Stanap long Ol Promes mo Ol Kavenan blong Yumi

Ol brata mo sista. Taem yumi stap klosem sesen ia, bae yumi wanwan i holem long hat blong yumi, witnes we yumi kasem tedei long saed blong trutok blong gospel ia blong Jisas Kraes. Yumi gat blesing blong tabu taem ia tugeta blong mekem i kam strong ol promes blong yumi long Lod Jisas Kraes se yumi ol wokman blong Hem mo Hem i Sevya blong yumi.

Hamas hem i impoten blong mekem mo kipim ol promes mo ol kavenan, oli hevi long maen blong yumi. ?Hamas hem i impoten long yu blong kipim ol toktok blong yu? ?blong oli trastem yu? ?blong mekem wanem yu talem se bae yu mekem? ?blong traehad blong givim ona long tabu kavenan blong yu? ?blong gat tru fasin? Taem yumi stap tru long long ol promes blong yumi long Lod mo long ol narawan, yumi wokbaot long rod blong kavenan i gobak long Papa blong yumi long Heven mo yumi filim lav blong Hem long laef blong yumi.

Sevya blong yumi, Jisas Kraes, i bigfala Eksampol blong yumi long saed blong fasin blong stap mekem mo kipim ol promes mo ol kavenan. Hem i kam long wol wetem promes blong mekem tingting blong Papa. Hem i tijim ol gospel prinsipol tru long toktok mo long aksen. Hem i bin pem praes from ol sin blong yumi blong mekem se yumi save laef bakegen. Hem i givim ona long evri promes blong Hem.

?Oli save talem semmak long wanwan long yumi? ?Wanem i ol denja sapos yumi giaman smol, slip smol, o yumi no stop blong folem ol komitmen blong yumi? ?Wanem sapos yumi ronwe long ol kavenan blong yumi? ?Bae ol narawan oli “kam long Kraes” folem eksampol blong yumi? ?Bae yu mekem wanem yu talem? Kipim ol promes i no wan simpol fasin nomo, be hem i wan fasin blong stap olsem wan disaepol blong Jisas Kraes.

Lod i tingbaot evri hadtaem blong yumi long wol ia mo i promes se, “Yufala i stap glad, mo yufala i no fraet, from we mi Lod, mi stap wetem yufala, mo bae mi stanap wetem yufala.”¹ Mi bin filim Hem i stap wetem mi taem mi nidim stret save, kamfot, bigfala lukluk long saed long spirit o paoa, mo mi bin gat tingting i stap daon bigwan mo mi glad tumas long tabu kompanionsip blong Hem.

Lod i bin talem, “Evri sol we i livim sin blong hem mo i kam long mi, mo i singaotem nem blong mi, mo i obei long voes blong mi, mo i stap obei long ol komanmen blong mi, bambae hem i luk fes blong mi mo save se mi mi stap.”² Maet, hemia i bigfala promes blong Hem.

Mi bin lanem hamas i impoten blong kipim ol toktok blong mi long taem mi yang. Wan kaen eksampol olsem i taem mi stanap long laen blong talemaot Strong Promes blong Skaot. Rilesensip blong yumi wetem Ol Boe Skaot blong Amerika, bae i kam blong finis, be bae i oltaem stap wan impoten histri long mi mo long Jos ia. I go long Skaot oganaesesen, i go long ol man mo woman we oli givim seves wetem wan tru hat olsem ol lida blong skaot, i go long ol mama—ril poen i go long olgeta—mo i go long ol yang man we oli tekem pat long Skaot, mi talem: “Tangkyu.”

Long sesen ia, dia profet blong yumi, Presiden Russel M. Nelson, mo Elda Quentin L. Cook, tufala i bin anaonsem ol jenis we bae i mekem lukluk blong yumi i go long yut mo mekem ol oganaesesen blong yumi oli stretem olgeta wetem trutok. Antap long hemia, jes las Sandei, Presiden Nelson, mo Presiden M. Russel Balad, oli eksplenem niu program blong Ol Pikinini mo Ol Yut blong Jos Ia blong Jisas Kraes blong Lata–dei Sent blong ful Jos i yusum. Hem i tingting blong ful wol we i lukluk long Lod mo Sevya blong yumi, Jisas Kraes. Fas Presidensi mo Kworom blong Olgeta Twelef Aposol oli wan long niu daereksen ia, mo mi serem witnes blong miwan se Lod i bin gaedem mifala long evri step truaot long rod ia. Mi glad blong ol pikinini mo ol yut blong Jos Ia blong Jisas Kraes blong Lata–dei Sent blong eksperiensem insaed lukluk ia tugeta long hom mo long Jos—taem oli lanem gospel, givim seves mo gat aktiviti, mo developem olgeta wanwan.

