2019
Ol Jenis blong Mekem Ol Yut Oli Kam Strong Moa
Oktoba 2019

Ol Jenis blong Mekem Ol Yut Oli Kam Strong Moa

I Kam long Elda Quentin L. Cook

Blong Kworom blong Olgeta Twelef Aposol

Moa yang man mo yang woman bae oli girap i kam long jalenj ia, mo bae oli stap long kavenan rod ia wetem lukluk ia we i katem evri samting mo i lukluk nomo long ol yut.

Tangkyu dia Presiden Nelson, from glad revelesen rod ia long saed blong ol witnes blong ol baptaes, mo toksave ia we yu askem mifala blong serem blong help blong mekem ol yut oli kam strong moa mo blong oli developem tabu paoa ia we oli save kasem.

Bifo mi serem ol jenis ia, mifala i wantem talem bigfala tangkyu blong mifala from spesel wei ia we ol memba oli bin akseptem ol divelopmen insaed long Restoresen blong gospel ia, we i stap gogohed. Olsem we Presiden Nelson i talem las yia, mi hop se !yu tekem paoa tablet blong yu!1

Yufala i stadi, wetem glad long Kam Folem Mi long hom.2 Yufala i mekem folem ol jenis long jos. Ol memba blong kworom blong ol elda mo ol sista blong Rilif Sosaeti, oli joen wan blong mekem wok blong fasin blong sevem man.3

Tangkyu blong mifala i bigbigwan tumas.4 Mifala i talem tangkyu speseli se ol yut oli gohed blong stap strong mo stap fetful.

Ol yut blong yumi oli stap laef long wan taem we i gud tumas be i fulap long jalenj tu. Ol joes we oli stap strong tumas bitim evri taem. Wan eksampol: smatfon blong tedei i givim rod blong kasem impoten infomesen we i leftemap tingting, olsem famli histri mo ol tabu skripja. Long nara han, i holem ol krangke samting, rabis fasin, mo ivel we yumi no bin gat long taem bifo.

Pikja
Wan kurikulom we Hom i Senta blong Hem
Pikja
Yut aktiviti

Blong helpem ol yut blong yumi blong wokbaot tru long ol plante kaen rod blong ol joes ia, Jos i bin mekem rere trifala bigfala mo strong wok ia. Faswan, kurikulom i kam strong moa mo i go kasem hom. Nambatu, i gat wan program blong ol pikinini mo yut we i tekem ol gudfala aktiviti mo divelopmen blong wanwan, we long las Sandei, Presiden Russel M. Nelson, Presiden M Russel Ballard mo Ol Jeneral Ofisa oli presentem. Wan nambatri wok, i ol jenis long ol oganaesesen blong mekem ol yut, oli kam samting ia we ol bisop mo ol nara lida oli mas lukluk long olgeta nomo. Lukluk ia i mas strong long saed blong spirit mo i mas helpem ol yut blong yumi blong kam ol yut ami we Presiden Nelson i bin askem olgeta blong kam.

Joenjoenem Ol Paten

Olgeta wok ia, tugeta wetem ol wok we yumi bin anaonsem long ol las tu yia, oli no ol seperetwan. Wanwan long ol jenis ia, i pat fulwan blong wan paten we i joenjoen i go, blong blesem Ol Sent, mo mekem olgeta oli rere blong mitim God.

Wan pat blong ol paten ia, hem i long saed blong jeneresen ia we i stap kam antap. Oli askem ol yut blong oli tekem moa responsabiliti olgetawan, taem oli moa yangfala—we papa mo mama, mo ol lida oli no tekova long wanem ol yut oli save mekem olgetawan.5

Anaonsmen

Tedei, mifala i stap anaonsem ol jenis ia long ol oganaesesen blong ol yut long wod mo stek level. Olsem we Presiden Nelson i bin eksplenem, Sista Bonnie H. Cordon bae i tokbaot ol jenis ia blong ol yang woman tedei. Wan long ol stamba tingting blong gat ol jenis ia we bae mi tokbaot naoia, i blong mekem olgeta we oli holem Aronik Prishud, ol kworom mo ol kworom presidensi, oli kam strong moa. Olgeta jenis ia, i mekem praktis blong yumi i laen stret wetem Doktrin mo Ol Kavenan 107:15, we i rid olsem: “Bisoprik i presidensi blong [Aronik] prishud ia, mo i holem ol ki mo atoriti blong prishud ia.”

