Ol Lida Oli Presentem Niufala Wok blong Ol Pikinini mo Ol Yut
Ol Pikinini mo Ol Yut, bae oli stat wok long hem long Jenuware 2020 blong helpem ol yang pipol blong folem Sevya taem oli stap gro long saed blong spirit, long saed blong sosol laef, long saed blong bodi, mo long saed blong waes. Blong ridim ol toktok insaed long magasin ia we oli tokbaot Ol Pikinini mo Ol Yut, luk long ol pej 40 mo 53.
“Taem i kam blong yumi folem wan niu rod, we oli mekem i stap blong helpem ol pikinini mo ol yut blong tedei, raon long wol,” Presiden Russell M. Nelson i talem long wan spesel brodkas long 29 Septemba 2019.
Hem i talem long ol pikinini mo ol yut: “Bae yufala i nomo gat plante spesifik wok blong mekem, be mifala i stap invaetem yufala blong kaonsel wetem Lod abaot wei we yu save groap long wan wei we i gat balens. Bae i givim yufala fulap gud samting, mo bae yufala i gat gudtaem; be tu, bae i nidim sam hadwok we i kam long yufala. Bae yu nidim blong lukaotem revelesen blong yuwan. Bae yu nid blong jusum, blong yuwan, wei blong tekem aksen long revelesen ia. Samtaem, bae Spirit i pusum yu blong mekem ol samting we oli had. Mi ting se yu yu naf blong tekem jalenj ia. Yu save mekem ol samting we oli had.”
Presiden Nelson i talem tu se ol papa mo mama oli gat wan stamba rol blong mas mekem. “Plis. Bildim ol strong rilesensip wetem ol pikinini mo ol yut blong yufala,” hem i talem. “Ol lida long Jos oli save help, be olgeta ia, oli ol pikinini blong yufala. I no gat wan i save gat paoa blong lidim tingting blong olgeta blong oli save win long laef, bitim yufala. Givim lav long olgeta, leftemap tingting blong olgeta, mo givim advaes, be no foldaon long temtesen ia blong tekova long olgeta. Bae oli mekem bes taem we bae oli praktisim fridom blong olgeta blong mekem joes.
“Advaes ia tu i blong ol gudfala lida mo tija blong ol pikinini mo ol yut blong yumi,” Presiden Nelson i gohed. “Yumi nidim blong letem ol yang pipol oli lidim rod, speseli olgeta ia we oli bin singaotem mo setem olgeta apat blong oli givim seves long ol klas mo kworom presidensi. Oli bin givim prishud atoriti ia long olgeta. Bae oli lanem olsem wanem blong kasem insperesen blong lidim ol klas o kworom blong olgeta.”
Long semfala presentesen ia, Presiden M. Russell Ballard, Akting Presiden blong Kworom blong Olgeta Twelef Aposol, i presentesen visen biaen long Ol Pikinini mo Ol Yut: “Blong mekem jeneresen we i stap kam antap i kam strong moa long fet blong olgeta long Jisas Kraes, mo blong oli helpem ol pikinini, ol yut, mo famli blong olgeta, blong oli progres folem rod ia blong kavenan taem oli stap fesem ol jalenj blong laef.1 Hem i talem: “Blong stap helpem ol pikinini mo ol yut blong oli kasem wan testemoni abaot Jisas Kraes, bae i blesem olgeta mo yumi evriwan, long ful laef blong yumi.”
Afta we ol yut we oli tekpat long brodkas ia oli kam tugeta long wan aktiviti we i soem olsem wanem blong yusum Presentesen Gaed blong Ol Pikinini mo Ol Yut, Presiden Ballard i talem: “Hemia i jes stat nomo. Tedei, yumi jes stat wetem aktiviti ia. Hemia i wan samting we bae i gogohed insaed long ol famli blong yufala, mo taem bae yufala i stap wok tugeta. Mifala i stap invaetem yufala tu blong gogohed long aktiviti ia. … Papa mo mama. Plis yufala i gohed long hemia long hom. Hem i tokbaot bigwan se “hemia i wan program blong hom we i senta mo Jos i sapotem,” mo we, “ol famli oli wok tugeta insaed long program ia. Hemia nao bae i mekem se program ia bae i gud tumas.”
Long plante eria blong wol, ol papa, mama, mo ol lida oli kasem wan presentesen gaed. Ol nara eria, bae oli transletem Ol Pikinini mo Ol Yut long lanwis blong olgeta samtaem long 2020.
Blong stap lanem gospel, gat seves mo aktiviti, mo blong developem yuwan (wetem wok blong stap setem mo mekem ol gol), bae oli ol ki pat blong program blong Ol Pikinini mo Ol Yut, mo ol yut nao oli mas lid blong mekem ol plan blong hemia. Ol pikinini mo ol yut oli mas lukaotem revelesen blong olgetawan taem oli stap progres folem kavenan rod ia, wetem sapot blong ol famli, ol lida, mo ol narawan. Presiden Ballard i bin poenem se Ol Pikinini mo Ol Yut i wan wok we bae i hapen raon long wol, mo from hemia, oli save stretem folem “ples we yu stap laef long hem, mo folem famli situesen blong yu.”
Bae oli givim sam moa ditel mo risos long Fes tu Fes Brodkas blong ol pikinini mo ol yut long namba 17 Novemba 2019, we bae i soem Elda Gerrit W. Gong blong Kworom blong Olgeta Twelef Aposol. Ol pikinini mo ol yut we oli gat 8 kasem 18 yia long 2020, papa mo mama blong olgeta, Ol Yang Woman lida, ol Aronik Prishud advaesa, mo ol Praemeri lida, oli mas kam long brodkas ia. Sendem ol kwestin blong yu abaot Ol Pikinini mo Ol Yut program long Elda Gong long facetoface.ChurchofJesusChrist.org. Afta long laef brodkas, we bae oli mekem long 18 lanwis, bae oli putum vidio i stap blong mekem se man i save wajem long Intanet o oli save daonlodem eni taem.