Stap Fetful, Be I No Blong Nogat Fet
Yumi mas tekem taem, long wanwan dei blong kamaot long wol mo konek wetem heven.
I no longtaem i pas mi wekap mo rere blong stadi long ol skripja. Mi pikimap smatfon blong mi mo sidaon long jea long saed blong bed blong mi, wetem tingting blong openem Gospel Laebri ap. Mi onem fon blong mi mo wantem blong stat stadi taem mi luk haf taosen teks mesej mo ol imel we oli bin kam las naet. Mi tingting se, “bae mi jekem ol mesej ia hariap nomo, mo afta bae mi go stret long olgeta skripja.” Be, tu aoa afta, mi stap ridim yet ol teks mesej, ol imel, ol sot nius, mo ol post long sosol media. Taem mi luk save se i bin wanem taem, mi hariap blong rere blong dei ia. Long moning ia mi mestem skripja stadi, mo long en mi no bin tekem gudfala kaekae long saed blong spirit we mi bin hop from.
Kakae long Saed blong Spirit
Mi sua se plante long yufala i semmak. Ol teknoloji blong tedei oli blesem yumi long plante wei. Oli save konektem yumi wetem ol fren mo famli, wetem infomesen, mo wetem ol nius abaot ol samting blong tedei raon long wol. Be, oli save pulumaot tingting blong yumi long wanem we i moa impoten: koneksen blong yumi wetem heven.
Mi ripitim wanem profet blong yumi, Presiden Russel M. Nelson, i bin talem: “Yumi stap laef long wan wol we i gat fulap samting mo raorao i kam antap plante. Sosol media we i stap oltaem, mo sekol blong 24 aoa nius, oli stap atakem yumi wetem ol mesej we oli no stop. Sapos yumi mas gat eni hop blong save sevem ol plante kaen voes ia mo ol tingting blong ol man we oli atakem trutok, nao yumi mas lan blong kasem revelesen.”
Presiden Nelson i gohed blong givim, woning se: “long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”1
Ol yia i pas, Presiden Boyd K. Packer i talem abaot wan grup blong ol dia we from hevi foldaon blong sno, oli bin fas aotsaed long nomol ples blong olgeta mo oli bin fesem hanggri. Sam gudfala pipol, long wan traehad blong sevem ol dia ia, oli sakem fulap drae gras raon long eria—i no bin wanem we ol dia oli stap kakae oltaem, be oli bin hop se bae helpem ol dia tru long wintataem ia. Wetem harem nogud, plante long ol dia ia oli ded. Oli bin kakae drae gras, be i no bin givim gud kaekae long olgeta, mo oli bin hanggri ded wetem ol kat we oli fulap.2
Plante long ol mesej we yumi kasem insaed long infomesen blong tedei oli semmak long saed blong spirit olsem taem yu fidim ol dia wetem drae gras—yumi save kakae hemia ful dei, be bae i no fidim yumi.
?Wea nao yumi save faenem kaekae long saed blong spirit? Plante taem, i no popula long sosol media. Yumi faenem hemia taem yumi “gohed strong long rod blong [yumi] i go fored” long rod blong kavenan, “gohed blong holemtaet aean rel oltaem,” mo kakae long frut blong tri blong laef.3 Hemia i minim se yumi mas tekem taem, long wanwan dei, blong kamaot long ol samting blong wol mo konek wetem heven.
Long drim ia, Lihae i luk ol man we oli bin testem frut ia be oli bin livim tri ia from paoa blong bigfala haos we i gat fulap spes, hae tingting blong wol.4 Hem i isi nomo blong ol yang pipol oli groap long wan Lata–dei Sent hom, atendem evri stret Jos miting mo ol klas, mo tu, tekem pat long ol odinens insaed long tempol, mo afta wokbaot i go long ol nogud rod mo [kam] lus.“5 ?From wanem hemia i hapen? Long plante taem, i from se, long taem we oli stap go tru long ol samting long saed blong spirit, oli no bin mekem wan tru jenis. Oli bin fidim olgeta, be oli no bin givim kaekae long olgeta.
