Ol Kavenan Woman we Oli Patna Wetem God

Mi mi glad tumas from blesing ia blong toktok long yufala, ol kavenan gel blong God. Tedei long naet, stamba tingting blong mi i blong leftemap tingting blong yu long bigfala seves we Lod i singaotem yufala long hem. Yes, evri gel blong God we i stap lisin long voes blong mi, i bin kasem wan koling we i kam long Lod.

Koling blong yu i bin stat taem yu kam long wol ia, long wan ples mo wan taem we God i jusum from Hem i save gud yu mo i lavem yu olsem gel blong Hem. Long spirit wol, Hem i bin save yu mo i bin tijim yu, mo i bin putum yu long ples we bae yu gat janis, we i no tumas long histri blong wol, blong oli invaetem yu long wan ples blong baptaes. Long ples ia, bae yu harem ol toktok ia we wan wokman we Jisas Kraes i singaotem hem, i talem: “From Jisas Kraes i givim raet long mi, mi baptaesem yu long nem blong Papa, mo long nem blong Pikinini, mo long nem blong Tabu Spirit. Amen.”¹

Taem we yu bin kamaot long wota, yu bin akseptem wan nara koling, blong givim seves. Olsem wan niu kavenan gel blong God, yu bin mekem wan promes, mo yu bin kasem wan wok insaed long Jos Ia blong Jisas Kraes blong Ol Lata-dei Sent, we oli bin konfemem se yu kam wan memba blong hem. Yu bin kavenan wetem God blong tekem long yuwan, nem blong Jisas Kraes, blong obei ol komanmen blong Hem, mo wok blong Hem.

Long wanwan long yumi we i mekem olgeta kavenan ia, wok we Lod i singaotem hem blong mekem, i fit stret long hem. Ol kavenan gel mo boe blong God, evriwan ia oli serem wan koling we i impoten mo i gat glad long hem. Hem i blong givim seves long ol narawan long bihaf blong Hem.

Taem hem i stap toktok long ol sista, Presiden Russell M. Nelson i bin talem sot abaot wok ia we Lod i stap singaotem yu blong yu joenem Hem long hem. Presiden Nelson i tokbaot koling ia blong yufala, long wei ia: “Lod i talem: ‘From luk, hemia i wok mo glori blong mi—blong mekem man i nomo save ded mo i kasem laef we i no save finis.’ (Moses 1:39.) Mekem se strong gel disaepol blong Hem i rili save talem: “Wok mo glori blong mi i blong helpem olgeta we mi lavem blong oli kasem gol ia long heven.”

“Blong helpem wan nara man o woman blong kasem ful selestial paoa blong hem, i pat blong tabu misin blong wan woman. Olsem wan mama, tija, o sent we i fidim wan, hem i sepem graon ia we i stap laef, blong i tekem sep blong ol hop blong hem. Olsem wan patna wetem God, tabu misin blong hem i blong helpem laef mo sol blong ol spirit blong oli kam antap. Hemia mak blong kriesen blong hem. Hem i mekem man i harem gud, i kam antap mo i kam olsem wan god.”²

Bae yu no save se wetaem, o blong hamas taem, misin blong yuwan bae i lukluk nomo long seves long ol koling olsem mama, lida, o givhan sista. Lod, from i lavem yu, i no givim joes ia long yumi abaot taem, hamas taem, o oda blong ol wok we yu gat blong mekem. Yet, yu save tru long ol skripja mo ol profet we oli stap laef se evriwan long ol wok ia bae i kam, long laef ia, o long nekis laef, long evri gel blong God. Mo evriwan long olgeta koling ia, oli blong rere blong laef we i no save finis insaed long ol famli we i gat lav—“we i hae presen olgeta we i kam long God.”³

Bae yu waes blong mekem evri hadwok blong rere naoia, wetem en i stap long maen blong yu. Wok ia, i kam simpol moa from se wanwan long ol wok ia, i nidim semfala wei mo taem blong rere.

