Ol Jenis long Ol Oganaesesen Oli Lukluk Nomo blong Mekem Ol Yut Oli Kam Strong Moa
Olsem pat blong hadwok blong mekem ol yut blong Jos oli gat moa paoa blong kasem ol tabu paoa we oli save gat, oli bin anaonsem ol jenis ia insaed long ol oganaesesen blong Ol Yang Man mo Ol Yang Woman long Oktoba 2019 Jeneral Konfrens; Presiden Russel M. Nelson nao i mekem ol anaonsmen ia (luk long pej 38) mo Elda Quentin L. Cook blong Kworom blong Olgeta Twelef Aposol (luk long pej 40) mo Sista Bonnie H. Cordon, Yang Woman Jeneral Presiden nao, tufala i eksplenem (luk long pej 67).
Ol jenis ia oli tokbaot bigwan se, “fas mo bigfala responsabiliti blong bisop, i blong kea long ol yang man mo ol yang woman blong wod blong hem,” Presiden Nelson i talem. Wan long ol jenis ia i blong i nomo gat ol presidensi blong Ol Yang Man. Bisoprik, hem i presidensi blong Aronik Prishud insaed long wod, bae i kasem help tru long ol kworom advaesa, mo long sam kes, ol speselis. Presiden blong Ol Yang Woman long wod bae i ripot i go daerek long bisop.
Ol kworom mo ol klas presidensi long wod, bae i lukluk nomo long wok blong fasin blong sevem man, wetem memba misinari wok, holemtaet ol konvet, mekem memba i aktiv, wok blong tempol mo famli histri, mo blong stap tijim gospel. Ol yut kworom mo ol klas presiden oli plan mo lidim ol Sandei miting, ol seves projek, mo ol nara aktiviti.
Ol aktiviti blong ol yut, oli nomo singaotem “Miutuol” be oli save singaotem “Ol Yang Woman aktiviti,” Ol Aronik Prishud kworom aktiviti,” o “ol yut aktiviti.” Wod Bajet blong ol yut aktiviti, oli mas divaedem bitwin Ol Yang Man mo Ol Yang Woman oganaesesen i ikwol folem namba blong ol yut insaed long wanwan oganaesesen.
Oli luklukbak long stamba toktok blong Ol Yang Woman, mo namba blong ol klas blong Ol Yang Woman bae oli oganaesem folem namba mo ol nid blong ol yang woman. Ol klas ia, oli putum nem ia, “Ol Yang Woman,” folem yia blong olgeta we oli stap long klas, olsem: “Ol Yang Woman 12–14,” o simpol nomo: “Ol Yang Woman” sapos evriwan i mit tugeta. Ol nem ia, “Bihaev,” “Maea Med,” mo “Lorel” bae oli nomo yusum.
Wan memba blong stek hae kaonsel bae i stap olsem stek Yang Man presiden,mo stek Yang Man presidensi bae i mekem wok tu insaed long stek Aronik Prishud–Yang Woman Komiti wetem stek Yang Woman presidensi, hae kaonsela we i wok wetem Ol Yang Woman, mo hae kaonsela we i wok wetem Praemeri.
Long ol nara jenis, Rilif Sosaeti, Ol Yang Woman, Ol Yang Man, Praemeri, mo Sandei Skul, bae oli singaotem olgeta “ol oganaesesen” be i no “ol okseleri,” mo ol lida, bae oli singaotem olgeta olsem “Ol Jeneral Ofisa” long level blong ful Jos, mo olsem “ol stek ofisa” mo “ol wod ofisa” long lokol level.