Stap Mekem Spirit blong Yumi I Kontrolem Bodi blong Yumi

Ol dia brata mo sista blong mi. Taem Oktoba jeneral konfrens i stap kam kolosap las yia, mi bin rere long konfrens toktok blong mi blong tokbaot namba 100 aniveseri blong visen blong spirit wol we Lod i givim long Presiden Josef F. Smit long namba 3 Oktoba 1918.

Afta sam dei we mi sendem toktok blong mi i go long translesen, kompanion blong mi blong oltaem we mi lavem, Barbara, i finisim taem blong hem long wol ia mo i pas i go long spirit wol.

Taem ol dei oli pas i go long ol wik, afta ol manis, mo naoia wan yia we Barbara i lus, mi luk se mi kam blong laekem moa skripja ia: “Bae yufala i mas laef tugeta wetem lav, mekem se bae yu krae from olgeta we oli ded.”¹ Barbara mo mi i gat blesing blong “laef tugeta wetem lav” blong 67 yia. Be, mi bin lanem, long spesel wei blong mi, mining blong stap “krae from olgeta we oli ded,” we yumi lavem. !O yes, mi lavem mo misim hem!

Mi ting se plante long yumi i no stap talem tangkyu from ol samting we ol narawan oli stap mekem long yumi go kasem taem we oli go. Mi bin save Barbara i bin bisi oltaem, be mi no bin andastanem fulwan se famli, Jos mo komuniti i askem fulap taem blong hem. I bin gat ol evri dei hadwok we hem i ripitim ol taosen taem truaot ol yia, we i bin mekem famli blong mifala i save muv. Mo tru long evri samting ia, i no gat wan insaed long famli i stap harem hem i leftemap voes blong hem, o talem wan toktok we i no kaen.

Plante memori oli kam wasem tingting blong mi long las yia i kam. Mi bin tingting abaot hadwok blong bodi blong hem, we hem i jusum, blong kam wan mama long seven pikinini. Blong stap wan hom meka, i wan wok ia nomo we hem i wantem, mo long evri saed, hem i bin wan top woman blong wok ia.

Plante taem, mi bin askem miwan olsem wanem hem i mekem wetem ol pikinini mo mi. Blong rere long kaekae nomo, i wan bigfala wok, mo mi no tokbaot ol aktiviti olsem blong wasem ol hip klos we famli i sakem evri wik, blong pem ol stret saes sus mo klos blong ol pikinini oltaem. Mifala evriwan i go luk hem blong plante nara kaen problem we oli bin impoten long mifala. Mo from se oli bin impoten long mifala, nao oli bin impoten long hem tu. Long wan toktok, hem i bin gudfala tumas—olsem wan waef, olsem wan mama, olsem wan fren, olsem wan neba, mo olsem wan gel blong God.

Naoia we hem i muv i go, mi hapi se mi bin jusum blong sidaon long saed blong hem taem mi bin aot long ofis mo gohom long ol las manis blong laef blong hem, blong holem han blong hem taem mitufala i stap wajem ol fevret miusik muvi blong hem—bakegen mo bakegen, from se Alsaema i no letem hem blong tingbaot se hem i jes luk olgeta muvi ia long aftenun long dei bifo. Ol memori blong ol spesel taem ia blong holem han ia, naoia mi holemtaet strong long hat blong mi.

Ol brata mo sista. Plis yufala i no mestem wan janis blong luk insaed long ae blong ol memba blong famli blong yufala wetem lav. Ol pikinini mo ol papa mo mama, go aot luk mo helpem wanwan long yufala, mo talemaot lav mo glad blong yufala. Olsem mi, sam long yufala i save wekap wan dei, blong faenem se taem blong ol impoten toktok o storian ia, i pas finis. Stap laef evri dei tugeta, wetem ol hat we i fulap long tangkyu, gudfala memori, seves mo plante lav.

Long las yia i kam, mi bin tingting hevi, wetem moa tingting bitim oltaem, abaot plan ia blong Papa blong yumi long Heven. Taem hem i bin tijim boe blong hem, Korianton, Alma i bin singaotem plan ia, “bigfala plan blong stap glad.”²

Toktok ia i stap wokem kam long maen blong mi taem mi tingting long plan ia olsem wan “kam tugeta bakegen.” Hem i wan plan, we Papa we i stap long Heven i mekem, we long medel i gat bigbigfala janis blong glori ia blong famli i kam tugeta bakegen—blong i joenem bakegen blong oltaem, ol hasban mo ol waef, ol papa mo ol mama wetem ol pikinini, wan jeneresen folem wan jeneresen, insaed long bigfala haos blong God.

