Ol Rij Samting long Saed blong Spirit

Tangkyu long naesfala miusik ia. Taem yumi stanap blong singsing medel hym ia, “Tangkyu Papa God Yu Givim Profet,” I gat tru strong poen we i kam long mi. Wan i abaot Profet Josef Smit, profet blong dispensesen ia. Lav mo gud tingting blong mi from hem i gro evri dei we i stap pas. Mo seken tingting i kam taem mi lukluk long waef blong mi, ol gel blong mi, ol apugel blong mi, mo ol smol apugel blong mi. Tingting blong mi se mi mas tekem yufala evriwan olsem pat blong famli blong mi.

Sam manis i pas, long en blong wan tempol endaomen sesen, mi talem long waef blong mi: “Mi hop se ol sista oli andastanem ol rij samting long saed blong spirit we i blong olgeta, insaed long tempol ia.” Ol sista. Plante taem mi stap tingting long yufala, mo i bin hapen long tu manis i pas, taem we Wendy mo mi i bin visitim Hamoni long Pensilvania.

Hem i bin nambatu trip blong mitufala longwe. Long tugeta taem ia, samting i bin tajem mitufala taem mitufala i bin wokbaot long tabu graon ia. Long Hamoni nao, Jon Baptaes i bin kamaot long Josef Smit mo i bin putumbak Aronik Prishud.

Long ples ia nao, Ol Aposol Pita, Jemes, mo Jon oli bin kamaot long hem blong putumbak Melkesedek Prishud.

Long Hamoni nao, Ema Hel Smit i bin stap olsem fas man blong raet taem Profet Josef i bin stap transletem Buk blong Momon.

Hem i long Hamoni tu, we Josef i bin kasem wan revelesen we i talemaot tingting blong Lod long Ema. Lod i bin givim oda long Ema blong hem i eksplenem ol skripja, i askem strong long Jos blong mekem samting, blong kasem Tabu Spirit, mo blong hem i spendem taem blong hem blong “lanem plante samting.” Ema i bin kasem kaonsel tu blong “lego ol samting blong wol ia long saed, mo blong lukaotem ol samting we oli moa gud,” mo blong hem i hang strong long ol kavenan blong hem wetem God. Lod i endem instraksen blong hem wetem ol strong toktok ia: “Hemia i voes blong mi we i go long evriwan.”¹

Evri samting we i bin hapen long Hamoni, i gat bigfala dip mining blong laef blong yufala, ol sista. Kambak blong prishud ia, wetem kaonsel blong Lod long Ema, i save soem rod mo blesem wanwan long yufala. Mi wantem tumas blong yufala i andastanem se restoresen blong prishud ia, i blong yufala olsem wan woman, semmak olsem i blong eni man. From se Melkesedek Prishud i kambak, tugeta, ol woman mo ol man we oli kipim kavenan oli save kasem “evri blesing blong jos long saed blong spirit,”² o, yumi save talem, evriwan long ol rij samting long saed blong spirit we Lod i gat blong ol pikinini blong Hem.

Evri woman mo evri man, we oli mekem ol kavenan wetem God mo i stap kipim ol kavenan ia, mo i stap klin inaf blong tekpat long ol prishud odinens ia, oli save go stret blong kasem paoa blong God. Olgeta we oli bin endao insaed long haos blong Lod, oli kasem presen ia we i prishud paoa blong God tru long paoa blong kavenan blong olgeta, wetem wan presen ia we i save, blong save hao blong yusum paoa ia.

Ol heven oli open long ol woman we oli bin endao wetem paoa ia blong God i kamkamaot long prishud kavenan blong olgeta, semmak olsem ol heven oli open long ol man we oli holem prishud. Mi prea se trutok ia bae wanwan hat blong yufala i andastanem, from se mi biliv se bae i jenisim laef blong yufala. Ol sista. Yufala i gat raet blong yusum oltaem paoa ia blong Sevya blong helpem famli blong yufala mo ol narawan we yufala i lavem.

