Givim Ona long Nem blong Hem

Olsem wan mama mo papa i glad tumas blong wet long taem we wan bebi i bon, olgeta i gat responsabiliti ia blong jusum wan nem blong bebi ia we i jes stap bon. Ating taem yu bon, yu bin kasem wan nem we oli stap pasem i kam daon long famli blong yu blong plante jeneresen. O ating nem we oli givim long yu hem i wan nem we fulap long ol man oli stap yusum long yia ia o long eria we yu bon long hem.

Profet Hileman mo waef blong hem i givim ol famli nem we i gat mining long ol pikinini boe blong tufala, Nifae mo Lihae. Afta, Hileman i talem long ol pikinini boe blong hem

“Mi bin givim long yutufala ol nem blong ol fasfala papa blong yumi … taem we yutufala i tingbaot ol nem blong tufala, yutufala i save tingbaot tufala; mo taem we yutufala i tingbaot tufala, yutufala i save tingbaot ol wok blong tufala;… yutufala i save tingbaot we oli bin talem, mo tu, oli bin raetem, se oli bin gud.

“From hemia, ol boe blong mi, mi wantem se yutufala i mekem samting we i gud.”¹

Nem blong Nifae mo Lihae i helpem tufala i tingbaot ol gudfala wok we bubu blong tufala i mekem mo i leftemap tingting blong tufala blong mekem gud tu.

Ol sista, i nomata weaples yumi stap long hem, wanem lanwis yumi toktok, o sapos yumi gat 8 yia o 108 yia, yumi serem wan spesel nem we i gat ol semmak stamba tingting ia.

“Yufala evriwan we i baptaes finis blong joen long Kraes, yufala i tekem Kraes finis … : from samting ia [yumi] kam wan nomo long Kraes Jisas ”²

Olsem ol memba blong Jos Ia blong Jisas Kraes blong Ol Lata Dei Sent, “faswan yumi promes se bae yumi rere gud blong tekem long yumi nem blong Jisas Kraes, tru long odinens blong baptaes.”³ Tru long kavenan ia, yumi promes blong oltaem tingbaot Hem, kipim olgeta komanmen blong Hem mo givim seves long ol narawan. Blong wantem blong kipim kavenan ia i riniu evri Sabat dei taem yumi tekempat long sakramen mo stap glad bakegen long ol blesing blong wokbaot long niufala laef ia.”⁴

Nem we oli givim long taem we yumi bon i ripresentem wanwan aedentiti blong yumi mo i givim long yumi se yu gat wan famli i stap long wol ia. Be, taem yumi “bon bakegen” long taem blong baptaes blong yumi, save ia long huia yumi i kam bigwan. “Mo nao, from kavenan ia we yufala i bin mekem, bae oli singaotem yufala ol pikinini blong Kraes, … from luk,… hem i bin bonem yufala i kam long saed blong spirit; from yufala i talem se hat blong yufala i bin jenis tru long fet we yufala i gat long nem blong hem; from hemia, yufala i bon long hem.”⁵

From hemia, wetem kavenan aedentiti mo wea ples yumi stap long hem, oli singaotem yumi tru long nem blong Jisas Kraes. Mo “bae i no gat wan narafala nem we bae oli givim, o wan narafala wei, o fasin we fasin blong sevem man i save kam long ol pikinini blong ol man, tru mo long nem blong Kraes nomo, Lod ia we I Gat Ol Paoa.”⁶

Nem blong Jisas oli bin save bifo Hem i bon. I go long King Benjamin, wan enjel i profesae se,”Mo bae oli singaotem hem Jisas Kraes, Pikinini blong God, … mo mama blong hem bae oli singaotem hem, Meri.⁷ Wok blong Hem blong “lav blong pemaot man”⁸ we oli mekem ol pikinini blong God i save long taem we gospel i stap long wol ia, long dei blong Adam mo Iv go kasem dei blong yumi tedei, blong mekem se oli save “long wanem ples oli save lukluk long hem blong kam klin aot long ol sin blong olgeta.”⁹

Las yia Presiden Russell M. Nelson i mekem wan “singaot blong profet” i go long ol sista blong oli “mekem wan gud fiuja taem yufala i help blong karem tugeta Isrel ia we i serseraot.” Hem i invaetem yumi blong ridim Buk blong Momon mo “makem wanwan ves ia we i talem nem o i tokbaot Sevya.” Hem i askem se bae, “wetem tru tingting blong tokbaot Kraes, glad long Kraes mo prij abaot Kraes wetem ol famli mo fren blong [yumi].” Ating bae yu kam blong luksave ol blesing blong promes blong hem se “bambae yufala i kam kolosap moa long Sevya … mo ol jenis ia, iven ol merikel, bae oli stat blong hapen.” Mo ol jenis, iven ol merikel, bae oli stat blong hapen.¹⁰

Promes blong yumi i blong “oltaem tingbaot Sevya we i givim moa paoa long yumi blong stanap long trutok mo fasin blong stap stret mo gud—i no mata sapos yumi stap long wan ples we i gat fulap man long hem o ol ples blong yumi we stap nating, we i nogat man i save ol aksen blong yumi be God nomo i save. Taem yumi tingbaot Hem mo nem blong Hem we yumi tekem, yumi nogat wan ples we blong stap sem long ol samting o blong ting hae long yuwan. Wetem wan ae we i lukluk nomo i go long Sevya, yumi luk yumiwan long huia nao yumi stret— wan pikinini we God i lavem.

