Afta long Tes blong Fet blong Yumi
Taem yumi folem voes blong God mo ol kavenan rod blong Hem, bae Hem i mekem yumi strong long ol tes blong yumi.
Taem mi wan smol pikinini, wan memba blong Jos i bin glad blong karem famli blong mifala long praevet plen blong hem long Pueto Riko i go long Sol Lek Siti blong mekem se mifala i save sil long tempol, be hariap nomo, ol hadtaem oli stat blong kam. Wan long ol sista blong mi, Marivid i bin sik. Wetem wari, papa mo mama i prea abaot wanem blong mekem be tufala i filim se oli mas go. Oli bin trastem se taem oli fetful blong folem smol kwaet voes blong Lod, bae Lod i tekem kea mo blesem—mo yumi tu.
No mata long ol fasfas samting we yumi fesem long laef, yumi save trastem se Jisas Kraes bae i rere long wan wei blong taem yumi wokbaot wetem fet. God i bin promesem se evriwan we oli laef folem kavenan rod we oli bin mekem wetem Hem, bae oli kasem folem taem blong Hem, evri promes blesing blong Hem. Elda Jeffrey R. Holland i talem: “Samfala blesing oli kam hariap, sam oli kam let, mo sam oli no kam kasem taem yumi go long heven, be long olgeta we oli akseptem gospel blong Jisas Kraes, ol blesing ia oli kam.1
Moronae i se “fet i ol samting we yumi gat hop from mo yumi no luk; taswe, yufala i no rao from se yufala i no luk, from yufala i no kasem eni witnes kasem afta nomo long tes blong fet blong yufala.”2
Kwestin blong yumi i olsem: “?Wanem yumi sapos blong mekem blong fesem ol tes we oli stap kam long rod blong yumi?”
Long fas pablik toktok blong hem olsem Presiden blong Jos, Presiden Russel M. Nelson i tijim: “Olsem wan niu Presidensi mifala i wantem blong stat wetem en long maen. From risen ia, mifala i stap long wan tempol mo stap toktok long yufala tedei. En, we wanwan long yumi i stap traehad from, i blong oli kavremap yumi wetem paoa insaed long wan haos blong Lod, blong yumi sil olsem ol famli, blong yumi stap fetful long ol kavenan we yumi mekem insaed long tempol; ol kavenan ia oli mekem yumi kwalifae from presen ia we i moa bigwan we i kam long God—we i laef we i no save finis. Ol odinens blong tempol mo ol kavenan we yufala i mekem insaed ia, oli ki blong mekem laef, mared, mo famli i gat moa paoa, mo oli ki blong mekem se yu gat paoa blong stanap fesem mo no foldaon long ol agens blong enemi. Wosip blong yufala insaed long tempol mo seves blong yufala long ples ia blong ol bubu blong yufala, bambae oli blesem yufala long wei ia we bae yufala i kasem moa revelesen blong yufalawan, bae yufala i kasem moa pis, mo bae i mekem yufala i moa strong blong wok blong stap long rod ia blong kavenan.”3
Taem yumi folem voes blong God mo ol kavenan rod blong Hem, bea Hem i mekem yumi strong long ol tes blong yumi.
Famli trip blong mi blong go long tempol plante yia i pas finis i bin had, be taem mifala i stap kam kolosap long Sol Let Tempol, mama blong mi we i fulap long fet, i talem, “Bae yumi Okei; Lod bae i protektem yumi.” Mifala i bin sil, mo sista blong mi i bin kam oraet. Hemia i hapen nomo afta long tes blong fet blong papa mo mama blong mi i bin folem ol smol voes blong Lod.
Eksampol blong mama mo papa blong mi i lidim ol tingting blong famli blong mifala tedei. Eksampol blong olgeta oli tijim mifala from wanem” blong gospel doktrin mo i helpem mifala blong andastanem mining, stamba tingting, mo ol blesing we gospel i karem. Blong save “From Wanem” blong gospel blong Jisas Kraes, i save help yumi fesem ol tes blong yumi wetem fet.