Maet yu stap askem yuwan: “Hemia i saon gud tumas, be ?hao bae mi mekem hemia? ?Olsem wanem nao mi save yusum paoa ia blong Sevya insaed long laef blong mi?”

Bae yu no faenem toksave ia insaed long wan lesenbuk. Tabu Spirit bae i tija blong yuwan taem yu stap lukaot blong andastanem wanem we Lod i wantem yu blong save mo blong mekem. Rod ia i no kwik, mo i no isi, be hem i mekem spirit blong yu i laef. ?Wanem bae i moa gud bitim blong wok wetem Spirit blong andastanem prishud paoa—paoa ia blong God?

Wanem mi save talem long yufala, i we, blong stap yusum paoa ia blong God long laef blong yufala, i nidim yufala blong mekem ol semfala samting we Lod i bin givim oda long Ema, mo wanwan long yufala, blong mekem.

So, mi stap invaetem yufala blong stadi wetem prea long seksen 25 blong Doktrin mo Ol Kavenan mo faenemaot wanem nao Tabu Spirit bae i tijim yufala, ol sista. Traehad blong yuwan long saed blong spirit, bae i tekem glad i kam taem yu stap kasem, andastanem, mo yusum paoa ia we oli kavremap yu long hem.

Pat blong traehad ia bae i askem yu blong lego fulap samting blong wol ia i stap long saed. Samtaem, yumi stap tokbaot fasin blong tanem baksaed long wol ia wetem ol raorao, ol bigfala temtesen, mo ol giaman tingting blong hem. Be blong stap tru blong mekem hemia, i askem yu blong yu rili lukluk evri ditel blong laef blong yu, mo mekem oltaem. Taem yu mekem olsem, Tabu Spirit bae i talem stret long yu wanem yu nomo nidim, wanem yu nomo nidim blong spendem taem mo paoa blong yu long hem.

Taem yu stap tanem lukluk blong yu i go longwe long ol samting blong wol ia, sam samting we oli impoten long yu naoia, bae oli nomo kam nambawan. Bae yu nid blong talem no long sam samting, nomata yu ting se oli no save spolem man. Taem yu stap kam blong statem mo gohed long rod ia we i tekem laeftaem blong givim laef blong yu long Lod, !ol jenis long lukluk, filing mo paoa long saed blong spirit, bae i mekem yu openem ae!

Nao, wan smol woning. I gat olgeta we bae oli talem se yu no gat paoa blong singaotem paoa blong God. I gat sam we bae oli tingting tu long yu, mo daonem nambawan spirit paoa blong yu olsem wan stret mo gud woman.

Yes i tru tumas, enemi bae i no wantem yu blong yu andastanem kavenan ia we yu bin mekem long taem blong baptaes, o bigfala endaomen blong save mo paoa we yu bin kasem, o bambae yu kasem insaed long tempol—haos ia blong Lod. Mo i tru tumas, Setan i no wantem yu blong yu andastanem se evri taem we yu stap klin inaf mo givim seves mo stap wosip long tempol, bae yu aot wetem paoa blong God mo wetem ol enjel blong Hem we oli “gat wok blong lukaotem gud” yu.³

Setan mo ol man blong hem, oltaem bae oli putum ol samting oli kam blokem rod long yu blong stopem yu blong andastanem ol presen long saed blong spirit we i bin blesem mo save blesem yu wetem. Sore tumas, sam long ol samting we i blokem rod oli save kam from nogud aksen blong wan narawan. Mi harem nogud tumas blong tingting se eniwan long yufala, oli putum yu long saed, o wan prishud lida i no bilivim yu, o wan hasban, papa, o wan fren i abiusum yu, o i no bin fetful long yu. Mi filim bigfala harem nogud se eniwan long yufala i bin filim se oli sakem yufala long saed, oli no respektem o jajem gud yu. Ol kaen rong olsem, oli no gat ples insaed long kingdom blong God.

