Gat Tras long Lod
Wan samting nomo we yumi save dipen long hem i blong trastem Lod mo lav we Hem i gat long ol pikinini blong Hem.
Ol dia brata mo sista. Wan leta we mi kasem longtaem finis i presentem topik blong toktok blong mi. Hem we i raet i bin stap tingting long wan tempol mared blong wan man we kompanion blong hem i bin ded finis. Hem bae i seken waef. Hem i askem kwestin ia: ?Bae woman ia i save gat haos blong hemwan long nekis laef, o bae i laef wetem hasban blong hem mo fas waef blong hem? Mi talem long hem se bae hem i trastem Lod nomo.
Mi gohed wetem wan eksperiens we mi harem long wan gudfala fren we mi stap wok wetem, mo mi serem wetem raet blong hem. Afta we long ded blong waef we hem i lavem tumas mo mama blong ol pikinini blong hem i ded, wan papa i mared nambatu taem. Sam bigfala pikinini oli agensem nambatu mared ia, mo oli askem advaes blong wan famli we i bin wan Jos lida we oli respektem. Afta we hem i harem tingting blong agens blong olgeta, we i lukluk nomo long ol kondisen mo ol rilesensip long spirit wol, o long ol kingdom blong glori we i kam afta long Las Jajmen, lida ia i talem: “Yufala i stap wari long ol rong samting. Yufala i sapos blong wari se bae yufala nao i kasem ol ples ia o no. Tingting nomo long hemia. Sapos yufala i kasem ol ples ia, evri samting bae i gudgudfala moa bitim wanem yufala i stap tingting long hem.”
!Hemia wan tijing blong kamfot! !Gat Tras long Lod!
Aot long ol leta we mi bin kasem, mi save se i gat ol narawan we ol kwestin blong spirit wol i trabolem olgeta; spirit wol ia we bae yumi stap long hem afta yumi ded mo bifo yumi laef bakegen long ded. Sam oli ting se spirit wol ia i gohed wetem plante long ol situesen blong laef long wol ia, mo wetem ol samting we yumi stap gotru long olgeta long laef long wol ia. ?Wanem nao yumi rili save abaot ol situesen long spirit wol? Mi biliv se wan profesa blong relijin long BYY i tokbaot hemia mo i talem stret: ‘Taem yumi askem yumiwan wanem nao yumi save abaot spirit wol, aot long ol tabu standet buk, ansa hem i “i no hamas we yumi ting long hem.’”1
I tru. Yumi save aot long ol skripja se, afta we bodi blong yumi i ded, bae yumi gohed blong laef olsem ol spirit long spirit wol. Ol skripja oli tijim yumi tu se spirit wol ia, i gat tu ples, mo i gat ples blong olgeta we oli “stret mo gud” o “stret” long laef ia, mo olgeta we oli bin gat fasin nogud. Ol skripja oli tokbaot tu hao sam fetful spirit oli stap tijim gospel long olgeta we oli nogud o oli stap agens (luk long 1 Pita 3:19; Doktrin mo Ol Kavenan 138:19–20, 29, 32, 37). Moa impoten, revelesen blong tedei i talemaot se wok blong fasin blong sevem man i stap gohed long spirit wol (luk long Doktrin mo Ol Kavenan 138:30–34, 58), mo nomata oli askem strong long yumi blong no pusumbak taem blong sakem sin long wol ia, (luk long Alma 13:27), oli tijim yumi se i posibol blong sakem sam sin long spirit wol (luk long Doktrin mo Ol Kavenan 138:58).
Wok blong fasin blong sevem man long spirit wol, i blong mekem ol spirit oli kam fri long wanem ol skripja oli tokbaot se i “fasin blong stap long kalabus.” Evriwan we oli stap long spirit wol, oli stap long sam wei blong stap long kalabus. Revelesen blong Presiden Josef F. Smit, insaed long seksen 138 blong Doktrin mo Ol Kavenan, i talem se olgeta dedman we oli stret mo gud, we oli stap long “pis” (Doktrin mo Ol Kavenan 38:22) taem oli stap wet long Laef Bakegen long Ded (luk long Doktrin mo Ol Kavenan 138:16), “oli bin tekem se fasin we spirit blong olgeta oli stap longwe long bodi blong olgeta longtaem tumas i olsem blong stap long kalabus” (Doktrin mo Ol Kavenan 38:50).