Wan long diuti blong bisop we i stap long skripja, i blong hem i prisaed ova long ol pris mo blong hem i sidaon long wan kaonsel wetem olgeta, i stap tijim olgeta long saed blong ol diuti blong ofis blong olgeta.6 Antap long hemia, fas kaonsela insaed long bisoprik bae i gat ol spesifik responsabiliti blong lukaot long ol tija, mo seken kaonsela i lukaot long ol dikon.

Folem hemia, blong wok stret wetem revelesen ia insaed long Doktrin mo Ol Kavenan, bae i nomo gat Ol Yang Man presidensi long level blong wod. Ol fetful brata ia oli bin mekem plante gud samting, mo mifala i talem tangkyu long olgeta.

I hop blong mifala se, ol bisoprik, bae oli tokbaot bigwan, mo bae oli lukluk nomo long ol prishud responsabiliti blong ol yang man, mo helpem olgeta long ol kworom diuti blong olgeta. Ol Yang Man advaesa we oli save mekem samting, bae oli singaotem olgeta blong helpem kworom presidensi blong Aronik Prishud mo bisoprik long ol diuti blong olgeta.7 Mifala i gat tras se moa yang man mo yang woman bae oli girap i kam long jalenj ia, mo bae oli stap long kavenan rod ia wetem lukluk ia we i katem evri samting mo luk long ol yut nomo.

Insaed long insperesen paten ia blong Lod, bisop i gat responsabiliti ova long evriwan insaed long wod. Hem i blesem ol papa mo mama blong ol yut, mo tu, ol yut. Wan bisop i faenem se, taem hem i bin stap kaonsel wetem wan yang man we i gat hadtaem wetem ponografi, bae hem i save helpem yang man ia blong sakem sin, nomo sapos hem i helpem papa mo mama blong hem blong mekem samting wetem lav mo andastaning. Hiling blong yang man ia, i wan hiling long famli blong hem, mo hemia i bin posibol tru long bisop we i bin stap wok long bihaf blong ful famli. Yang man ia, naoia i kam wan we i klin inaf blong holem Melkesedek Prishud, mo i wan fultaem misinari.

Olsem we stori ia i talem, ol jenis ia bae oli:

  • Helpem ol bisop mo tufala kaonsela blong hem, long stamba responsabiliti blong olgeta long ol yut mo ol Praemeri pikinini.

  • Putum paoa mo diuti blong Aronik Prishud i stap long senta blong pesonol laef mo gol blong wanwan yang man.

Ol jenis ia, oli mekem hemia tu:

  • Oli lukluk moa long ol responsabiliti blong kworom presidensi blong Aronik Prishud, mo oli ripot daerek i go long bisoprik.

  • Oli pusum ol adalt lida blong helpem mo tijim tingting blong ol presidensi blong Aronik Prishud kworom blong oli wok strong moa long paoa mo atoriti blong ofis blong olgeta.

Olsem we mi talem finis, ol jenis ia oli no daonem responsabiliti we bisoprik i gat long ol yang woman. Olsem we Presiden Nelson i jes tijim: “Fas mo bigfala responsabiliti blong bisop, i blong kea long ol yang man mo ol yang woman long wod blong hem.”8

?Olsem wanem nao ol bisop ia we oli wokhad mo yumi lavem oli mekem responsabiliti ia? Olsem we yufala i tingbaot, long 2018, oli bin stretem ol Melkesedek Prishud kworom blong oli wok kolosap moa wetem ol Rilif Sosaeti, blong mekem se ol kworom blong ol elda mo ol Rilif Sosaeti, anda long daereksen blong bisop, oli save tekem ol impoten responsabiliti we i bin stap kakae fulap taem blong hem. Ol responsabiliti ia, oli misinari wok,mo wok blong tempol mo famli histri insaed long wod9— plante long ol givhan wok i go long ol memba blong wod.