Blong tekem aksen blong tingbaot kavenan blong yumi i mekem ol wari blong wol ia i kwaet, i tanem ol tu tingting long yuwan i go blong gat strong tingting, mo i givim hop long ol taem we i had.

Mo taem yumi ol mekem mistek long progres blong rod blong kavenan blong yumi, yumi nid blong tingbaot nomo nem blong Hem mo fasin blong Hem stap kaen wetem lav we i kam long yumi. “From hem i gat evri paoa, evri waes tingting, mo evri haremsave; hem i haremsave evri samting, mo hem i wan Man we i gat sore, … oli sakem sin mo biliv long nem blong hem.¹¹ Be i no gat nem we i mo gud long nem blong Jisas long olgeta evriwan, we i gat wan hat blong sore mo wan spirit we i stap daon, blong lukaotem blong “mekem i gud mo i kam gud moa.”¹²

Presiden Nelson i tijim: “Dei i pas taem yu save stap kwaet mo stap olsem wan gudfala Kristian. Relijin blong yu i no blong jes kamkamaot long Jos long Sandei. Be hem i blong kamkamaot olsem wan tru disaepol long Sandei moning go kasem Satedei naet. … I nogat wan samting olsem pat-taem disaepol blong Lod Jisas Kraes.”¹³

Blong wantem, blong tekem long yumiwan nem blong Kraes hem i moa long wan wei blong talem ol toktok ia. Hem i no wan promes o wan kalja we i no tru. Hem i no wan seremoni o wan nem tag we yumi werem. Hem i no wan toktok we yumi putum nomo long sef o hangem long wol blong haos. Hem i wan nem we oli “putum,”¹⁴ raetem long hat blong yumi, mo “i stap long fes blong [yumi].¹⁵

Oltaem oli mas tingbaot sakrifaes we Sevya i pemaot praes blong sin, tru long tingting blong yumi, ol aksen, mo wetem olgeta we oli stap raon long yumi. Hem i no tingbaot nomo nem blong yumi, be Hem i tingbaot yumi oltaem. Sevya i talem:

“From ?I posibol blong wan woman i save fogetem pikinini blong hem we hem i stap givim titi long hem? ?I posibol blong hem i no save gat sore long boe we i kamaot long bel blong hem? Yes, oli save fogetem, be stil, bae mi no fogetem yu, O laen blong Isrel.

“Luk, mi bin raetem yu long skin blong insaed han blong ol han blong mi.”¹⁶

Presiden George Albert Smith i bin tijim, “Givim ona long nem we yu karem, from se wan dei bae yu gat janis mo responsabiliti ia blong ripotem … long Papa blong yu long Heven … long wanem yu mekem long [olgeta] nem ia.”¹⁷

Olsem ol nem we oli jusum gud blong Nifae mo Lihae, we oli save talem mo raetem long yumi ?se yumi ol tru disaepol blong Lod Jisas Kraes? ?Yumi givim ona long nem blong Jisas Kraes se bae yumi wantem blong tekem long yumi? ?Yumi “wan minista mo wan witnes”¹⁸ blong lav blong Hem we i kaen mo paoa blong Hem blong sevem yumi?

I no long taem i pas, mi stap lisin long Buk blong Momon Long las japta blong 2 Nifae, mi harem Nifae i talem wan samting we bae mi neva ridim long sem wei ia bifo. Long ful rekod blong hem, hem i tijim mo testifae long Ridima,” Tabu wan blong Isrel,” “Smol sipsip blong God,” mo “Mesaea.” Be taem hem i klosem storian blong hem, mi harem hem i talem ol toktok ia: “Mi glad long klia fasin, mi glad long trutok, mi glad long Jisas blong mi, from hem i pemaot sol blong mi ”¹⁹ Taem mi harem olgeta toktok ia, hat blong mi i glad mo mi stap lisin long hem bakegen mo bakegen. Mi luksave mo ansa long ves ia olsem we mi jes luksave mo ansa long nem blong mi.

Lod i bin talem “Yes, mi mi blesem ol pipol ia we oli glad blong tekem nem blong mi; from long nem blong mi bae oli singaotem olgeta, mo oli blong mi.”²⁰

Olsem ol memba blong Jos Ia blong Jisas Kraes blong ol Lata-dei Sent, bae yumi “wetem glad tekem long yumi] nem blong Kraes”²¹ taem yumi givim ona long Nem blong Hem wetem lav,divosen, mo ol gudfala wok. Mi testifae se Hem i “Smol Sipsip blong God, yes, hem i Pikinini blong Papa we I No Save Finis²² Long nem blong Jisas Kraes, amen.