Be tu, mi glad tumas taem mi lanem abaot ol prishud lida we oli wantem tumas blong ol woman oli tekpat insaed long ol wod mo stek kaonsel. Mi kasem insperesen tru long wanwan hasban we i soem se, prishud responsabiliti blong hem we i moa impoten, i blong hem i kea long waef blong hem.⁴ Mi presem man ia we i gat bigfala dip respek long paoa blong waef blong hem blong kasem revelesen, mo i lukaotgud hem olsem wan ikwol patna long mared blong tufala.

Taem wan man i andastanem se wan Lata-dei Sent woman we i stret mo gud, i lukaotem God mo i endao, hem i haewoman mo i gat paoa, ?yu ting se bae i wan sapraes se bae hem i filim se hem i mas stanap taem hem i kam insaed long rum?

Stat long stat blong taem, Lod i blesem ol woman wetem wan kampas blong klin fasin we i blong olgeta nomo—we i paoa ia blong luksave stret wanem i raet mo wanem i rong. Presen ia, i kam strong moa long olgeta we oli mekem mo kipim ol kavenan. Mo i no kam strong long olgeta we oli minim blong no wantem save long ol komanmen blong God.

Bae mi hariap blong talem se, mi no karemaot long ol man, long eni wei, se olgeta tu, God i askem blong oli luksave wanem i raet mo wanem i rong. Be ol dia sista blong mi. Paoa blong yufala blong save luksave tru mo rong, blong yufala i stap ol gadwoman blong sosaeti blong lukaot long klin fasin, hemia i wan nid mo wan mas long ol las dei ia. Mo mifala i dipen long yufala blong tijim ol narawan blong mekem semmak. Bae mi talem hemia i klia: sapos wol ia i lusum stret mo gud fasin blong ol woman blong hem, bae wol ia i neva kam gud bakegen.

Yumi, ol Lata-dei Sent, i no blong wol ia; yumi blong kavenan Isrel. Lod i singaotem yumi blong mekem wan pipol i rere from Seken Kaming blong Lod.

Nao. Bae mi kliarem sam moa poen long saed blong ol woman mo prishud. Taem oli setem yu apat blong givim seves long wan koling anda long daereksen blong wan we i holem ol ki blong prishud—olsem bisop blong yu, o stek presiden blong yu—yu kasem prishud atoriti blong mekem wok long koling ia.

Semmak, insaed long tabu tempol, oli givim raet long yu blong mekem mo stap olsem woman we i mekem ol prishud odinens evri taem we yu go long tempol. Tempol endaomen blong yu, i mekem yu yu rere blong mekem hemia.

Sapos yu endao be yu no mared naoia long wan man we i holem prishud, mo wan i talem long yu: “Mi sore tumas se yu no gat prishud insaed long hom blong yu,” plis, yu mas andastanem se toktok ia i no stret. Maet yu no gat wan man we i holem prishud insaed long hom blong yu, be yu bin mekem ol tabu kavenan wetem God insaed long tempol blong Hem. Aot long ol kavenan ia, prishud paoa blong Hem i kamaot mo i kavremap yu. Mo tingbaot, sapos hasban blong yu bae i ded, bae yu prisaed insaed long hom blong yu.

Olsem wan Lata-dei Sent woman we i stret mo gud mo i endao, yu toktok mo tij wetem paoa mo atoriti we i kam long God. Tru long fasin blong askem strong, mo tu, tru long storian, mifala i nidim voes blong yufala blong stap tijim doktrin blong Kraes. Mifala i nidim tingting mo wok blong yufala insaed long famli, wod mo stek kaonsel. !Wanem yu tekem i kam i impoten, mo i no blong flasem ples!