Tingting ia i mekem mi harem gud mo gat stret save ia we bae mi stap wetem Barbara bakegen. Nomata bodi mo maen blong hem i bin safa kolosap long en blong laef blong hem, spirit blong hem i strong, i tru mo i klin gud. Hem i bin mekem hemwan i rere long saed blong evri samting, blong mekem se taem dei ia i kam, hem i save stanap long fored blong “stret kot blong God,”³ wetem wan ful tras mo save we i gat pis. Be mi stap ia, bae mi gat 91 yia long tu dei taem, mo mi stil stap askem miwan: “?Mi mi rere? ?Mi mi stap mekem evri ting we mi nidim blong mekem blong save holem han blong hem bakegen?”

Simpol, besik tru samting blong laef i hemia: Yumi evriwan bae i ded. Nomata yumi ded olfala, o yang, long isi o had wei, rij o no rij, wetem famli o yumiwan, i no gat wan i save ronwe long ded.

Sam yia i pas, Presiden Gordon B. Hinckley i bin talem wan samting we i gat mining lelebet abaot hemia: “Hem swit tumas blong save stret, i givim kamfot blong gat pis ia we i kam long save ia, se yumi save mared long stret fasin mo laef long stret fasin, mo rilesensip blong yumi bae i gohed, i nomata se yumi save se bae yumi mas ded, mo taem bae i pas i go.”⁴

Mi bin mared long stret fasin. Hemia, i no gat tu tingting long hemia. Be hem i no inaf, folem toktok blong Presiden Hinckley. Mi mas laef long stret fasin.⁵

Tedei, “blong laef long stret fasin,” i wan samting we i mekem man i konfius, speseli sapos yu spendem tumas taem long sosol media, ples we eniwan i save talem ol ril trutok, o ol giaman tingting abaot God mo plan blong Hem from ol pikinini blong Hem. Tangkyu tumas, ol memba blong Jos oli gat blong oltaem, ol tru prinsipol blong gospel, blong save hao blong laef blong yumi save rere gud moa from taem ia we bae yumi mas ded.

Jes sam manis bifo mi bon, Aposol bubuman blong mi, Elda Melvin J. Ballard, i bin givim wan toktok, we, long plante pipol, i kasem gud wanem i mining blong laef long stret fasin. Taetol blong hem i “Hadtaem we i blong Sol”, mo toktok blong hem i lukluk plante long faet we i gohed oltaem bitwin bodi blong mit mo bun mo spirit we i no save finis, blong yumi.

Hem i talem: “Bigfala rao we eni man o woman bae i gat … bae i faet ia we hem i gat wetem hemwan,” mo i eksplenem se, Setan, (enemi blong sol blong yumi,) i atakem yumi tru long “ol rabis tingting, ol rabis samting we bodi i wantem, ol samting we bodi i wantem tumas.”⁶ “Mekem se fasfala faet i bitwin tabu mo spirit fasin blong yumi mo fasin blong yumi we i wantem folem ol samting blong wol.” Ol brata mo sista. Tingbaot. Yumi save kasem help long saed blong spirit tru long paoa blong Tabu Spirit we i “save tijim yumi evri samting.”⁷ Help i save kam tu tru long paoa mo ol blesing blong prishud.

Nao mi askem, “?Weswe? ?Faet blong ia i go olsem wanem, long wanwan long yumi?”

Presiden David O. McKay i bin talem: “Laef blong man long wol ia, i wan tes nomo, se bae hem i putum evri hadwok blong hem, maen blong hem, sol blong hem long ol samting we oli givhan long kamfot mo samting we bodi blong hem i wantem, o bae i mekem se stamba tingting blong laef blong hem i blong kasem ol kwaliti long saed blong spirit.”⁸

Faet ia, bitwin fasin blong yumi blong folem fasin blong wol mo hemia long saed blong spirit, i no wan niu samting. Long las toktok blong hem long ol pipol blong hem, King Benjamin i bin tijim se: “From man we i folem fasin blong wol i wan enemi blong God, mo i bin olsem stat long taem we Adam i bin foldaon mo bae i stap olsem, blong oltaem mo oltaem, be sapos nomo hem i mekem folem ol gudfala toktok blong Tabu Spirit, mo i tekemaot man we i folem fasin blong wol, mo kam wan sent tru long atonmen blong Kraes we i Lod.”⁹

Aposol Pol i tijim se “Olgeta we oli stap mekem ol rabis fasin we tingting blong olgeta nomo i wantem, tingting blong olgeta ya i fas gud long ol rabis fasin ya. Be olgeta ya we oli stap mekem ol gudfala fasin we Tabu Spirit i wantem, tingting blong olgeta ya i fas gud long ol gudfala fasin ia.

