Tabu Fasin mo Plan blong Stap Glad
Hapines we i moa bigwan, i kam taem yumi gat moa tabu fasin long yumiwan.
Ol dia brata mo sista. Mi bin prea from paoa blong helpem yufala blong lukaotem hapines ia blong yufalawan. Sam, maet oli filim hapi finis, be yet, i no gat wan we bae i sakemaot wan janis blong stap hapi moa. Eniwan bae i wantem tumas blong akseptem wan tru janis blong gat hapines we i stap oltaem.
Hemia wanem Papa long Heven; Pikinini blong Hem we Hem i Lavem Tumas, Jisas Kraes, mo Tabu Spirit oli bin givim long evri spirit pikinini blong Papa long Heven we i stap laef naoia, bambae i laef yet, o i bin laef long wol ia. Janis ia, samtaem oli singaotem plan blong stap glad. Profet Alma i bin singaotem hemia olsem, taem hem i bin tijim boe blong hem we i bin stap harem nogud long trabol blong sin. Alma i bin save se fasin nogud i neva stap olsem wan glad, long boe blong hem—o long eni pikinini blong Papa long Heven.1
Hem i bin tijim boe blong hem se, blong stap kam antap long tabu fasin i wan rod ia nomo blong kasem glad. Hem i bin mekem i klia se i posibol blong gat moa glad tru long Atonmen blong Jisas Kraes, we i stap klinim mo mekem yumi kam stret evriwan.2 Tru long fet long Jisas Kraes nomo, taem yumi gogohed blong sakem sin, mo stap kipim ol kavenan nomo, bae yumi save klemem glad ia we i stap we i stap we yumi wantem tumas mo holemtaet.
Prea blong mi tedei, i we bae mi save helpem yufala andastanem se moa glad i kam taem yumiwan i kam moa tabu, blong yufala i save tekem aksen folem bilif ia. Afta, bae mi serem wanem mi save abaot wanem yumi save mekem blong kwalifae from presen ia blong kam moa tabu.
Ol skripja oli tijim yumi se long medel blong ol nara samting, yumi save kam tabu, o kam moa tabu taem yumi praktisim fet long Kraes,3 taem yumi soem se yumi obei,4 sakem sin,5 sakrifaes from Hem,6 kasem ol tabu odinens, mo kipim ol kavenan blong yumi wetem Hem.7 Blong kwalifae from presen ia blong stap tabu, i nidim blong gat tingting i stap daon,8 fasin blong no stap flas,9 mo fasin blong save wet.10
Wan eksperiens blong wantem kam moa tabu i kam long mi long Sol Lek Tempol. Mi go insaed blong fas taem we oli no talem tumas abaot wanem bae mi faenem insaed. Mi bin luk ol toktok long bilding: “Tabu Fasin long Lod” mo “Haos blong Lod.” Be yet, mi filim se i gat plante samting yet. Mo, mi stap askem miwan se rere blong go insaed o no.
Mama mo papa blong mi i wokbaot i go fastaem, taem mifala i go insaed long tempol. Oli askem mifala blong soem rekomen blong mifala, we i talem tru se mifala i klin inaf.
Papa mo mama blong mi i save man ia long kaonta. Mekem se oli stop smol blong storian wetem hem. Mi bin go insaed miwan insaed long wan bigfala spes we evri samting i waet nomo mo i saen. Mi lukluk i go antap long siling we i stap antap we antap long hed blong mi, i olsem mi stap luk open skae. Long tetaem ia, wan klia tingting i kam long mi se bin stap ia bifo.
Be afta, mi harem wan voes we i kwaet—be i no blong mi. Ol kwaet toktok ia oli talem: “Yu neva bin long ples ia bifo. Yu stap rimemba wan taem ia bifo yu bin bon. Yu bin stap long wan tabu ples olsem. Yu bin filim Sevya we i stap rere blong kam long ples ia we yu stanap long hem. Mo yu bin filim hemia from se yu bin wantem tumas blong luk Hem.”