Long narasaed, mi bin mitim plante long yufala, ol yang Lata–Dei Sent we oli strong, waes, mo fetful. Yufala i save se yufala i ol boe mo gel blong God, mo we, Hem i gat wan wok blong yufala i mekem. Yufala i lavem God wetem “ful hat, ful paoa blong tingting, ful maen mo ful paoa blong yufala.”6 Yufala i kipim ol kavenan blong yufala mo givim seves long ol narawan, mo yufala i stat long hom. Yufala i praktisim fet, sakem sin, mo kam antap evri dei, mo hemia i karem i kam, wan glad we i stap oltaem. Yufala i stap rere from ol blesing blong tempol mo ol nara spesel janis we bae yufala i kasem, olsem ol tru man blong folem Sevya. Mo yufala i stap helpem wol blong rere from Seken Kaming; yufala i stap invaetem evriwan blong kam long Kraes mo kasem ol blesing blong Atonmen blong Hem. Yufala i stap konek wetem heven.
Yes, yufala i fesem ol jalenj. Be evri jeneresen tu oli fesem. Ol dei ia oli blong yumi, mo yumi nidim blong stap fetful, be i no blong nogat fet. Mi testifae se Lod i save ol jalenj blong yumi, mo tru long lidasip blong Presiden Nelson, Hem i stap mekem yumi rere blong mitim olgeta. Mi biliv se singaot blong profet we i jes pas blong gat wan jos we i putum hom i senta, we i kasem sapot tru long wanem yumi mekem insaed long ol bilding blong yumi,7 oli mekem blong i helpem yumi stap laef—mo tu blong gro gud—long taem naoia we man i no stap tekem gud kaekae long saed blong spirit.
Hom I Senta
?I minim wanem blong gat wan jos we i putum hom i senta? Ol hom oli save luk defdefren raon long wol. Maet yu pat blong wan famli we oli bin stap long Jos blong plante jeneresen. O, yu yu wan memba ia nomo insaed long famli blong yu. Ating yu mared o singgel, mo gat o nogat pikinini long hom.
Nomata long situesen blong yu, yu save mekem hom blong yu i wan senta blong stap lanem mo stap laef folem gospel. I minim nomo se, yuwan, yu tekem responsabiliti blong jenis blong laef blong yu, mo groap long saed blong spirit. I minim blong folem kaonsel blong Presiden Nelson “blong [jenisim hom blong yu] i kam wan tabu ples blong fet.”8
Enemi bae i traem blong winim tingting blong yu se kaekae long saed blong spirit, i no impoten, o, i giaman moa, i talem se hemia i save wet. Hem i masta blong pulumaot tingting mo man blong mekem yu pusumbak taem. Bae hem i karem ol samting i kam long fored blong yu we i luk olsem se oli mas hapen naoia nomo, be long ril laef, oli no impoten. Bae hem i mekem blong yu kam “trabol long saed blong plante samting,” mekem se bae yu sakemaot “wan samting nomo ia [we] yu nidim.”9
Olsem wanem mi glad from “gudfala papa mo mama blong mi”10 we oli bin lukaotem ol famli blong olgeta long wan hom we i gat kaekae long saed blong spirit oltaem, wan rilesensip we i gat lav, mo plante gudfala aotsaed aktiviti. Ol tijing we oli givim long taem we mi bin yangfala, oli bin helpem mi blong stap gud. Ol Papa mo Mama. Plis, bildim wan strong rilesensip wetem ol pikinini blong yufala. Oli nidim moa taem blong yu.
