Ol Haelaet blong Namba 189 Medel Yia Jeneral Konfrens
Ol lida blong Jos we oli bin toktok long taem blong Jeneral Konfrens ia, oli bin mekem invitesen, bakegen mo bakegen, blong kam olsem—blong kam moa hapi, blong kam moa tabu, blong kam moa olsem Sevya, mo blong helpem ol narawan blong mekem semmak.
Wanem moa bakegen: oli bin mekem se jenis ia i moa isi blong wanwan long yumi i mekem.
“Lod i wantem evriwan long ol pikinini blong Hem blong oli gat pat long ol blesing we oli no save finis, we oli stap insaed long tempol blong Lod,” Presiden Russell M. Nelson i bin tijim. “Blong yu stap klin inaf blong go insaed long haos blong Lod, i nidim blong yu rere gud tu long saed blong spirit. Be wetem help blong Lod, evri samting i posibol.”
Stap Faenem Hapines mo Stap Tabu
Presiden Nelson i invaetem wanwan long yumi blong kwalifae from ol blesing blong tempol (luk long pej 120).
Presiden Henry B. Eyring i bin eksplenem wanem i joen bitwin fasin blong mekem yu kam moa tabu mo fasin blong yu hapi moa (luk long pej 100).
Elda D. Todd Christofferson i tijim yumi olsem wanem blong faenem “glad ia blong ol sent” (luk long pej 15).
Wan Invitesen blong Lavem Man mo Serem Samting
Presiden Nelson i tijim hamas i impoten blong lavem ol neiba blong yumi, mo i talemaot long ditel se yumaniterian wok blong Jos i go kasem wea (luk long pej 96).
Presiden Dieter F. Uchtdorf i eksplenem paoa blong stap invaetem ol narawan blong “kam mo luk” (luk long pej 86).
Sista Cristina B. Franco i tokbaot gud glad ia blong stap serem gospel (luk long pej 83).
Stap Mekem Ol Yut Oli Kam Strong Moa
Profet i bin presentem ol jenis long ol oganaesesen blong ol yut we bae i leftemap tingting blong ol yut insaed long ol kworom mo ol klas presidensi blong oli girap mo lidim man (luk long pej 38).
Elda Quentin L. Cook i presentem olsem wanem bae Aronik Prishud lidasip bae i wok (luk long pej 40).
Sista Bonnie H. Cordon i bin serem ol jenis long oganaesesen blong Ol Yang Woman (luk long pej 67).
Stap Bildim Ol Tempol; Stap Bildimap Yumi
Presiden Nelson i anaonsem ol eit niu tempol long taem blong sesen blong ol woman (luk long pej 120).
Long Sandei aftenun, hem i bin tijim abaot fasin blong stap kwalifae blong go insaed long tempol, mo hem i bin presentem ol niufala kwestin blong tempol rekomen (luk long pej 120).