Eksperiens ia long Sol Lek Tempol i tekem sot taem nomo. Be memori blong hem, i stil tekem pis, glad, mo kwaet glad i kam.
Mi bin lanem plante lesen long dei ia. Tabu Spirit i toktok long wan voes we i kwaet, smol voes. Mi save harem Hem taem i gat pis long saed blong spirit long hat blong mi. Hem i tekem wan filing blong hapines mo stret save se mi mi stap kam moa tabu. Mo hemia, oltaem i tekem glad ia we mi bin filim long ol fas sot taem ia insaed long tempol blong God.
Yu bin luk, long laef blong yuwan, mo long laef blong ol narawan, merikel ia blong gat glad we i kam taem wan i groap i kam tabu, i kam moa olsem Sevya. Long ol las wik, mi bin stap long saed bed blong ol pipol we oli save fesem ded wetem ful fet long Sevya mo gat ol hapi fes.
Hem i wan man we i famli blong hem i raonem hem. Hem mo waef i bin stap toktok sloslo taem we boe blong mi i kam insaed. Mi bin save tufala blong plante yia. Mi bin luk Atonmen blong Jisas Kraes i wok long laef blong olgeta mo long laef blong ol memba blong famli blong olgeta.
Tugeta oli bin jusum blong stopem ol wok blong mekem laef blong hem i longwan. I gat wan kwaet filing i stap taem hem i bin toktok long mifala. Hem i smael taem hem i stap talem tangkyu blong hem from gospel ia mo ol paoa blong mekem hem i klin, wetem famli we hem i lavem. Hem i tokbaot ol hapi yia blong seves insaed long tempol. From man ia i askem, boe i anoentem hed blong hem wetem tabu oel. Mi bin silim anoenting ia. Taem mi mekem hemia, mi gat klia tingting blong talem long hem se bae, i no longtaem, bae hem i save luk Sevya blong hem, fes tu fes.
Mi bin promesem hem se bae hem i filim glad ia, lav mo raet blong Sevya. Hem i bin smael bigwan taem mitufala i go. Ol las toktok blong hem long mi: “Talem Kathy se mi lavem hem. Waef blong mi, Kathleen, blong plante yia i bin leftemap tingting blong plante jeneresen blong famli blong hem blong akseptem invitesen blong Sevya blong go long Hem, mo mekem mo kipim ol tabu kavenan, mo long wei ia, kwalifae from glad ia we i kam from moa bigfala tabu fasin ia.
Hem i ded sam aoa afta. Afta sam wik we hem i ded, wido blong hem i tekem wan smol presen i kam long waef mo mi. Hem i smael taem mifala i stap toktok. Wetem glad, hem i talem: “Mi ting se bae mi harem nogud, mo stap miwan. Mi filim mi hapi tumas. ?Yu ting se i stret?”
From mi save se hem i lavem tumas hasban blong hem mo hao nao, tufala tugeta i kam blong save, blong lavem, mo wok blong Lod, mi talem hem se ol filing ia blong glad, i wan presen we God i promesem from se hem i bin, tru long fetful seves blong hem, kam moa tabu. Tabu fasin blong hem i mekem se hem i save gat glad ia.
Sam we oli stap lisin tedei, maet oli stap askem olgetawan: “?From wanem mi no filim pis mo glad ia we oli promesem long olgeta we oli bin fetful? Mi bin stap fetful tru long bigfala hadtaem, be mi no filim glad ia.”
Iven Profet Josef Smit i bin fesem tes ia. Hem i bin prea blong kasem help taem hem i prisena long kalabus long Libeti Misuri. Hem i bin fetful long Lod. Hem i bin groap long tabu fasin. Yet, hem i bin filim se oli no givim glad ia long hem.
