Ol Gel we Mi Lavem Tumas
Long stamba blong evri samting we yumi stap mekem long Ol Yang Woman, i hat blong mifala blong helpem yufala blong kasem wan fet we i no seksek long Lod Jisas Kraes.
Ol dia sista blong mi. !Hem i gud tumas blong stap wetem yufala! Yumi stap witnesem revelesen we i kapkapsaet, mo i luk dip insaed long sol mo i givim paoa.
Bifo yumi stat, mi wantem presentem sam fren long yufala; oli ol yang woman we oli gat spesel talen, fasin, mo situesen blong olgetawan mo famli. Wanwan long olgeta, olsem yufala evriwan, i tajem hat blong mi.
Faswan, hemia Bella. Hem i stanap strong olsem wan yang woman ia nomo insaed long branj blong hem long Aeslan.
Hemia strong Josephine blong Afrika, we i komitim hem bakegen blong stap stadi long Buk blong Momon evri dei. Hem i stap faenemaot paoa mo blesing we oli kam tru long simpol mo fetful aksen ia.
Mo laswan, hemia dia fren blong mi, Ashtyn, wan top yang woman we i ded afta Hem i faet wetem kansa, blong sikis yia. Testemoni blong hem abaot Atonmen blong Jisas Kraes i stap ring yet insaed long hat blong mi.
Yufala evriwan o i gudgudfala yang woman. Yufala wanwan i wan ia nomo, we wanwan i gat presen mo eksperiens blong yuwan, be yet, yufala i semmak long ol impoten wei we i no save finis.
Yufala i stret spirit gel ia blong Papa mo Mama long Heven, mo i no gat samting i seperetem yufala long lav blong Tufala mo lav blong Sevya blong yufala.1 Taem yufala i stap kam kolosap moa long Hem, iven blong tekem ol smol bebi step i go fored, bae yufala i faenemaot pis ia we i stap oltaem we i kam slip gud insaed long sol blong yu olsem wan fetful disaepol blong Sevya, Jisas Kraes.
Presiden Russel M. Nelson, dia profet blong yumi, i bin askem se bae mi serem wan jenis we i kam tru long insperesen, we bae i helpem yufala blong “developem tabu paoa we i blong yufalawan,”2 mo kam antap long stret mo gud paoa blong lidim tingting blong man. Bae mi tokbaot ol fofala eria blong jenis ia, tedei.
Stamba Toktok blong Ol Yang Woman
Faswan. Long stamba blong evri samting we yumi stap mekem long Ol Yang Woman, i hat blong mifala blong helpem yufala blong kasem wan fet we i no seksek long Lod Jisas Kraes,3 mo wan sua save abaot tabu aedentiti blong yu olsem wan gel blong God.
Tedei, bae mi wantem anaonsem wan revisen long stamba toktok blong Ol Yang Woman. Mi prea se bae yufala i filim Tabu Spirit i testifae long trutok blong ol toktok ia taem bae mi talem niufala stamba toktok:
Mi mi wan gel blong papa mo mama long heven we Tufala i lavem mi tumas,4 mo mi gat wan tabu fasin mo wan fiuja ples we i no save finis.5
Olsem wan disaepol blong Jisas Kraes,6 mi traehad blong kam olsem Hem.7 Mi lukaot mo tekem aksen folem revelesen we mi kasem blong miwan,8 mo givhan long ol narawan long tabu nem blong Hem.9
Bae mi stanap olsem wan witnes blong God long evri taem, mo long evri samting, mo long evri ples.10
Taem mi stap traehad blong kwalifae blong kam olsem wan god,11 bae mi holemtaet strong presen ia we i fasin blong sakem sin,12 mo bae mi kam gud moa evri dei.13 Wetem fet,14 bae mi mekem hom mo famli blong mi i kam strong moa,15 bae mi mekem mo kipim ol tabu kavenan,16 mo kasem ol odinens mo17 ol blesing blong tabu tempol.18
Luk gud jenis ia, i nomo “mifala” be “mi.” Ol trutok ia oli blong wanwan long yufala. Yu yu wan gel blong Papa mo Mama long Heven, we Tufala i lavem yu tumas. Yu yu wan kavenan disaepol blong Sevya blong yumi, Jisas Kraes. Mi stap invaetem yufala blong stadi mo tingting hevi long ol toktok ia. Mi save se taem bae yu mekem, bae yu kasem wan testemoni se oli tru. Taem yu andastanem ol trutok ia, bae i jenisim wei we yu fesem olgeta jalenj ia. Taem yu save aedentiti mo stamba tingting blong yu, bae i helpem yu blong mekem tingting blong yu i folem gud hemia blong Sevya.