Olgeta man nogud oli safa wan moa wei blong stap long kalabus. From sam sin we oli no bin sakem, oli stap long wanem Aposol Pita i talem se i wan spirit “kalabus” (1 Pita 3:19; luk tu long Doktrin mo Ol Kavenan 138:42). Olgeta spirit ia we oli talem se oli “prisena” o oli holemtaet olgeta (Doktrin mo Ol Kavenan 138:31, 42o olsem “oli sakemaot olgeta i go long bigfala tudak; bae oli krae, mo bae oli krae sore mo bae oli kakae tut blong olgeta” taem oli stap wet long laef bakegen long ded mo jajmen (Alma 40:13–14).
Blong evriwan long spirit wol i laef bakegen long ded, i wan samting we bae i hapen from Laef Bakegen long Ded blong Jisas Kraes (luk long 1 Korin 15:22), i nomata se i hapen long ol defren taem blong ol defren grup. Kasem taem ia we Lod i jusum, wanem ol skripja oli talem long yumi abaot wanem i stap gohed long spirit wol, i abaot wok blong fasin blong sevem man. I no gat tumas nara samting. Oli prijim gospel long olgeta we oli no save, olgeta we oli no sakem sin, mo olgeta we oli agens, blong oli save kam fri long kalabus, mo go from ol blesing we Papa long Heven we i gat lav, i gat long olgeta.
Kalabus long spirit wol we olgeta stret mo gud sol we oli jenisim laef, i nid ia blong oli stap wet—mo maet blong pusum wok—blong mekem ol proksi odinens blong olgeta long wol ia blong oli save kasem baptaes mo stap glad long ol blesing blong Tabu Spirit (luk long Doktrin mo Ol Kavenan 138:30–37, 57–58).2 Ol proksi odinens ia, long wol ia, i givim paoa blong oli wok long ol prishud ofis blong olgeta blong mekem bigwan grup blong ol stret mo gud pipol we oli save prijim gospel long ol spirit insaed long kalabus.
Bitim ol besik samting, ol skripja blong yumi oli no talem plante samting abaot spirit wol ia we i kam afta long ded mo i stap bifo long Las Jajmen.3 ?So wanem moa yumi save abaot spirit wol? Plante long ol memba blong Jos oli bin gat ol visen, o ol nara insperesen blong talemaot long olgeta abaot wei we ol samting oli wok, o hao oli oganaes long spirit wol, be ol eksperiens ia oli blong wanwan, mo oli no mas andastanem o tijim olsem se hem i ofisol doktrin blong Jos. Mo i tru. I gat fulap samting we ol memba mo ol narawan oli stap pablisim, olsem ol buk abaot taem we wan i kam kolosap long ded.4
Long saed blong evri samting ia, ol waes woning blong Elda D. Todd Christofferson mo Neil L. Andersen long ol fas mesej blong jeneral konfrens, oli impoten blong yumi tingbaot. Elda Christofferson i tijim se: “Yumi mas tingbaot se i no evri toktok we wan lida blong Jos i talem, blong bifo o tedei, we i minim se hemia nao doktrin. Yumi evriwan i andastanem se, insaed long Jos, se wan toktok we wan lida i bin talem long wan taem nomo, plante taem, i stap olsem wan tingting blong hemwan, be i no minim se i ofisol o ful Jos i mas folem.”5
Long konfrens afta, Elda Andersen i bin tijim prinsipol ia: “Doktrin ia, evri 15 memba blong Fas Presidensi mo Kworom blong Olgeta Twelef Aposol oli stap tijim. Hemia i no haed long wan paragraf blong wan toktok.”6 Famli ofisol toktok, we evri 15 profet, sia mo reveleta oli saenem, i wan gudfala eksampol blong prinsipol ia.
Bitim wan samting we i ofisol olsem famli ofisol toktok, ol profet tijing blong ol Presiden blong Jos, we ol nara profet mo aposol oli konfemem, oli wan eksampol tu blong prinsipol ia. Long saed blong wanem i stap hapen long spirit wol, Profet Josef Smit i bin givim tufala tijing kolosap long en blong seves blong hem we olgeta we oli kam biaen oli bin gohed blong tijim. Wan long ol tijing blong hem, insaed long toktok blong King Folet, i we ol memba blong famli we oli bin stap stret mo gud, bae oli stap tugeta long wol blong ol spirit.7 Wan narawan, i toktok ia long wan fenerol long las yia blong laef blong hem: “Ol spirit blong olgeta we oli stret, oli mekem olgeta oli kasem wan wok we i moa bigwan mo i gat moa glori … insaed long wol blong ol spirit. … Oli no stap longwe long yumi, mo oli save mo andastanem ol tingting, filing, mo wokbaot blong yumi, mo plante taem, oli harem nogud from.”8
So, ?olsem wanem long kwestin we mi askem fastaem abaot ples we ol spirit oli stap long hem? Sapos kwestin ia i defren smol o i no impoten long yu, tingting long hamas kwestin blong yu, o iven olgeta we yu traem faenem wan ansa afta we yu bin harem wan narawan i talem wan samting. Abaot evri kwestin long saed blong spirit wol, mi wantem givim tufala ansa. Faswan, tingbaot se God i lavem ol pikinini blong Hem mo bae i mekem wanem i bes long wanwan long yumi. Seken, tingbaot Baebol tijing ia, we i bin helpem mi from plante kwestin we i no gat ansa:
“I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu
“Long [evri samting] … yu mas tingbaot hem oltaem, mo … hem bambae i soemaot stret rod long yu … .” (Ol Proveb 3:5–6).