Pikja
Ol responsabiliti blong wan bisop

Bisop, i no save givimaot samfala responsabiliti, olsem blong mekem ol yut oli kam strong moa, stap wan jeneral jaj, kea long olgeta long nid, mo luk ova long faenens mo ol afea long saed blong laef ia. Be, olgeta wok ia, oli moa smol bitim wanem we maet yumi bin stap andastanem bifo. Olsem we Jeffrey R. Holland i bin eksplenem las yia taem oli i gat ol jenis long ol kworom blong Melkesedek Prishud: “Ol bisop, yes, oli stap yet olsem prisaeding hae pris blong wod. Be niufala jenis ia [blong Melkesedek Prishud mo Rilif Sosaeti] i mas letem hem i prisaed ova long wok blong Melkesedek Prishud mo Rilif Sosaeti mo i no askem hem blong mekem wok long eniwan long ol bodi ia.”10

I olsem. Wan Rilif Sosaeti presiden mo wan presiden blong kworom blong ol elda, olsem we oli givim wok long tufala, i tekem bigfala moa rol blong stap kaonsel wetem ol adalt—semmak olsem wan Yang Woman presiden i stap kaonsel wetem ol yang woman. Nomata se bisop nomo i stap olsem wan jeneral jaj, olgeta lida ia, olgeta tu oli gat raet long revelesen we i kam long heven, blong oli help wetem ol jalenj we oli no nidim wan jeneral jaj, o i no abaot eni kaen abius.11

Hemia i no minim se wan yang woman i no save, o i no sapos blong toktok long bisop o papa mo mama blong hem. !Lukluk blong olgeta i mas stap long ol yut! Be, i minim se wan Yang Woman lida bae i beswan blong mitim ol nid blong wan yang woman ia. Bisoprik i wari long ol yang woman semmak olsem ol yang man, be mifala i luksave paoa we i kam taem yumi gat ol Yang Woman lida we oli strong, oli givim ful tingting mo oli gat maen we i stret, we oli lavem mo tijim tingting, oli no tekova long ol rol blong ol klas presidensi, be oli stap helpem ol yut blong gat sakses long ol rol ia.

Sista Cordon bae i serem sam moa gudfala jenis ia blong ol yang woman tedei. Be, mi anaonsem se ol presiden blong Ol Yang Woman long wod, naoia bae oli ripot mo kaonsel stret wetem bisop blong wod. Long bifo, wok ia oli bin save givim long wan kaonsela, be taem yumi stap go, ol yang woman bae oli kam wan stret responsabiliti blong hemia we i holem ol prisaeding ki blong wod. Rilif Sosaeti bae i gohed blong ripot i go stret long bisop.12

Long jeneral mo stek level, bae yumi gohed blong gat ol presidensi blong Ol Yang Man. Long level blong stek, wan hae kaonsela bae i presiden blong Ol Yang Man,13 wetem ol hae kaonsela we oli gat wok blong lukaot long Ol Yang Woman mo Praemeri, bae i pat blong stek Aronik Prishud—Yang Woman Komiti. Ol brata ia, bae oli wok wetem stek Yang Woman presidensi, long komiti ia. Wetem wan kaonsela long stek presiden we i jeaman, komiti ia bae i kam moa impoten from plante long ol niu program mo aktiviti insaed long niu wok blong Ol Pikinini mo Ol Yut, long level blong stek.

Ol hae kaonsela ia, anda long daereksen blong stek presidensi, oli save stap olsem wan risos long bisop mo kworom blong Aronik Prishud long wan wei we i semmak long seves ia we ol hae kaonsela oli givim long ol kworom blong ol elda long wod.

Wan nara samting we i joen wetem, wan nara hae kaonsela bae i stap olsem stek Sandei Skul presiden, mo, taem i nid, i save stap long stek Aronik Prishud—Yang Woman komiti.14

Bae oli eksplenem sam moa oganaesesen jenis long ol infomesen we bae oli sendem i go long ol lida. Olgeta jenis ia, i gat:

  • Bisoprik yut komiti miting bae i nomo gat, mo wod yut kaonsel i tekem ples.