Stamba toktok blong ol yut blong yia 2020 we i stap kam, i tokbaot long saed blong promes long Nifae blong “go mo mekem.” Hem i raetem, “Mo i bin hapen se mi, Nifae, mi talem long papa blong mi: “Bae mi go mo mekem ol samting we Lod i bin talem, from mi save se Lod i no givim wan komanmen long ol pikinini blong ol man, sapos hem i no mekem rere wan rod blong olgeta, blong oli save mekem samting ia we hem i talem long olgeta.”³ I nomata se i bin hapen long taem finis, be yumi long Jos, yumi stanap long promes ia tedei.

Blong “go mo mekem” i minim blong girap i go bitim ol wei blong wol, kasem mo tekem aksen folem revelesen blong yuwan, laef folem stret mo gud fasin wetem hop mo fet long fiuja, mekem mo kipim ol kavenan blong folem Jisas Kraes, mo afta, gat moa lav long Hem, we i Sevya blong wol.

Wan kavenan i wan tu rod promes bitwin yumi mo Papa long Heven. Olsem ol memba blong Jos, yumi mekem kavenan long baptaes blong tekem long yumiwan, nem blong Jisas Kraes, blong laef olsem Hem i bin laef. Olsem olgeta we oli baptaes long ol wota blong Momon, yumi kavenan blong kam ol pipol blong Hem, blong karem ol hevi samting blong wanwan long yufala, blong mekem se oli nomo hevi,… “krae wetem olgeta we oli krae, …mo leftemap tingting blong olgeta we oli nidim fasin blong leftemap tingting, mo blong stanap olsem ol witnes blong God evri taem mo long evri samting, mo long evri ples.”⁴ Givhan blong yumi long wanwan insaed long Jos i soem komitmen blong yumi blong givim ona long ol promes ia.

Taem yumi tekem sakramen, yumi riniu kavenan ia blong tekem long yumi, nem blong Hem mo mekem sam moa promes blong save kam antap. Ol tingting mo ol aksen blong yumi blong evri dei, tugeta bigwan mo smol, i soem komitmen blong yumi long Hem. Tabu promes blong Hem olsem risal i, “Mo sapos yufala i tingbaot mi oltaem, bae yufala i gat Spirit blong mi i stap wetem yufala.”⁵

Kwestin blong mi tetei i we ?yumi stanap long ol promes mo ol kavenan blong yumi, o samtaem oli ol haf‑hat komitmen, we oli mekem blong pleiplei mo afta brekem isi nomo? Taem yu talem long wan, “Bae mi prea blong yu,” ?yu mekem? Taem yu komitim yu, “Bae mi stap ia blong help, ?bae yu mekem? Taem yu talem se bae yu pembak wan kaon, ?yu stap pem? Taem yumi leftemap han blong yumi blong sastenem wan nara memba long wan niu koling, we i minim blong givim sapot, ?yu stap givim sapot?

Wan aftenun long yang taem blong mi, mama blong mi i sidaon long leg blong bed blong hem mo tok strong long mi se i impoten blong laef folem Tok blong Waes. “Mi save wetem eksperiens blong ol narawan, long sam yia we i pas,” hem i talem “spirit mo fasin blong filim ol samting i save lus taem yumi no folem Tok blong Waes.” Hem i lukluk stret long ae blong mi mo mi filim olsem ol toktok blong hem oli go stret long hat blong mi: “Promesem mi, Ronnie, tedei (hem i stap singaotem mi Ronnie) se bae yu oltaem laef folem Tok blong Waes.” Mi bin mekem tru promes ia long hem, mo mi bin kipim hemia long evri yia we i pas.

Komitmen ia i sevem mi gud taem mi stap wetem ol fren long yang taem blong mi, mo afta long yia ia taem mi stap long bisnis we ol samting oli kam go fri nomo. Mi bin mekem wan impoten desisen longtaem bifo blong folem ol loa blong God, mo mi neva gobak long desisen ia. Lod i bin talem, “Mi, Lod, mi mas mekem folem promes blong mi taem yufala i mekem wanem mi talem; be taem yufala i no mekem wanem we mi talem, yufala i no gat promes.”⁶ ?Wanem nao Hem i talem long olgeta we oli obei long Tok blong Waes? Se bae yumi gat promes blong gat helt, paoa, waes, save, mo ol enjel blong protektem yumi.⁷

Sam yia i pas, Sista Rasban mo mi i bin stap long Sol Lek Tempol from siling blong wan long ol gel blong mitufala. Taem mitufala i stanap aotsaed long tempol wetem yang gel blong mitufala, we i no olfala yet blong atendem seremoni, mifala i tokbaot hamas hem impoten blong sil insaed long tabu tempol blong God. Olsem mama blong mi i bin tijim mi ol yia bifo, mifala i talem long gel blong mitufala, “Mitufala i wantem yu sil sef insaed long tempol, mo mitufala i wantem yu blong promesem mitufala se taem yu faenem kompanion blong yu we i no save finis, bae yu putum wan deit wetem hem blong sil insaed long tempol.” Hem i promes long mitufala.