Jos I Sapotem
Taem yu mekem olsem, Jos i stap blong sapotem yu. Eksperiens blong yumi long Jos i save givim paoa blong mekem kaekae long saed blong spirit long hom i kam gud moa. Be long yia ia, yumi luk kaen Jos sapot ia long Sandei Skul mo Praemeri. Bae yumi luk moa long saed blong hem long Aronik Prishud mo Yang Woman miting tu. Long stat blong Jenuware 2020, Kurikulom blong olgeta miting, bae oli mekem smol jenis long hem. Bae i stil lukluk nomo long olgeta gospel topik, be bae ol topik ia oli go stret wetem Kam, Folem Mi—Blong Wanwan Man, Woman mo Famli. Hemia i wan smol jenis, be i save mekem wan bigfala jenis long ol yut blong stap kakae long saed blong spirit .
?Wanem ol nara kaen sapot we Jos i stap givim? Taem yumi tekem mo kakae sakramen, we i helpem yumi blong putumbak komitmen blong yumi long Sevya evri wik. Mo long jos yumi kam tugeta wetem ol narawan we oli gat defren biliv we oli mekem semmak kavenan ia. Rilesensip wetem lav we yumi developem wetem ol nara gudfala disaepol blong Jisas Kraes i save stap olsem wan sapot we i gat bigfala paoa, long fasin blong yumi blong stap disaepol insaed long hom blong yumi we i senta.
Taem mi gat 14 yia nomo, famli blong mi i bin muv i go long wan niu siti. Hemia i no luk olsem wan nogud hadtaem long yu, be long maen blong mi, long tetaem ia, i bin nogud tumas. I minim blong stap raon wetem ol pipol we mi no save. I minim se evri nara yang man long wod blong mi bae oli atendem wan defren skul be i no hemia we mi stap long hem. Long maen blong wan 14 yia nomo, mi tingting se: “?Olsem wanem papa mo mama blong mi oli mekem olsem long mi?” Mi bin filim olsem oli spolem gud laef blong mi.
Be, tru long Ol Yang Man aktiviti, mi bin save bildim rilesensip wetem ol nara memba blong kworom blong mi, mo oli bin kam ol fren blong mi. Antap long hemia, ol memba blong bisoprik mo Aronik Prishud advaesa oli stat blong tekem wan spesel interes long laef blong mi. Oli bin atendem atletik aktiviti blong mi. Oli bin raetem ol leta we i leftemap tingting blong mi we mi kipim kasem tedei. Oli gohed blong toktok wetem mi afta we mi go long kolej mo taem we mi go long wan misin. Wan long olgeta i kam tu long eapot taem mi kambak hom. Bae mi talem tangkyu oltaem from ol gudfala brata ia mo tugeta lav mo hae hop blong olgeta long mi. Oli soem long mi rod i go long heven, mo laef i bin gat moa laet, hapi mo glad.
?Olsem wanem yumi, ol papa mo mama mo ol lida i helpem ol yut blong save se oli no stap olgetawan taem oli stap wokbaot long rod blong kavenan? Antap long hemia blong bildim wanwan rilesensip, yumi invaetem olgeta blong kam long ol kam tugeta, bigwan mo smolwan—i kam long ol Blong Ol Yut Oli Kam Strong konfrens, mo kamp blong ol yut i go kasem kworom o ol klas aktiviti. Neva ting nating long paoa ia we i kam long ol taem blong kam tugeta wetem ol narawan we oli stap traem tu blong kam strong. Ol bisop mo ol nara lida, plis lukluk bigwan blong fidim mo lukaotem gud ol pikinini mo ol yut long wod blong yu. Oli nidim moa taem blong yu.
I no mata se yu wan lida, wan neba, wan kworom memba, o wan simpol Sent, sapos yu gat janis blong tajem laef blong wan yang man, helpem man ia o woman ia blong konek wetem heven. Wanem yu mekem i save stap olsem stret “Jos sapot” we ol yangfala ia oli nidim.
Ol brata mo sista. Mi testifae se Jisas Kraes i stap long hed blong Jos ia. Hem i stap givim insperesen long ol lida blong yumi mo lidim yumi i go long kaekae long saed blong spirit we yumi nidim blong laef mo kasem gudfala laef long ol lata dei. Kaekae long saed blong spirit ia bae i helpem yumi blong stap fetful, be i no blong nogat fet. Long nem blong Jisas Kraes, amen.