa blong sem seks mared. Olsem ol memba blong Jos, yumi mekem respektem ol loa blong kantri …, wetem gavman mared. Be, trutok i we, long stat, … !God nao i odenem mared! Mo kasem tedei, Hem i talem se mining blong hem i, mared bitwin wan man mo wan woman. God i no jenisim mining blong Hem abaot mared.”
Presiden Nelson i gohed: “God i no jenisim tu loa blong Hem long saed blong jastiti.” Ol samting blong mekem blong save go insaed long tempol, oli no jenis tu.”9
Presiden Nelson i rimaenem yumi evriwan se “wok blong yumi olsem Ol Aposol i blong tijim trutok mo i no nara samting. Wok ia we Hem i givim, i no givim mifala atoriti ia blong jenisim loa blong heven.”10 Olsem ia nao, ol sista blong mi, ol lida blong Jos, oltaem oli mas tijim se impoten tumas se i gat wan wei nomo blong mared, we i bitwin wan man mo wan woman, mo loa blong jastiti we i go wetem.
II.
Wok blong Jos Ia blong Jisas Kraes blong Ol Lata-dei Sent i lukluk nomo blong stap mekem ol pikinini blong God oli rere from selestial kingdom, mo speseli, glori blong hem we i hae olgeta, blong kam olsem wan god, o kasem laef we i no save finis. Hae fiuja ia, i posibol nomo tru long mared blong taem we i no save finis.11 Insaed long laef we i no save finis, i gat paoa blong krietem laef, we i kamaot long yunion blong wan man mo wan woman12—wanem we revelesen blong tedei i tokbaot olsem “laen blong tufala i gohed blong oltaem mo oltaem.”13
Long toktok blong hem i go long ol yang adalt, Presiden Nelson i tijim: “Taem yufala i stap folem ol loa blong God, bae i kipim yu stap sef taem yu stap progres i go blong kam olsem wan god”14—we hem i blong kam olsem God, wetem laef long heven mo wetem tabu paoa blong Papa mo Mama blong yumi long Heven. Hemia fiuja ples we yumi wantem blong evriwan we yumi lavem. From lav ia, yumi no save letem lav ia i tekova long ol komanmen mo plan mo wok ia blong God, we yumi save se bae i givim, olgeta we yumi lavem, hapines ia we i hae olgeta.
Be i gat plante we yumi lavem, wetem sam we oli gat gospel ia we i kambak, we oli no biliv o oli jusum blong no folem ol komanmen blong God abaot mared mo loa blong jastiti. ?Weswe long olgeta?
Doktrin blong God i soem se, yumi evriwan, i ol pikinini blong Hem, mo Hem i bin krietem yumi blong yumi gat glad.15 Revelesen blong tedei i tijim se God i givim wan plan blong gat eksperiens long laef ia, mo long ples ia, yumi evriwan i save jusum blong lukaotem ol blesing we oli hae olgeta, o mekem ol joes we bae i lidim wan long ol smol kingdom blong glori.16 From bigfala lav we God i gat long evriwan long ol pikinini blong Hem, ol smol kingdom ia, oli stil moa gud bitim wanem we man long wol ia i save andastanem.17 Atonmen blong Jisas Kraes i mekem evri samting ia i posibol, taem we Hem “givim glori long Papa, mo hem we i sevem evri wok blong han blong hem.”18
III.
Mi bin tokbaot nambawan komanmen, ?be olsem wanem long sekenwan? ?Olsem wanem nao yumi obei komanmen blong lavem ol neba blong yumi? Yumi lukaot blong winim tingting blong ol memba blong yumi se, olgeta we oli folem ol tijing mo ol aksen blong ol lesbien, ol gei, baeseksuol, o transjenda, bae yumi tritim olgeta wetem lav we Sevya i komandem yumi blong soem long evri neba blong yumi. Olsem ia nao, taem we oli talem se sem seks mared i folem loa long Yunaeted Stet, Fas Presidensi mo Kworom blong Olgeta Twelef Aposol i talemaot: “Gospel ia blong Jisas Kraes i stap tijim yumi blong lavem mo tritim evri pipol wetem kaen fasin mo wetem stret gud fasin—iven sapos yumi no agri. Mifala i talemaot se olgeta we oli wantem folem ol loa, o ol jajmen blong Kot we i givim raet long ol sem seks mared, bae yumi soem respek long olgeta tu.19
Mo tu, yumi no mas givim hadtaem long olgeta we oli no serem semfala bilif mo komitmen.20 Sore tumas, samfala pipol we oli stap fesem ol hadtaem ia oli gohed blong filim se oli sakem olgeta long saed, mo oli jes sakemaot olgeta nomo, mo tritmen ia i kam long ol memba, mo ol lida insaed long ol famli, wod mo stek. Yumi mas traehad blong stap kaen moa mo gat moa stret fasin.