Bae yu gat pis mo luksave rod taem bae yu stap folem Jisas Kraes.
Ol Klas blong Ol Yang Woman
Seken ples we i gat jenis i tajem ol klas blong Ol Yang Woman. Elda Neal A. Maxwell i talem: “Plante taem, wanem ol pipol oli nidim moa, i blong gat wan ples blong haed long ol strong win blong laef insaed long ol sef ples we oli pat long olgeta.”19 Ol klas blong yumi, oli mas stap olsem ol sef ples blong haed long ol strong win, ol sef ples we i gat lav mo yu pat long hem. Blong traem blong bildimap moa yuniti, mekem strong frensip, mo mekem se oli filim moa se oli pat blong Ol Yang Woman, mifala i stap mekem sam jenis long ol klas.
Blong ova 100 yia, oli serem ol yang woman long tri klas. Stat naoia i go, mifala i stap invaetem Ol Yang Woman lida mo ol bisop blong prea mo lukluk ol nid blong wanwan yang woman, mo oganaesem olgeta i folem yia blong olgeta, folem spesifik situesen blong wod blong yufala. Hemia samfala eksampol se hemia i luk olsem wanem:
-
Sapos yu gat smol namba blong ol yang woman, yu save gat wan klas blong Ol Yang Woman wetem evriwan i mit tugeta.
-
Maet yu save gat wan bigfala grup blong ol yang woman we oli gat 12 yia, mo afta wan smol grup blong ol yang woman we oli moa bigwan. Yu save disaed blong gat 2 klas: Ol Yang Woman 12 yia, mo Ol Yang Woman, 13 kasem 18 yia.
-
O, sapos yu gat wan bigfala wod wetem 60 yang woman we oli stap kam, yu save gat sikis klas, wan blong evri yia, we yu oganaesem olgeta folem yia.
Be, nomata oli oganaesem klas, yufala ol yang woman, i impoten blong stap bildimap yuniti. Stap wan laet long olgeta raon long yu. Stap wan we i save givim lav mo kea we yu yu stap hop blong kasem long ol narawan. Wetem wan prea insaed long hat blong yu, gohed blong go long ol narawan mo stap wan strong paoa blong mekem gud. Taem yu mekem olsem, laef blong yu bae i fulap long kaen fasin. Bae yu gat ol moa gud filing long ol narawan, mo bae yu stap blong luk gud fasin blong olgeta tu.
Nem blong Ol Klas blong Ol Yang Woman
Nambatri, wetem niufala oganaesesen blong ol klas ia, bae oli singaotem evri klas ia tru long wan sem nem, “Yang Woman.”20 Bae i nomo gat ol nem ia: Ol Bihaev, Maea Med, mo Lorel.
Mekem Ol Klas Presidensi Oli Kam Strong Moa
Las eria we mi wantem tokbaot, i hamas ol klas presidensi oli impoten. I nomata hao oli oganaesem ol klas blong Yang Woman, !evri klas, i mas gat wan klas presidensi!21 Hem i tru long tabu plan se oli stap singaotem ol yang woman blong lidim ol yut blong olgeta.
Rol mo stamba tingting blong gat wan klas presidensi i kam strong moa mo i kam klia moa. Wok blong fasin blong sevem man, i wan long ol bigfala responsabiliti, speseli long ol eria blong wok blong givhan, misinari wok, mekem wan i aktiv, mo wok blong tempol mo famli histri.22 Yes. Hemia wei we yumi mekem Isrel i kam tugeta23—wan wok blong glori blong evri yang woman olsem ol memba blong yut ami blong Lod.