Semmak, Nifae i endem sam blong hem wetem ol toktok ia: “O Lod, mi bin trastem yu, mo bae mi trastem yu blong oltaem.” Bae mi no putum tras blong mi long han blong bodi blong mit mo bun” (2 Nifae 4:34).
Yumi evriwan, long praevet, yumi save askem yumiwan abaot ol situesen long spirit wol, o iven tokbaot olgeta kwestin ia mo ol kwestin we oli no gat ansa wetem ol famli, o long ol moa praevet taem. Be yumi no mas tijim wanwan long yumi o yusum olsem wan ofisol doktrin, wanem we i no standet blong ofisol doktrin. Taem yumi mekem, i no tekem wok blong Lod i go longwe, mo i save mekem wanwan i nomo lukaotem blong kam gud moa tru long revelesen we bae hem i kasem hemwan olsem we i plan we Lod i gat long wanwan long yumi. Blong stap dipen tumas long ol tijing blong yuwan o blong narawan, bae i save mekem yumi nomo tingting strong blong lanem samting we bae i mekem andastaning blong yumi i go moa mo i helpem yumi muv fored long kavenan rod ia.
Blong trastem Lod i wan tijing we yumi save gud mo i tru insaed long Jos Ia blong Jisas Kraes blong Ol Lata-dei Sent. Hemia i bin tijing blong Josef Smit taem we ol fas Sent oli bin fesem plante agens mo ol hadtaem we i luk se oli no save winim.9 Hemia i stil bes prinsipol we yumi save yusum taem we ol hadwok blong yumi blong lanem, o blong traem faenem kamfot i fesem ol samting we Lod i no talemaot yet, mo Jos i no tekem yet se i wan ofisol doktrin blong Jos.
Semfala prinsipol ia i semmak wetem ol kwestin we i no gat ansa, abaot ol siling long nekis laef, o ol samting we yumi wantem stretem from sam samting we i bin hapen, o sam sin we i bin hapen long laef ia. I gat fulap samting we yumi no save yet, we i mekem se, wan stret samting we yumi save, i blong gat tras long Lod mo lav we hem i gat long ol pikinini blong Hem.
Blong endem, wanem we yumi save abaot spirit wol, i we, Papa mo Pikinini, wok blong Tufala blong sevem ol man i stap gohed longwe. Sevya blong yumi i statem wok ia blong talem se olgeta we oli prisena bae oli kam fri (luk long 1 Pita 3:18–19; 4:6; Doktrin mo Ol Kavenan 138:6–11, 18–21, 28–37), mo wok ia i gohed taem we ol mesenja we oli klin inaf mo oli kwalifae oli gohed blong prijim gospel, wetem fasin blong sakem sin, long olgeta we oli stil nidim blong kam klin (luk long Doktrin mo Ol Kavenan 138:57). Stamba tingting blong evri samting ia, i stap long ofisol doktrin blong Jos, we revelesen blong tedei i givim.
“Olgeta dedman we oli sakem sin bae Lod i pemaot olgeta, tru long fasin blong obei long ol odinens blong haos blong God,
“mo afta we oli pem panismen blong fasin blong olgeta blong brekem loa, mo Lod i wasem olgeta oli kam klin, bae oli kasem wan praes folem ol wok blong olgeta, from oli gat raet blong Lod i sevem olgeta” (Doktrin mo Ol Kavenan 138:58–59).
Diuti blong wanwan long yumi i blong tijim doktrin blong gospel we i kambak, obei long ol komanmen, lavem mo helpem wanwan long yumi, mo mekem wok blong fasin blong sevem man insaed long ol tabu tempol.
Mi testifae abaot trutok blong wanem mi bin talem long ples ia, mo abaot ol trutok we oli bin tijim, mo bae oli tijim long konfrens ia. Evri samting ia i posibol from Atonmen blong Jisas Kraes. Olsem we yumi save aot long revelesen blong tedei, Hem i “givim glori long Papa, mo hem i sevem evri wok blong han blong hem” (Doktrin mo Ol Kavenan 76:43; oli ademap italik). Long nem blong Jisas Kraes, amen.