Lod i bin tijim hem lesen blong save wet longtaem we yumi evriwan i nidim long sam taem, mo maet blong wan longfala taem, long tes blong yumi long wol ia. Hemia i mesej blong Lod i go long ol fetfulwan blong Hem mo profet we i safa:
“Mo sapos bae oli sakem yu insaed long wan bigfala hol, o long han blong ol man blong kilimded man, mo oli jajem yu se yu mas ded; sapos bae oli sakem yu long dip ples; sapos bae wan bigfala wef i stap girap blong kam agensem yu; sapos ol wael win oli kam enemi blong yu; sapos ol heven oli pulum tudak i kam wanples, mo evri samting oli joen blong blokem rod blong yu; mo antap long evri samting, sapos ol stret jo blong hel oli open bigwan blong solemdaon yu, nao yu mas save, boe blong mi, se evri samting ia bae i givim eksperiens long yu, mo bae i blong gud blong yu.
Pikinini blong Man i bin kamdaon mo fesem i bitim evri samting ia. ?Olsem wanem? ?Yu yu moa hae long hem?
“From hemia, yu mas stap long rod blong yu, mo prishud bae i stap wetem yu; from mi makem ples blong olgeta, mo oli no save pas. Mi save hamas dei blong yu i stap, mo bae mi no katemsot laef blong yu; from hemia, yu no fraet long wanem we man i save mekem, from we God bae i stap wetem yu blong oltaem mo oltaem.”11
Hemia sem lesen we Lod i bin givim long Job,; mo Lod i bin pem hevi praes blong letem Atonmen ia i mekem hem i moa tabu. Yumi save se Job i bin tabu, hemia stat long stat we oli presentesen hem: “Bifo i gat wan man i stap we nem blong hem Job, mo hem i stap long kantri ya Uj. Hem i stap mekem wosip long God, mo oltaem i stap bilif strong long hem we tingting blong hem i no foldaon nating. Hem i wan gudfala man, mo oltaem i stap lukaot gud blong i no mekem wan samting we i nogud.”12
Nao Job i lusum ol rif samting blong hem, famli mo iven, helt blong hem. Bae yu tingbaot se Job i gat tu tingting se hae tabu fasin blong hem, we hem i bin kasem tru long bigfala agens, i bin mekem hem i save kasem moa glad. I luk se, long Job, tabu fasin ia i tekem nogud hadtaem i kam.
Yet, Lod i givim long Job semfala lesen ia blong stretem hem, i go long Josef Smit. Hem i letem Job, i luk situesen ia, we i brekem hat, wetem ol ae blong spirit. Hem i talem:
“Sapos yu yu wan man, yu stanap, yu ansa long ol kwestin blong mi.
“?Taem we mi mi mekem wol ya, yu yu stap wea? Sapos yu save, yu talem long mi.
“?Hu i makemaot wol ya, se bambae i bigwan olsem wanem? ?Hu i pulum teplaen antap long hem blong makem saes blong hem?
?Mo hu i putum fas ston long kona blong fandesen ya, we ol narafala ston blong hem oli stap laenap long hem?
“!Mo san, mun, mo ol sta blong moning oli mas singsing tugeta, mo evri pikinini blong God bae oli singaot from oli glad!”13
Afta, Job i bin sakem sin blong hem from i talem se God i no wan stret man, mo oli letem Job blong luk ol tes blong hem long wan wei we i moa hae mo i moa tabu. Hem i bin sakem sin.
“Nao Job i talem se,
“Hae God. Mi save we yu yu gat olgeta paoa, mo yu save mekem olgeta samting we yu wantem.
“Fastaem yu yu tok long mi se mi mi no gat hed nating. Mo yu talem se mi no naf blong talem se yu yu no waes.
“Be sore, mi mi stap tokbaot ol samting we mi no save.Mi stap talem ol bigbigfala samting, we i bitim save blong mi.
“Ol narafala man nomo oli stap tokbaot yu long mi, be naoia, mi mi luk yu stret long ae blong mi.
“From samting ya, mi mi sem tumas … mi tanem tingting blong mi, mi lego ol fasin ya finis, mo mi stap sidaon long asis blong graon, mo long asis faea.”14
Afta we Job i sakem sin mo i kam moa tabu, Lod i blesem hem we i bitim evri samting we hem i bin lusum. Be maet blesing we i moa hae long Job, i blong kam antap long tabu fasin tru long fasin blong agens mo fasin blong sakem sin. Hem i bin inaf blong kasem moa glad long ol dei we i bin stap yet blong hem i laef long hem.