“Sapos tingting blong man i fas gud long ol rabis fasin ya we tingting blong hem nomo i wantem, bambae hem i ded from. Be sapos tingting blong man i fas gud long ol gudfala fasin ya we Tabu Spirit i wantem, bambae hem i gat laef mo pis from.”¹⁰

Long mi, i klia se wan long ol impoten samting we yumi save lanem long laef ia, i hao blong wok strong long wanem spirit i wantem, mo kontrolem ol devel samting we tingting i wantem. Hemia i no had tumas. Long en, spirit blong yumi, we i bin laef i stap finis i longtaem moa bitim bodi blong mit mo bun blong yumi, i bin save jusum stret mo gud fasin ova long ivel long laef bifo finis. Bifo oli wokem wol ia, yumi bin laef long spirit wol, olsem ol boe mo gel blong Papa mo Mama long Heven, we tufala i lavem mo gohed blong lavem yumi naoia.

Mo yes, bifo yumi mas mekem ol desisen mo joes we i jenisim laef, long taem blong laef bifo. Evriwan we i bin laef, o bae i laef yet long planet ia, i mekem wan stamba desisen blong jusum blong akseptem plan blong Papa long Heven blong Lod i sevem yumi. Mekem se, yumi evriwan i kam long wol ia wetem wan gud ripot blong gud spirit fasin blong yumi mo wan fiuja we i no save finis.

Tingbaot hemia blong wan smol taem. Hemia nao huia ril yu mo mi, mo huia yu bifo finis i kam kasem naoia: wan boe o gel blong God, wetem ol spirit rus long taem we i no save finis mo wan fiuja we oli fulap tumas long ol janis we oli no save finis. Yu—long fas ples, mo oltaem—yu wan spirit man o woman. Mo, taem yumi jusum blong putum fasin blong folem fasin blong wol i kam faswan long spirit fasin, yumi stap jusum wan samting we i agensem ril, tru, spesel man o woman ia, we i yu.

Be yet, i no gat kwestin se ol samting we bodi i wantem mo ol fos blong wol ia i mekem se i had blong mekem desisen. Wetem wan vel we i mekem yumi fogetem samting bitwin spirit wol blong bifo, mo wol ia, bae wan i lus tingting long rilesensip blong yumi long God mo spirit fasin blong yumi, mo fasin blong wantem samting blong wol ia, i save mekem wanem yumi wantem naoia nomo, i kam faswan. Blong stap lanem blong jusum ol samting blong Spirit be i no hemia blong bodi, i wan long ol fas lesen from wanem eksperiens long wol ia, i pat blong plan blong Papa long Heven. Hem i from wanem nao we, plan ia, oli bildimap antap long strong mo sua fandesen blong Atonmen blong Lod mo Sevya blong yumi, Jisas Kraes, blong mekem se ol sin blong yumi, wetem ol mistek we yumi mekem taem yumi folem tingting blong bodi, bae yumi winim tru long fasin blong sakem sin mo bae spirit tingting bae i stap stret oltaem. Naoia i taem blong kontrolem wanem bodi i wantem blong yumi folem gud doktrin blong Kraes long saed blong spirit. Hemia i from wanem, bae yumi no mas pusumbak dei blong yumi sakem sin.¹¹

Fasin blong sakem sin, long wei ia, i kam wan tul blong faet we yumi nidim tumas insaed long faet ia agensem yumiwan bakegen. Long las jeneral konfrens, Presiden Russel M. Nelson i bin tokbaot faet ia, mo i rimaenem yumi se, “taem yumi jusum blong sakem sin, !yumi jusum blong jenis!” Yumi letem Sevya i jenisim yumi i kam wan moa gud vesen blong yumiwan. Yumi jusum blong groap long saed blong spirit mo blong kasem glad—glad ia blong fasin blong pemaot man, tru long Hem. Taem yumi jusum blong sakem sin, !yumi jusum blong kam moa olsem Jisas Kraes!”¹²

Evri naet, taem mi luklukbak long dei blong mi, tru long prea, wetem Papa we i stap long Heven, mi askem blong Hem i fogivim mi sapos mi mekem wan rong samting, mo promes blong traem gud moa tumoro. Mi biliv se evri dei fasin ia blong sakem sin, i helpem spirit blong mi blong rimaenem bodi blong mi se, huia nao i kontrolem mi.

Wan nara risos hem i, janis ia evri wik, we yumi gat blong mekem tingting blong yumi i niu bakegen taem yumi tekem mo kakae sakramen blong tingbaot Atonmen mo lav we i stret evriwan blong Lod mo Sevya Jisas Kraes, long yumi.

Ol brata mo sista. Mi leftemap tingting blong yu blong slodaon smol, mo tingting long weaples yu stap long hem naoia, blong daonem fasin blong yu we i folem fasin blong wol ia, mo givim paoa long tabu spirit fasin blong yu, blong mekem se bae yu no fraet long dei taem bae yu pas i go long spirit wol, blong joen bakegen wetem olgeta we yu lavem—mo from hemia, mi testifae mo prea wetem tingting i stap daon long nem blong Jisas Kraes, amen.