Long evri level blong Jos, Lod i stap singaotem ol klas presidensi blong lidim ol pipol blong Hem. Ol yang woman, blong stap memba blong wan klas presidensi i fas janis blong tekpat long wan paten blong lidasip we i kam tru long insperesen. Ol adalt lida, mekem koling ia blong klas presidensi i wan fas samting, mo afta, stap long saed blong olgeta blong lidim, tijim tingting mo soem rod long olgeta blong mekem se oli gat sakses.24 I nomata wanem level blong lidasip eksperiens wan klas presidensi i gat, stat long ples we oli stap long hem, mo helpem olgeta blong developem ol skil, mo tras ia we bae i blesem olgeta olsem ol lida. Stap kolosap long olgeta, be yu no tekova long olgeta. Spirit bae i lidim yu taem yu stap lidim olgeta.
Blong soem impoten rol blong ol papa mo mama, mo ol lida olsem ol tija blong tijim tingting, bae mi talem wan stori. Kloe i kasem koling blong stap olsem wan klas presiden. Waes prishud lida blong hem i leftemap tingting blong hem blong lukaotem help blong Lod blong hem kasem ol nem blong presidensi blong hem. Kloe i bin prea mo kwiktaem nomo i kasem insperesen blong huia blong kam olsem ol kaonsela blong hem. Taem hem i bin gohed blong tingting hevi mo prea from wan sekretari, Spirit i strong blong pulum tingting blong hem long wan yang woman we i sapraesem hem—wan we i no stap kam long jos o ol aktiviti.
Hem i no filim stret long kwaet toktok ia, nao Kloe i toktok wetem mama blong hem, we i eksplenem long hem we wan long wei we yumi save kasem revelesen i taem wan tingting i stap kambak oltaem. Wetem nius tras, Kloe i filim se hem i save givim nem blong yang woman ia. Bisop i givim koling, mo yang woman ia i akseptem. Afta we oli setem hem apat, swit sekretari ia i talem: “Yu save, mi neva filim se mi gat wan ples, o oli nidim mi eni ples. Mi no filim se mi mi pat. Be wetem koling ia, mi filim olsem se Papa long Heven i gat wan stamba tingting mo wan ples blong mi i stap.” Taem we Kloe mo mama blong hem i aot long miting, Kloe i tanem hem i go long mama blong hem mo talem, wetem wota long ae: “!Revelesen i ril samting! !Revelesen i rili wok!
Yufala ol klas presidensi, God i singaotem yu mo i trastem yu blong lidim wan grup blong ol gel blong Hem. “Lod i save yu. … Hem i jusum yu.”25 Wan we i gat prishud atoriti i bin setem yu apat, mo hemia i minim se taem yu stap mekem ol diuti blong koling blong yu, yu stap yusum prishud atoriti ia. Yu gat wan impoten wok blong mekem. Mas lisingud mo mekem folem ol kwaet toktok blong Tabu Spirit. Taem yu mekem, yu save givim seves wetem ful tras, !from se yu no stap wok yuwan!
Ol klas presiden. Mifala i nidim waes, voes, mo paoa blong bodi mo tingting blong yufala long niu wod yut kaonsel we Elda Quentin L. Cook i bin anaonsem tedei. Yufala i wan stamba pat blong ansa blong mitim ol nid blong ol brata mo sista blong yufala.26
Ol jenis ia, long oganaesesen mo lidasip blong ol klas, bae i stat stret long taem we ol wod mo ol branj oli rere, be evri samting i mas finis mo stat long namba 1 Jenuware 2020.
Ol dia sista blong mi. Mi talem witnes blong mi, se ol jenis ia we mi tokbaot tedei, oli wan insperesen daereksen we i kam long Lod. Taem yumi wok strong wetem strong tingting blong yusum ol jenis ia, bae yumi neva lusum ae long stamba tingting blong yumi: blong mekem tingting blong yu i kam strong moa blong folem Jisas Kraes mo helpem ol narawan blong go long Hem. Mi testifae se hemia i Jos blong Hem. Mi talem tangkyu se Hem i letem yumi blong pat blong wan impoten pat blong tabu wok blong Hem.
Mi prea se semfala Spirit ia we i bin soem rod blong gat ol jenis ia, bae i soem rod long yufala taem yufala i gogohed long kavenan rod ia. Mi testifae olsem, long nem blong Jisas Kraes, amen.