  • Toktok ia, “Miutuol” bae i nomo gat, mo bae i kam “Yang Woman aktiviti,” “Aronik Prishud kworom aktiviti,” o “yut aktiviti” mo bae oli holem evri wik sapos i posibol.

  • Wod bajet blong ol yut aktiviti, oli mas serem i stret bitwin ol yang man mo ol yang woman folem namba blong ol yut insaed long wanwan oganaesesen. Wan mane we bae i inaf bae oli givim i go long Ol Praemeri aktiviti.

  • Long evri level—wod, stek, mo jeneral—bae yumi yusum toktok ia, “oganaesesen” be i nomo toktok ia, “okseleri.” Olgeta we oli lidim Jeneral Rilif Sosaeti, Yang Woman, Yang Man, Praemeri, mo Sandei Skul oganaesesen, bae oli save olgeta olsem “Ol Jeneral Ofisa.” Olgeta we oli lidim ol oganaesesen ia long wod mo stek level, bae oli save olgeta olsem “ol wod ofisa,” mo “ol stek ofisa.”15

Jenis ia we mifala i anaonsem tedei, bae i stat stret long taem we ol branj, ol wod, ol distrik, mo ol stek oli rere, be i mas wok fulwan stat long namba 1 Jenuware 2020. Ol jenis ia, taem oli kombaenem mo yusum wetem ol fasfala jenis, i ripresentem wan hadwok long saed blong spirit mo long oganaesesen we i go wetem doktrin blong blesem evri man, woman, yut, mo pikinini, mo mekem evriwan i kam strong moa, i helpem wanwan blong folem eksampol blong Sevya blong yumi, Jisas Kraes, taem yumi stap progres long kavenan rod ia.

Ol dia brata mo sista. Mi promesem yufala mo testifae se ol ful mo bigfala jenis ia, anda long daereksen blong wan presiden mo profet we i gat insperesen, Russel M. Nelson, bae i givim paoa mo mekem evri memba blong Jos i kam strong moa. Ol yut blong yumi bae oli developem moa bigfala fet long Sevya, gat proteksen long ol temtesen blong enemi, mo stanap rere blong mitim ol jalenj blong laef. Long tabu nem blong Jisas Kraes, amen.

Ol Not

  1. Luk long Russell M. Nelson, insaed long “Latter-day Saint Prophet, Wife and Apostle Share Insights of Global Ministry,” Newsroom, Oct. 30, 2018, newsroom.ChurchofJesusChrist.org.

  2. Antap long hemia, yufala i bin mekem ol spesifik hadwok blong yusum stret nem blong Jos olsem we Presiden Russel M. Nelson i talem mo yufala i bin hadwok blong tingbaot Sevya blong yumi wetem lav mo respek, olsem we yufala i stap mekem.

  3. “Ol memba blong Jos Ia blong Jisas Kraes oli sendem olgeta blong ‘wok long plantesen blong hem blong mekem wok blong sevem ol sol blong ol man’ (Doktrin mo Ol Kavenan 138:56). Wok ia blong fasin blong sevem man i tekem memba misinari wok, holemtaet ol konvet, karembak ol lesaktiv memba, tempol mo famli histri wok, mo tijim gospel. Bisoprik i lidim wok ia insaed long wod, wetem help blong ol nara memba blong wod kaonsel” (Hanbuk 2: Lukaotem mo Lidim Jos 5.0, ChurchofJesusChrist.org).

  4. Olsem ol lida, mifala i lavem ol memba blong Jos Ia blong Jisas Kraes blong Ol Lata-dei Sent, from gud fasin blong olgeta mo fasin we oli stap olsem disaepol. Mifala i presem wanwan man mo woman, ol mama, ol papa, ol yut, mo ol pikinini we oli stap wokbaot long kavenan rod ia—mo mekem olsem wetem strong tingting mo glad.

  5. Long 2019, ol dikon we oli gat 11 yia oli stat blong pasem sakramen, mo ol yang woman blong 11 yia wetem ol yang man, oli kasem ol limit yus tempol rekomen. Las yia, Presiden Nelson i bin givim jalenj long ol yang man mo woman blong oli pat blong yut ami blong mekem Isrel we i seraot i kam tugeta long tugeta saed blong vel (luk long “Hope of Israel” [worldwide devotional for youth, June 3, 2018], HopeofIsrael.ChurchofJesusChrist.org). Wanem i kamaot long hemia i bigwan tumas.