Pikja

Gel blong Elda Rasban mo hasban blong hem.

Hem i bin stap talem se stat long taem ia, storian blong mifala i bin protektem hem mo rimaenem hem long “wanem i moa impoten.” Afta, Hem i mekem tabu kavenan ia taem hem i bin sil long hasban blong hem insaed long tempol.

Presiden Nelson i bin tijim: “Yumi … leftemap paoa blong Sevya long laef blong yumi taem yumi mekem tabu kavenan mo kipim ol kavenan ia i stret we i stret. ” Ol kavenan blong yumi oli fasem yumi i go long Hem mo givim long yumi paoa olsem hemia blong god.”⁸

Taem yumi kipim ol promes long wanwan long yumi, yumi save kipim ol promes wetem Lod. Tingbaot ol toktok blong Lod: “Taem we yufala i mekem olsem long wan brata blong mi we i daon moa long ol narafala brata blong mi, we i daon moa long ol narafala brata blong mi, be i olsem we yufala i mekem long mi nomo.”⁹

Tingtingbak, wetem mi, long ol eksampol blong ol promes long skripja. Amon mo ol boe blong Mosaea insaed long Buk blong Momon oli komitim olgeta blong “prijim toktok blong God.”¹⁰ Taem Ol Man blong Leman oli bin holemtaet Amon, oli bin karem hem i go long fored blong King Lamonae, King blong Ol Man Leman. Hem i komitim hemwan long King, “Bae mi kam wokman blong yu.”¹¹ Taem ol stilman oli kam blong stilim ol sipsip blong king, Amon i bin katemaot ol han blong olgeta. So king i sapraes, hem i lisin long mesej blong Amon long saed blong gospel mo i jenisim laef.

Rut, long OlTesteman, i promesem avu woman blong hem, “Wea ples bae yu go, bae mi tu mi go.”¹² Hem i bin laef folem toktok blong hem. Gudfala Man Sameria, long wan parabol insaed long Niu Testeman, i bin promesem man blong hotel se sapos hem i kea long man we i kasem kil, “[Wanem we yu spendem moa, taem mi kambak bakegen, bae mi pembak yu.]”¹³ Soram, long Buk blong Momon, i promes blong go long waelples wetem Nifae mo ol brata blong hem. Nifae i raetem, “Mo i bin hapen se afta we Soram i mekem wan strong promes long mifala, ol fraet blong mifala i stop long saed blong hem.”¹⁴

Wan long ol olfala promes “Lod i bin mekem long ol papa”, olsem oli tokbaot insaed long olgeta skripja se “hat blong ol pikinini bae i tanem i go long ol papa blong olgeta.”¹⁵ Long laef bifo laef long wol ia taem yumi jusum plan blong God, yumi bin mekem wan promes blong helpem karem i kam tugeta Isrel long tugeta saed blong vel. “Yumi go insaed long wan patnasip wetem Lod,” Elda Jon A. Witso i eksplenem sam yia i pas. “Plan ia blong i wokaot, i no wok blong Papa, mo wok blong Sevya, be wok blong yumi tu.”¹⁶

“[Blong] karem i kam tugeta i wan long impoten samting we i stap tekem ples long wol tudei,” Presiden Nelson i bin talem taem hem i travel raon long wol. “Taem yumi stap tokbaot kam tugeta, yumi stap talem stamba trutok ia nomo: evriwan long ol pikinini blong Papa blong yumi long Heven, long tugeta saed blong vel, i nidim blong harem mesej blong gospel we i kambak blong Jisas Kraes.”¹⁷

Olsem wan Aposol blong Lod Jisas Kraes, mi endem wetem wan invitesen mo promes. Faswan, invitesen: Mi invaetem yu blong tingting long ol promes mo ol kavenan yu stap mekem wetem Lod mo ol narawan, wetem bigfala tru fasin, mo save se, wanem yu talem, yu mas mekem. Seken, mi promesem yu, taem yu mekem hemia, Lod bae i putumbak ol toktok blong yu mo katemdaon ol wok blong yu taem yu traehad wetem fasin we i no muvmuv blong gohed strong blong bildimap laef blong yu, blong ol famli blong yu, mo Jos Ia blong Jisas Kraes blong Lata‑dei Sent. Bae Hem i stap wetem yu, ol dia brata mo sista blong mi, mo bae yu save wetem strong biliv, lukluk i go fored blong “ oli go insaed long heven, blong mekem se [yu] save stap wetem God long wan ples blong hapi we i neva gat en from Lod God i bin talemaot ol samting ia”¹⁸

Long hemia, mi testifae mo promes long nem blong Jisas Kraes, amen.