Komitmen we I No Muvmuv long Jisas Kraes
God i stap invaetem yumi blong sakem fulwan ol olfala fasin blong yumi i go we yumi no save karembak, mo statem wan niu laef wetem Kraes.
Las Epril, mi gat spesel janis blong dediketem Kinsasa, Dimokratik Ripablik blong Kongo Tempol.1 Toktok i no save talem glad blong Ol Man Kongo mo mi, blong luk wan tempol we oli dediketem long ples blong olgeta.
Olgeta we oli go insaed long Kinsasa Tempol oli luk wan orijinol peinting, we oli singaotem Ol Kongo Wotafol.2 Long spesel wei, i mekem olgeta we oli go long tempol oli tingbaot komitmen ia we oli mas mekem blong angkarem olgetawan long Jisas Kraes mo blong folem kavenan rod ia blong plan blong Papa long Heven. Ol wotafol ia long peinting, i mekem man i tingbaot wan praktis we i bin stap hapen moa long wan handred yia bifo, long medel blong Ol Kristin man long Kongo.
Bifo oli jenisim laef blong olgeta, oli bin stap wosipim ol samting we i no muv, i no gat laef, mo biliv se ol samting ia oli gat bigfala strong paoa.3 Afta we oli jenisim laef, plante oli tekem rod i go long wan long ol wotafol folem Reva blong Kongo, olsem Nsongo Wotafol.4 Ol konvet ia oli sakem ol aedol samting blong olgeta insaed long wotafol, olsem wan saen long God mo ol narawan, we oli stap sakemaot ol olfala kastom, mo oli stap akseptem Jisas Kraes. Oli minim blong no sakem ol aedol blong olgeta long ol wota we oli no dip mo stap kwaet; oli bin sakem olgeta long wota we i tantanem mo i dip, long ples we oli no save go karem ol samting ia. Ol aksen ia, oli wan saen blong stat blong wan komitmen we i no muvmuv, long Jisas Kraes.
Ol pipol long ol nara ples mo taem, oli bin soem komitmen blong olgeta long Jisas Kraes long ol semmak wei.5 Pipol ia, long Buk blong Momon, we oli save olsem ol Antae-Nifae-Lihae “oli putum daon ol tul blong faet blong olgeta we oli yusum taem oli go agensem man,” oli berem olgeta “dip long graon” olsem “wan testemoni long God … se bae oli nomo yusum ol tul blong faet bakegen.”6 Taem oli bin mekem olsem, oli bin stap promes blong folem ol tijing blong God mo neva tingtingbak long komitmen ia blong olgeta. Komitmen ia, i stat blong “jenisim laef blong olgeta long Lod” mo neva foldaon bakegen.7
Blong “jenisim laef long Lod” i minim blong aot long wan rod blong aksen, we wan olfala bilif sistem i talem, mo tanem i go long wan niuwan we i stanap long fet long Papa long Heven, mo long Jisas Kraes mo Atonmen blong Hem. Jenis ia, i moa bitim blong akseptem wetem tingting, ol tijing ia blong gospel. I jenisim aedentiti, i tanem wei blong andastanem mining blong laef, mo i lidim yumi blong stap tru olwe long God. Ol samting we yumi wantem we oli agensem hemia blong fasin blong hang strong long Sevya mo folem kavenan rod ia, bae i go lus, mo strong tingting blong folem tingting blong Papa long Heven i tekem ples.
Taem yumi jenisim laef blong yumi i go long Lod, i stat wetem wan komitmen, we i no muvmuv, long God, mo afta, mekem komitmen ia i pat blong huia yumi. Blong tekem insaed long yumi, wan kaen komitmen olsem, i tekem ful laef mo i nidim fasin blong gat longfala tingting mo blong sakem sin. Long en, komitmen ia i kam pat blong huia yumi, we i fas gud long fasin blong yumi, mo i stap oltaem insaed long laef blong yumi. Be, semmak olsem we yumi neva fogetem nem blong yumiwan nomata wanem yumi stap tingting long hem, bae yumi neva fogetem wan komitmen we oli raetem gud long hat blong yumi.8
God i stap invaetem yumi blong sakem fulwan ol olfala fasin blong yumi i go, we yumi no save karembak, mo statem wan niu laef wetem Kraes. Hemia i hapen taem yumi stap developem fet long Sevya, we i stat taem yumi harem testemoni blong olgeta we oli gat fet.9 Mo afta, fet we i kam dip moa taem yumi tekem aksen long sam wei we yumi angkarem yumi moa strong long Hem.10
Maet bae i gud sapos, fet we i kam antap, yumi pasem olsem flu o kof. Nao, bae yumi snis long saed blong spirit blong bildimap fet blong ol nara man. Be i no wok olsem. Wan wei nomo we fet i gro, i blong wan i tekem aksen wetem fet. Ol aksen ia, plante taem oli kam tru long ol invitesen blong ol narawan, be yumi no save mekem fet blong wan narawan i “gro” o yumi no save dipen long ol narawan blong mekem fet blong yumi i gro. Blong fet blong yumi i gro, yumi mas jusum ol aksen we i bildimap fet, olsem blong stap prea, stadi long ol skripja, tekem mo kakae sakramen, obei ol komanmen, mo givim seves long ol narawan.