Long en, evri we God i invaetem mo askem yumi blong mekem i wan wei blong soem lav blong Hem blong yumi mo tingting blong Hem blong givim long yumi evri blesing i stap blong ol fetful. Yumi no save stap tingting se ol pikinini blong yumi bae oli lanem blong lavem gospel olgetawan; hem responsabiliti blong yumi blong tijim olgeta. Taem yumi helpem ol pikinini lanem olsem wanem blong yusum ol waes joes, eksampol blong yumi i save helpem olgeta blong mekem ol stret joes blong olgetawan. Ol fetful fasin blong laef bae wan dei i helpem ol pikinini blong olgeta blong save trutok blong gospel blong olgetawan.
Ol yang man mo ol yang woman. Lisin long profet we i toktok long yufala tedei. Lukaotem blong lanem ol tabu trutok mo lukaotem blong andastanem gospel blong yufalawan. Presiden Nelson i kaonsel i no longtaem i pas: “?Wanem waes nao yu no gat?… Folem eksampol blong Profet Josef. Faenem wan kwaet ples. … Putum tingting blong yu i stap daon long fes blong God. Talemaot hat blong yu long Papa blong yu long Heven. Tanem yu i go long Hem blong kasem ansa.”4 Taem yu stap lukaotem help we bae i kam long Papa long Heven blong yu we i gat lav, taem yu stap lisin long kaonsel blong ol profet we i laef, mo taem yu stap lukluk gud eksampol blong stret mo gud papa mo mama, yu tu, yu save kam wan strong joen blong fet insaed long famli blong yu.
Long ol papa mo mama wetem ol pikinini we oli kamaot long rod blong kavenan, long kwaet fasin, yufala i gobak. Helpem olgeta blong andastanem ol trutok blong gospel. Stat naoia; hem i neva let tumas.
Eksampol blong yumi blong laef folem stret fasin i save mekem wan bigfala samting i defren. Presiden Russel M. Nelson i talem: “Olsem Ol Lata‑dei Sent, yumi kam blong stap tingting se, ‘jos,’ i wan samting we i hapen insaed long mitinghaos blong yumi, wetem sapot blong wanem i stap hapen insaed long hom. Yumi nidim blong stretem kaen fasin ia. Hem i taem blong i gat wan Jos we senta blong hem i stap long hom, mo sapot i kam long wanem i tekem ples insaed long ol branj, wod, mo stek bilding blong yumi.”5
Ol skripja oli tijim: “[Tijim pikinini long rod blong hem i folem: mo taem bae i kam bigwan, bae hem i no save aot long rod ia.]”6
Oli talem tu: “Mo nao, from we trutok we oli prijim i lidim ol man blong mekem wanem we hem i stret—yes, hem i gat moa bigfala paoa long tingting blong ol pipol bitim naef blong faet, o eni narafala samting, we i bin hapen finis long olgeta—from hemia, Alma i ting se i gat nid se oli mas traem paoa blong toktok blong God.”7
I gat wan stori blong wan woman we hem i no glad se boe blong hem i stat kakae tumas loli Nomata hamas taem hem i talem long hem blong i stop, hem i gohed blong mekem gud ol swit tut blong hem. Hem i no glad fulwan, hem i disaed blong tekem boe blong hem blong luk wan waes man we hem i respektem.
Hem i go luk bigfala man ia mo talem, “Bigman, boe blong mi i kakae tumas loli. ?Bae yu plis talem long hem blong stop kakae?”
Waes man ia i lisin long woman ia mo i tanem hem wetem kea mo talem long boe blong hem: “Gohom mo kambak long tu (2) wik taem.”
Woman ia i tekem boe blong hem, mo gobak hom, i konfius from wanem hem i no askem boe blong stopem blong kakae loli.
Tu wik afta, hem i gobak wetem boe ia. Waes man ia i lukluk stret long boe ia mo talem, “Boe, yu sut stop blong kakae loli. Hem i no gud blong helt blong yu.”
Boe ia i talem yes mo promes se bae hem i nomo mekem fasin ia.
Mama blong boe ia askem, “?From wanem yu no bin talem hemia long hem tu wik i pas taem?”
Waes man ia smael. “Tu wik i pas, mi bin stap kakae loli yet miwan.”