Moa tabu fasin bae i no kam nomo from se yu askem. Bae i kam taem yu mekem wanem i nid blong God i jenisim yu.
Presiden Russell M. Nelson i bin givim, wanem we long mi, i bes kaonsel long wei blong muv i go long kavenan rod ia i go kasem moa tabu fasin. Hem i poenem rod we hem i wantem yumi hariap long hem.
“Eksperiensem paoa we i mekem yu kam strong taem yu sakem sin evri dei—paoa blong mekem mo stap gud moa evri dei.
“Taem yumi jusum blong sakem sin, !yumi jusum blong jenis! Yumi letem Sevya i jenisim yumi i kam wan moa gud vesen blong yumiwan. Yumi jusum blong groap long saed blong spirit mo blong kasem glad—glad ia blong fasin blong pemaot man, tru long Hem. Taem yumi jusum blong sakem sin, !yumi jusum blong kam moa olsem Jisas Kraes!”
Presiden Nelson i gohed i talem toktok ia blong leftemap tingting blong yumi long hadwok blong yumi kam moa tabu: “Lod i no askem yumi blong kam stret evriwan naoia. Be Hem i askem yumi blong kam klin evriwan sloslo. Blong sakem sin evri dei, i rod blong folem blong kam klin evriwan, mo fasin blong stap klin evriwan i tekem paoa i kam.”15
Presiden Dallin H. Oaks, long konfrens toktok, bifo i bin helpem mi moa klia long hao yumi stap groap long tabu fasin mo hao yumi save se yumi stap muv fored i go. Hem i talem: “?Hao yumi kasem ful paoa long spirit? ?Hao yumi kasem digri blong tabu fasin long mak we bae yumi gat tabu fasin blong save gat Tabu Spirit olsem kampani blong Tabu Spirit? ?Hao nao yumi kam blong luk mo skelem ol samting blong wol ia wetem lukluk i stap long taem we i no save finis?”16
Ansa blong Presiden Oaks i stat wetem bigfala fet long Jisas Kraes olsem Sevya we yumi lavem. Hemia i lidim yumi blong askem fogivnes evri dei mo blong tingbaot Hem taem yumi obei long ol komanmen blong Hem. Moa bigfala fet ia long Jisas Kraes, i kam taem yumi lafet evri dei long toktok blong Hem.
Hym ia “Givim Mi Moa Tabu Fasin” i talem wan wei blong prea from help blong kam moa tabu. Hem we i raet i waes mo talem se tabu fasin i blong lukaot wan presen we i kam long God we i gat lav, we Hem i givim sloslo, afta yumi mekem pat blong yumi. Yufala i save tingbaot gud las ves:
Givim moa klin fasin,
Givim moa paoa i kam.
Givim moa fridom long mak blong wol ia,
Wantem moa blong gobak hom.
Moa fit from kingdom,
Bae mi save yet.
Moa blesing mo tabu—
Moa Sevya olsem Yu.17
Nomata wanem situesen blong yumi, sapos hem i long kavenan rod i gohom, bae prea blong yumi blong gat moa tabu fasin bae i gat ansa. Mi save se taem bae Hem i letem petisen blong yumi, glad blong yumi bae i kam antap. Bae i kam sloslo, be bae i kam. Mi save stret se hemia i tru mo i kam long wan Papa blong yumi long Heven mo Pikinini blong Hem we Hem i lavem tumas, Jisas Kraes.
Mi testifae se Josef Smit i wan profet blong God, se Presiden Russell M. Nelson i profet blong yumi tedei we i stap laef. God Papa i stap laef mo i lavem yumi. Hem i wantem yumi blong gobak long Hem insaed long ol famli. Sevya we i lavem yumi i stap invaetem yumi blong folem hem long wokbaot blong yumi i go longwe. Tufala i rere wan wei i stap. Long tabu nem blong Jisas Kraes, amen.