Ol dia sista blong mi. Paoa blong yufala bae i kam antap taem yufala i stap givim seves long ol narawan. Ol prea blong yufala, taem blong livim kakae, taem yu spendem insaed long ol skripja, mo seves insaed long wok blong tempol mo famli histri, bae i openem ol heven long yufala.

Mi talem strong long yufala blong stadi wetem prea long evri trutok we yu save faenem abaot prishud paoa. Yu save stat wetem Doktrin mo Ol Kavenan, seksen 84 mo 107. Tufala seksen ia bae i lidim yu long ol nara ples. Ol skripja mo ol tijing we oli kam long ol profet, sia mo reveleta blong taem blong yumi, oli fulap wetem ol trutok ia. Taem we andastaning blong yu i kam antap, mo taem yu stap praktisim fet blong yu long Lod mo prishud paoa blong Hem, bae paoa blong yu blong kam blong save yusum moa rij samting ia long saed blong spirit we Lod i bin putum i stap, bae i kam strong moa. Taem bae yufala i mekem olsem, bae yufala i faenem se yufala i save help moa blong krietem ol famli we oli no save finis we oli stap wan, we oli sil insaed long tempol blong Lod, mo oli gat fulap lav long Papa long Heven mo Jisas Kraes.

Evri hadwok blong yumi blong stap givhan long wanwan long yumi, blong talemaot gospel, blong mekem ol Sent oli kam stret moa, mo blong pemaot ol dedman, evri hadwok ia i luk long tabu tempol. Naoia, yumi gat 166 tempol raon long wol, mo moa i stap kam yet.

Olsem we yufala i save, Sol Lek Tempol, Tempol Skwea mo plas long saed kolosap long Jos Ofis Bilding, bae oli mekem i kam niu long wan projek we bae i stat long en blong yia ia. Tabu tempol ia, oli mas holemtaet mo mekem i rere blong givim insperesen long ol fiuja jeneresen, semmak olsem i bin lidim tingting blong yumi long jeneresen ia.

Taem Jos i stap gro, bae oli bildim moa tempol blong mekem se i gat moa famli i save kasem ol blesing we oli hae olgeta, we oli blong laef we i no save finis.⁵ Yumi lukluk wan tempol olsem bilding ia we i moa tabu insaed long Jos. Taem oli stap anaonsem ol plan blong bildim wan niu tempol, hem i kam wan impoten pat blong histri blong yumi. Olsem we yumi bin tokbaot long ples ia tedei, yufala, ol sista, i impoten tumas long wok blong tempol, mo tempol i ples we bae yufala i kasem ol rij samting we oli hae moa evriwan.

Plis, yufala i lisingud mo stap kwaet taem bae mi anaonsem ol plan blong bildim ol wit niu tempol. Sapos mi anaonsem wan tempol long wan ples we i spesel long yu, bae mi askem yu blong yu blong yu stap kwaet nomo wetem glad insaed long hat blong yu. Mifala i glad blong anaonsem ol plan blong bildim ol niu tempol long ol ples ia: Fritaon long Siera Leone, Orem long Yuta; Port Moresbi long Papua Niu Gini; Bentonvil long Akansas; Bakolod long Filipin; MakAlen long Teksas; Koban long Gwatemala; mo Telasvil long Yuta. Tangkyu ol dia sista. Mifala i talem tangkyu bigwan blong akseptem ol plan ia mo fasin blong stap revren.

Blong endem, mi wantem blong livim wan blesing i stap wetem yufala, se bae yufala i andastanem prishud paoa ia we yufala i bin kasem, mo we bae yufala i mekem paoa ia i kam bigwan taem yufala i stap praktisim fet blong yufala long Lod mo long paoa ia blong Hem.

Ol dia sista. Wetem bigfala respek mo tangkyu, mi talemaot lav we mi gat long yufala. !Wetem tingting i stap daon, mi talemaot se God i stap laef! Jisas Hem I Kraes. Hemia i Jos blong Hem. Mi testifae olsem long tabu nem blong Jisas Kraes, amen.