Man ia stap laef wetem plante fasin blong stap ones we i mekem se hem i no save letem hemwan blong givim advaes kasem taem we hemwan i stap laef folem.
Jenis ia we yumi gat long pikinini blong yumi i gat moa paoa taem oli luk yumi long rod blong kavenan. Olsem profet blong Buk blong Momon, Jekob i wan eksampol blong kaen stret fasin ia. Boe blong hem Inos i raetem abaot ol tijing blong papa blong hem:
Mi, Inos, mi save se papa blong mi i bin wan stret man—from hem i bin tijim mi long lanwis blong hem, mo tu, long ol fasin we Lod —mo mi blesem nem blong God blong mi from samting ia. …
“…Mo ol toktok we mi bin harem plante taem we papa blong mi i talem long saed blong laef we i no save finis, mo glad blong ol sent, i bin go draon dip long hat blong mi.”8
Ol mama blong ol yang boe blong Hileman oli bin laef folem gospel mo ol pikinini blong olgeta oli bin singaot wetem strong tingting. Kapten blong olgeta i ripotem:
“… ol mama blong olgeta oli bin tijim olgeta, se sapos oli no gat tu tingting, oli strong fulwan, nao God bae i sevem olgeta.
“Mo oli talemaot long mi ol toktok blong ol mama blong olgeta, oli talem: ‘Mifala i no gat tu tingting, mifala i save fulwan se ol mama blong mifala oli bin save.”9
Inos mo ol man blong yangfala man faet oli kam strong tru long fet blong ol papa mo mama blong olgeta, we i helpem olgeta mitim ol tes blong fet blong olgetawan.
Yumi gat blesing blong gospel blong Jisas Kraes we i kambak blong ol dei blong yumi, taem yumi filim tingting i foldaon o trabol. Yumi save luk plante witnes se bae oli traehad blong yumi blong laef stret bae i karem frut folem taem blong Lod, afta long tes blong fet blong yumi.
Long manis blong Septemba, waef blong mi mi i bin folem Elda David A. Bednar i go long dedikesen blong Poto Prins Tempol. Boe blong mitufala Jos i kam wetem mitufala mo i sendem wan teks long mi abaot eksperiens blong hem: “!I naes tumas, Papa! I no long taem, taem Elda Bedna i statem wetem prea blong dedikesen, mi save filim se rum i wom mo i fulap long laet. Prea ia i ademap plante long lukluk blong mi long stamba tingting blong tempol. Tempol hem i haos blong Lod.
Insaed long Buk blong Momon, Nifae i tijim se taem yumi wantem blong save tingting blong God, Bae Hem yumi kam strong. Hem i raetem, “Mo i bin hapen se mi Nifae, from mi yang tumas, be bodi blong mi i strong mo i bigfala, mo tu, mi gat strong tingting tumas blong save ol sikret blong God, taswe, mi prea long Lod; mo luk hem i visitim mi, mo i mekem hat blong mi i kam sofsof, mekem se mi bilivim evri toktok we papa blong mi i talemaot; taswe, mi no go agensem hem semmak olsem ol brata blong mi.”10
Ol brata mo sista, letem yumi helpem ol pikinini blong yumi mo evriwan raon long yumi blong folem rod blong kavenan blong God blong mekem se Spirit i save tijim olgeta mo mekem ol hat blong olgeta i sofsof blong oli wantem blong folem Hem truaot long laef blong olgeta.
Taem mi stap tingting long sakrifaes mo eksampol blong papa mi luk save se fet blong yumi long Lod Jisas Kraes bae i soem long yumi wei we bae i tekem yumi i gobak hom blong yumi long Heven. . Mi bin luk merikel afta long tes blong fet blong mifala.
Mi talem testemoni blong mi long sad blong Jisas Kraes mo sakrifaes blong Hem we i pem praes from ol sin blong man. Mi save Hem i Sevya blong yumi mo Man blong mekem yumi go fri. Hem mo Papa long Heven i bin kam long spring moning ia blong 1820, long Josef Smit, profet blong Restoresen. Presiden Russel M. Nelson i profet blong dei blong yumi Long nem blong Jisas Kraes, amen.