Taem fet long Jisas Kraes i stap gro, God i stap invaetem yumi blong mekem ol promes wetem hem. Ol kavenan ia, o promes olsem we yumi save, oli kamaot tru long jenis long laef blong yumi. Ol kavenan oli krietem wan sua fandesen blong progres long saed blong spirit. Taem yumi jusum blong kasem baptaes, yumi stat blong tekem, long yumiwan, nem blong Jisas Kraes,11 mo jusum blong karem aedentiti blong Hem. Yumi promes strong blong kam olsem Hem mo developem ol fasin blong Hem.
Ol kavenan blong yumi oli angkarem yumi long Sevya mo i pusum yumi folem rod ia we i go long hom blong yumi long heven. Paoa blong ol kavenan i helpem yumi blong holemtaet wan bigfala jenis long hat, tanem laef blong yumi i bigwan moa long Lod, mo gat pikja blong Kraes moa fulwan long fes blong yumi.12 Be ol hafhaf komitmen long ol kavenan, bae i no meksua se bae yumi gat eni samting.13 Bae yumi gat temtesen blong kam slak, sakem ol olfala fasin blong yumi long kwaet wota; o berem ol tul blong faet blong yumi wetem handel i kamaot. Be wan sapos yumi no komitim yumi fulwan long ol kavenan ia, hemia bae i no openem doa blong paoa blong Papa long Heven mo Jisas Kraes i mekem yu kam tabu.
Komitmen blong yumi, blong kipim ol kavenan blong yumi, i no mas dipen o jenis folem situesen blong yumi long laef. Hamas yumi tru long God i mas olsem Kongo Reva ia we i stap ron kolosap long Kinsasa Tempol. Reva ia, i no olsem ol nara reva long wol, i ron semmak ful yia,14 i stap sakem 11 milian galon wota long wan seken i go long Atlantik solwota.
Sevya i bin invaetem ol disaepol blong Hem, blong man i save dipen long olgeta, mo oli no muvmuv. Hem i talem: “From hemia, putum gud hemia long hat blong yufala, se bae yufala i mekem ol samting we bae mi tijim, mo givim komanmen long yufala blong mekem.”15 Taem yumi “putum gud” tingting blong yumi blong kipim ol kavenan blong yumi, i openem rod blong God i mekem evri promes blong Hem blong yumi save gat wan glad we i stap oltaem.16
Plante long ol fetful Lata-dei Sent oli bin soem se oli putum gud tingting blong olgeta taem oli kipim kavenan blong olgeta wetem God, mo oli jenis blong oltaem. Bae mi tokbaot tri kaen pipol olsem—Brata Banza Mucioko, Sista Banza Regine, mo Brata Mbuyi Nkitabungi.
Long 1977, Banza famli i stap long Kinsasa long kantri ia, Sahir, we tedei i Dimokratik Ripablik blong Kongo. Oli ol pipol we oli respektem olgeta insaed long Protestan jos komuniti. From talen blong olgeta, jos blong olgeta i mekem rod blong yang famli i go kasem Switselan blong stadi mo oli kasem wan yunivesiti skolasip.
Taem oli bin stap long Jeniva, long bas blong olgeta we i go long skul, Brata Banza i luk wan smol jos mitinghaos wetem nem ia: “Jos Ia blong Jisas Kraes blong Ol Lata-dei Sent.” Hem i stap askem hemwan: “?Jisas Kraes i gat Ol Sent naoia, long ol las dei ia?” Long en, hem i bin disaed blong go mo luk.
Oli welkamem Brata mo Sista Banza long branj. Tufala Banza i askem ol bigfala kwestin we tufala i gat abaot God, olsem “Sapos God i wan spirit, olsem win, ?hao nao oli krietem yumi i olsem Hem? ?Hao nao Hem i save sidaon antap long jea blong king?” Tufala Banza i neva kasem wan gud ansa kasem taem we ol misinari oli eksplenem doktrin we i bin kambak, long wan sot lesen. Taem tufala misinari i go, tufala Banza i lukluk tufala mo talem: “?Be i no trutok ia we yumitu jes harem?” Tufala i bin gohed blong kam long Jos mo mitim ol misinari. Tufala i bin save se sapos tufala i baptaes long Jos Ia blong Jisas Kraes, we i kambak, bae i gat samting i kam biaen. Bae oli lusum skolasip blong tufala, nomo gat visa, mo tufala wetem ol tufala smol pikinini, bae oli mas aot long Switselan. Oli bin jusum blong kasem baptaes mo konfemesen long Oktoba 1979.