IV.
From sam risen we yumi no andastanem, yumi gat ol defren jalenj long eksperiens long laef ia. Be yumi save se God bae i helpem wanwan long yumi blong winim olgeta jalenj ia sapos yumi tru blong askem help blong Hem. Afta long safaring mo sakem sin from yumi brekem ol loa we oli bin tijim yumi, yumi evriwan bae i kasem wan kingdom blong glori. Bigfala mo las jajmen, bae Lod i mekem, mo Hemwan nomo i gat save, waes, mo gladhat we i nid blong jajem wanwan long yumi.
Naoia i go, yumi mas traem blong obei tugeta hae komanmen. Blong mekem olsem, yumi wokbaot folem wan tintin laen bitwin loa mo lav—stap obei ol komanmen, mo wokbaot long kavenan rod ia, mo semtaem stap lavem ol neba blong yumi folem rod ia. Wokbaot ia, i askem yumi blong lukaotem insperesen we i kam long heven long saed blong wanem blong sapotem mo wanem blong agensem, mo hao blong lavem mo lisin, mo tij long semtaem i go. Wokbaot blong yumi i askem blong yumi no katemsot ol komanmen, be yumi soem we yumi andastanem mo lavem olgeta long ful mak blong olgeta. Yumi mas gat tingting tu long ol pikinini we oli talem se oli laekem wan we i sem seks, be yumi no mas givim nem ia long olgeta eli tumas, from se plante pikinini oli stap kamaot long ol kaen filing ia wetem taem.21 Wokbaot blong yumi i agensem fasin blong pusum man aot long kavenan rod ia, mo yumi no sapotem eniwan we i stap lidim ol pipol oli gowe long Lod. Long evri samting ia, yumi tingbaot se God i promesem hop mo bigbigfala glad mo blesing long evriwan we i stap obei ol komanmen blong Hem.
5.
Ol mama mo papa, mo yumi evriwan i responsibol blong tijim tufala hae komanmen ia. Long ol woman blong Jos, Presiden Spensa W. Kimbol i tokbaot diuti ia long impoten profesi ia: “Plante long ol bigfala samting we i stap kam long Jos long ol las dei, bae i kam from se plante long ol gudfala woman blong wol ia … bae oli kam joenem Jos long bigfala namba. Hemia bae i hapen kasem mak ia we ol woman blong Jos ia oli soemaot stret mo gud fasin, mo oli mekem gud mo stret samting long laef blong olgeta; mo kasem mak ia we ol woman blong Jos, bae oli luk olgeta se oli spesel mo ol defren … long ol woman we oli folem fasin blong wol. … From hemia, bae i kam we ol woman blong Jos we oli ol eksampol, bae oli wan strong paoa, long namba mo long spirit paoa blong Jos, long ol las dei ia.”22
Taem hem i tokbaot profesi ia, Presiden Russel M. Nelson i talemaot se “dei ia we Presiden Kimbol i bin luk finis, i tedei. !Yufala nao i ol woman ia we hem i bin luk finis!”23 Yumi, we yumi bin harem profesi ia 40 yia i pas, i no ting nating se, long medel blong olgeta we ol woman blong Jos ia bae oli sevem, bae oli ol gud fren mo famli blong yumi we samting blong wol ia mo ol devel tingting i stap lidim tingting blong ol. Prea mo blesing blong mi, i we, bae yufala i tijim mo tekem aksen blong mekem profesi ia i kamtru, long nem blong Jisas Kraes, amen.