Stap Lan Aot long Ol Jeneral Konfrens Mesej

Olgeta tijing blong ol profet we oli stap laef mo ol nara jeneral lida blong Jos oli lidim yumi wetem insperesen taem yumi stap tekpat long wok blong Lod. Long nambatu mo nambafo Sandei blong wanwan manis, ol presidensi blong kworom mo Rilif Sosaeti oli jusum wan mesej blong konfrens blong toktok raon long hem, hemia folem ol nid blong ol memba mo folem Spirit we i stap lidim olgeta. Samtaem, bae bisop o stek presiden bae i save jusum wan mesej. Plante taem, ol lida oli mas tokbaot bigwan ol mesej we oli kam long ol memba blong Fas Presidensi mo Kworom blong Olgeta Twelef Aposol. Be, oli save toktok raon long eni mesej we i kamaot long jeneral konfrens we i jes pas.

Ol lida mo ol tija oli mas faenem ol wei blong leftemap tingting blong ol memba blong ridim ol mesej we oli jusum, bifo taem blong klas.

Blong gat moa infomesen abaot ol miting blong kworom blong ol elda, mo ol Rilif Sosaeti, luk long Hanbuk 2: Lukaotem mo Lidim Jos, 7.8.1, 9.4.1, ChurchofJesusChrist.org.

Mekem Plan blong Tij

Olgeta kwestin ia oli save helpem ol tija taem oli stap mekem plan blong yusum wan mesej blong jeneral konfrens blong tij wetem.

?Wanem nao spika ia i wantem yumi blong andastanem? ?Wanem prinsipol blong gospel nao spika ia i stap tijim? ?Olsem wanem nao hemia i go wetem kworom o Rilif Sosaeti blong yumi?
?Wanem skripja nao spika ia i stap yusum blong sapotem mesej blong hem? ?I gat eni nara skripja we yumi save ridim we i save mekem andastaning, o save blong yumi i go dip o bigwan moa? (Bae yu save faenem sam insaed long not long en blong mesej, o insaed long Topik Gaed.)
?Wanem kwestin nao mi save askem we bae i save helpem ol memba blong tingting hevi moa long mesej ia? ?Wanem kwestin nao bae i helpem olgeta blong luk olsem wanem mesej ia i stret long laef blong olgeta, insaed long famli blong olgeta, mo insaed long wok blong Lod?
?Wanem moa bae mi save mekem blong invaetem Spirit i kam insaed long ol miting blong yumi? ?Wanem nao mi save yusum blong mekem toktok insaed long klas i kam antap moa, olsem ol stori, ol analoji, ol miusik mo pikja? ?Wanem nao spika i yusum?
?Spika i givim eni invitesen blong yumi mekem? ?Olsem wanem nao bae mi helpem ol memba blong filim se oli wantem blong tekem aksen folem ol invitesen ia?

Sam Aktiviti Aedia

I gat fulap wei blong helpem ol memba blong oli lanem samting aot long ol mesej blong jeneral konfrens. Hemia samfala eksampol; maet yu gat sam nara aedia we bae i wok gud moa long kworom o Rilif Sosaeti blong yu.

Mekem ol grup mo toktok raon. Serem ol memba oli go long ol grup, mo givim wanwan defren pat blong mesej blong konfrens blong oli ridim mo toktok raon long hem. Afta, askem wanwan grup blong serem wan trutok we oli bin lanem. O yu save mekem ol grup wetem ol pipol we oli bin stadi long ol defren seksen, mo letem olgeta oli serem wanem oli bin lanem wetem ol narawan.
Ansarem ol kwestin Invaetem ol memba blong ansarem ol kwestin olsem olgeta kwestin ia abaot mesej blong konfrens: ?Wanem trutok blong gospel nao yumi faenem insaed long mesej ia? ?Olsem wanem nao yumi save praktisim ol trutok ia? ?Wanem invitesen nao, mo wanem blesing nao oli promesem? ?Wanem nao mesej ia i stap tijim yumi abaot wok we God i wantem yumi blong mekem?
Serem sam toktok blong konfrens. Invaetem ol memba blong oli serem ol toktok we oli bin kamaot long ol mesej blong konfrens we i bin givim insperesen long olgeta blong mekem ol responsabiliti blong olgeta insaed long wok ia blong fasin blong sevem man. Leftemap tingting blong olgeta blong tingting long hao nao oli save serem ol toktok ia blong blesem wan, we i tekem tu olgeta we oli lavem olgeta, mo ol pipol we oli stap givhan long olgeta.
Serem wan lesen we oli yusum samting long hem. Longtaem bifo klas, invaetem samfala memba blong oli tekem sam samting long hom we oli save yusum blong tij abaot mesej blong konfrens. Long taem blong miting ia, askem ol memba blong eksplenem hao nao ol samting ia i go wetem mesej ia.
Stap rere wan lesen blong tij long hom. Askem ol memba blong wok tutu blong mekem plan blong wan famli haos naet folem wan mesej blong konfrens. ?Olsem wanem nao yumi mekem mesej ia i kamaot klia long famli blong yumi? ?Olsem wanem yumi save serem mesej ia wetem ol pipol we yumi stap givhan long olgeta?
Serem sam eksperiens. Ridim tugeta samfala toktok we i kamaot long mesej blong konfrens. Askem ol memba blong serem ol eksampol we oli kamaot long ol skripja, mo long laef blong olgeta, we i soem gud, o i sapotem strong doktrin ia we oli tijim insaed long ol toktok ia.
Lanem samting abaot wan skripja. Invaetem ol memba blong ridim wan skripja we oli putum refrens blong hem insaed long wan mesej blong konfrens. Askem olgeta blong toktok raon long hao ol tijing insaed long mesej ia i helpem olgeta blong andastanem skripja i gud moa.
Faenem wan ansa. Bifo taem, krietem sam kwestin we oli save ansa wetem mesej blong konfrens. Lukluk moa long ol kwestin we i mekem memba blong klas i tingting dip moa o i praktisim moa ol prinsipol blong gospel (luk long Teaching in the Savior’s Way, 31–32). Afta, letem ol memba blong oli jusum wan kwestin mo faenem ol ansa insaed long mesej. Invaetem olgeta blong toktok raon long ol ansa blong olgeta long ol smol grup.
Faenem wan sentens. Invaetem ol memba blong luklukgud insaed long mesej blong konfrens blong lukaotem ol sentens o toktok we oli gat mining long olgeta. Askem olgeta blong serem ol sentens ia, mo wanem oli lanem aot long olgeta. ?Olsem wanem nao ol tijing ia oli helpem yumi blong mekem wok blong Lod?
Krietem wan samting. Invaetem ol memba blong mekem wan posta, o wan bukmak we oli raetem sot insperesen toktok ia we i kamaot long mesej blong konfrens. Givim janis long olgeta blong oli serem wanem oli bin mekem.