    Naoia, ol fultaem misinari oli givim seves long wan spesel wei evriwan, nomata oli yangfala. Stat long 6 Oktoba 2012, ol yang man oli save go long misin taem oli gat 18 yia mo ol yang woman, taem oli gat 19 yia.

  6. Mo tu, diuti blong presiden ova long Prishud blong Eron, i blong prisaed ova long ol pris, mo blong sidaon long kaonsel wetem olgeta, blong tijim olgeta long ol diuti blong ofis blong olgeta … Presiden ia, hem i mas wan bisop; from hemia i wan long ol diuti blong prishud ia” (Doktrin mo Ol Kavenan 107:87–88).

  7. Ol adalt lida bae oli singaotem olgeta tu olsem ol kworom speselis blong Aronik Prishud, blong save help wetem ol program mo ol aktiviti, mo blong go long ol kworom miting blong mekem se bisoprik i save visitim klas blong Ol Yang Woman oltaem, wetem ol aktiviti, mo wanwan taem i go visitim Praemeri. Sam speselis, oli save singaotem olgeta blong help wetem ol spesel taem, olsem kamp; ol narawan, oli save singaotem olgeta long wan moa longfala seves blong helpem ol advaesa blong kworom. Oltaem bae i gat tufala adalt man long wanwan miting blong kworom, program, o aktiviti. Nomata se ol rol mo ol taetol oli jenis, yumi no luk se namba blong ol adalt man we oli givim seves mo sapotem ol kworom blong Aronik Prishud bae i go daon.

  8. Russell M. Nelson, “Ol Witnes, Ol Aronik Prishud Kworom, mo Ol Klas blong Ol Yang Woman,” Liahona, Nov. 2019, 39, oli ademap italik; luk tu long Ezra Taft Benson, “To the Young Women of the Church,” Ensign, Nov. 1986, 85.

  9. Mifala i stap advaesem tu ol bisop blong spendem moa taem wetem ol yang singgel adalt memba mo famli blong olgeta.

  10. Jeffrey R. Holland, jeneral konfrens miting, Epril 2018; luk tu long “Wok blong Givhan we I Wok,” ministering.ChurchofJesusChrist.org. Elda Holland i bin tijim se ol responsabiliti blong bisop, Hem i no save givimaot, olsem hemia blong prisaed ova long ol kworom blong Aronik Prishud, mo ol yang woman, stap olsem wan jeneral jaj, lukaot long ol faenens mo ol afea blong Jos long laef long wol ia, mo kea long olgeta we oli pua mo olgeta long nid. Ol presidensi blong kworom mo Rilif Sosaeti, mo ol narawan oli save tekem ol fas responsabiliti blong misinari wok, tempol mo famli histri wok, kwaliti blong tijing insaed long wod, mo blong lukaotgud mo givhan long ol memba blong Jos.

  11. Antap long ol situesen we i nidim ol ki blong stap wan jeneral jaj, ol problem blong eni kaen abius, bae ol bisop oli mas handelem folem polisi blong Jos.

  12. Stek Rilif Sosaeti presiden bae i gohed blong ripot i go stret long stek presiden.

  13. Ol stek kaonsela blong presiden blong Ol Yang Man, bae oli save singaotem hem aot long membasip blong stek, o, olsem we i nid, i save wan hae kaonsela we i lukaot long Ol Yang Woman, mo i hae kaonsela we i lukaot long Praemeri.

  14. Brata ia we i stap olsem Sandei Skul presiden, i gat hae responsabiliti ia blong lukaot long yut kurikulom long tufala Sandei long wanwan manis.

  15. Ol presidensi blong Jeneral Rilif Sosaeti, Yang Woman, Yang Man, Sandei Skul , mo Praemeri oganaesesen long level blong jeneral mo stek, bae oli ol Jeneral Ofisa o ol stek ofisa. Long level blong wod, bisoprik i lidim ol yang man, blong mekem se ol yang man advaesa oli no ol wod ofisa.