Tu wik afta long baptaes blong tufala, Brata mo Sista Banza i gobak long Kinsasa olsem fas mo seken memba blong Jos insaed long kantri blong tufala. Ol memba blong Jeniva Branj oli stap gat kontak wetem tufala mo helpem tufala blong kasem ol lida blong Jos. Oli bin leftemap tingting blong tufala blong stap fetful mo wet long promes taem ia, taem we God bae i stanemap Jos blong Hem long Sahir.
Long sem taem ia, wan nara studen blong Sahir, Brata Mbuyi i bin stap stadi long Beljiom. Hem i bin baptaes long 1980, long Brasel Wod. I no longtaem afta, hem i bin go long wan fultaem misin long Inglan. Mo God i wokem ol merikel blong Hem. Brata Mbuyi i gobak long Sahir olsem nambatri memba blong Jos long kantri blong hem. Wetem raet blong papa mo mama blong hem, oli bin holem ol miting blong Jos insaed long famli hom blong hem. Long Febwari 1986, oli saenem wan petisen blong gavman i mas luksave Jos. I nidim signeja blong trifala sitisen blong Sahir. Trifala hapi man blong saenem petisen i, Brata Banza, Sista Banza, mo Brata Mbuyi.
Ol strongfala memba ia oli bin save trutok taem oli bin harem; oli bin mekem wan kavenan long baptaes we i bin angkarem olgeta long Sevya. Be long wan simbol wei, oli bin sakem ol olfala wei blong olgeta long wan strong wotafol, mo no gat tingting blong go karembak olgeta. Kavenan rod ia, i neva bin isi. Trabol blong politik, smol kontak wetem ol lida blong Jos, mo ol jalenj we i kam blong bildimap wan komuniti blong Ol Sent, bae i save daonem tingting blong sam we oli no komitim olgeta. Be, Brata mo Sista Banza, mo Brata Mbuyi, oli bin stap strong long bilif blong olgeta. Oli bin stap long dedikesen blong Kinsasa Tempol, 33 yia afta we oli bin saenem petisen ia we i mekem se gavman i luksave Jos long Sahir.
Tufala Banza i stap ia long Konfrens Senta tedei. Tufala i kam wetem tufala boe blong tufala, Junia mo Phil, mo ol aeneli blong tufala, Annie mo Youyou. Long 1 Jun 1986, Junia mo Phil Banza, tufala i bin faswan blong baptaes insaed long Jos long Sahir. Brata Mbuyi i bin stap long Kinsasa mo luk wanem i bin stap hapen wetem waef blong hem, Maguy mo ol faevfala pikinini blong tufala.
Olgeta paeonia ia, oli bin andastanem mining blong ol kavenan we, tru long olgeta, oli bin kam long “save ia long Lod, God blong olgeta, mo blong oli glad long Jisas Kraes, Ridima blong olgeta.”17
?Hao yumi angkarem yumi long Sevya mo gohed blong stap fetful olsem olgeta ia mo plante ten blong ol taosen blong Kongo Sent we oli bin folem olgeta mo ol milian moa raon long wol? Sevya i tijim yumi olsem wanem. Evri wik, yumi tekem mo kakae sakramen blong tingbaot mo mekem wan kavenan wetem Papa blong yumi long Heven. Yumi joenem aedentiti blong yumi wetem hemia blong Sevya, taem yumi mekem strong promes blong stap glad blong tekem nem blong Hem long yumi, oltaem tingbaot Hem, mo obei ol komanmen blong Hem.18 Taem we, wetem tingting, yumi stap rere mo stap klin inaf blong mekem olgeta kavenan ia, evri wik, i mekem yumi angka i strong long Sevya i helpem yumi blong tekem komitmen ia insaed long yumi,19 mo pusum yumi wetem paoa folem kavenan rod ia.
Mi stap invaetem yufala blong komitim yufala blong kam wan disaepol long ful laef taem blong yufala. Mekem mo kipim ol kavenan Sakemaot ol olfala fasin blong yu long wota we i dip mo i stap tantanem. Berem fulwan ol tul blong faet blong stap agens mo no letem handel blong hem i kamaot. From Atonmen blong Jisas Kraes, blong mekem ol kavenan wetem tru tingting blong folem olgeta, bae i jenisim laef blong yu blong oltaem. Bae yu kam moa olsem Sevya taem yu oltaem tingbaot Hem, folem Hem, mo lavem Hem. Mi testifae se Hem i strong fandesen. Yumi save dipen long Hem, mo promes blong Hem i tru. Long nem blong Jisas Kraes, amen.