Bae yumi stat wetem wok ia blong stap olsem wan givhan sista. Nomata yu gat wok ia olsem wan 10 yia gel insaed long wan famli we papa i ded, o olsem wan Rilif Sosaeti presiden we faea i kakae taon blong hem, o taem yu stap kam oraet afta wan operesen long hospital—yu gat wan janis blong mekem koling blong yu we i kam long Lod, blong yu stap olsem wan givhan gel blong Hem.

Olgeta ia, yu luk se oli ol defren givhan wok. Be yet, evriwan i nidim blong oli gat wan hat we i rere, i gat paoa, i gat lav, mo wan fet we i no gat fraet se Lod i no save givim komanmen sapos Hem i no rere wan wei, mo bigfala hat blong wantem go mo mekem samting long bihaf blong Hem.⁴

From se hem i rere, 10 yia gel ia i putum han blong hem raon long wido mama blong hem, mo i prea blong save hao blong helpem famli blong hem. Mo hem i gohed blong prea.

Rilif Sosaeti presiden i bin rere blong givhan bifo faea i kam long eria blong hem. Hem i kam blong save mo lavem ol pipol. Fet blong hem long Jisas Kraes i bin gro ova ol yia from hem i bin kasem ol ansa long ol prea blong hem blong Lod i helpem hem long ol smol seves long bihaf blong Hem. From hem i rere longtaem finis i kam, hem i bin rere mo i wantem tumas blong oganaesem ol sista blong hem blong givhan long ol pipol mo ol famli long hadtaem.

Wan sista we i stap kam oraet long wan hospital from oli operetem hem, i bin rere blong givhan long ol nara sikman. Hem i bin spendem wan laeftaem blong givhan long bihaf blong Lod long evri strenja olsem se oli wan neba mo wan fren. Taem hem i bin filim, insaed long hat blong hem, singaot ia blong givhan long hospital, hem i strong blong givim seves long ol narawan, mo wetem bigfala lav, mekem se ol nara sikman oli no wantem se bae hem i kam oraet kwik.

Long sem wei we yu stap rere blong givhan, yu save mo mas rere from koling blong yu blong kam wan lida long bihaf blong Lod, taem we taem i kam. I nidim fet long Jisas Kraes, we rus blong hem i stap long dip lav blong yu long ol skripja blong lidim ol pipol mo tijim toktok blong Hem we yu no gat fraet. Afta, bae yu rere blong gat Tabu Spirit olsem kompanion blong yu oltaem. Bae yu wantem tumas blong talem: “Bae mi mekem” taem kaonsela blong yu long Yang Woman presidensi i talem, wetem fraet long voes blong hem: “Sista Alvares i sik tedei. ?Hu bae i tijim klas blong hem?”

I nidim sem kaen fasin blong rere from naes dei taem Lod i singaotem yu long wok ia olsem wan mama. Be bae i tekem iven moa lav insaed long hat bitim we yu bin nidim bifo. Bae i tekem fet long Jisas Kraes we i bitim hemia we i bin stap bifo insaed long hat blong yu. Mo bae i nidim paoa blong prea from Tabu Spirit i lidim tingting, i daerektem mo kamfotem yu i bitim wanem we yu bin filim se bae i posibol.

I stret blong yu askem se, olsem wanem nao, wan man, nomata yia blong hem, bae i save wanem ol mama oli nidim. I wan gud kwestin. Ol man oli no save evri samting, be mifala i save lanem sam lesen tru long revelesen we i kam long God. Mo mifala i save lanem fulap samting taem mifala i luk samting, taem mifala i tekem taem blong askem Spirit blong helpem mifala blong andastanem wanem mifala i stap luk.

Mi bin stap lukluk Kathleen Johnson Eyring blong 57 yia we mitufala i mared. Hem i mama blong fo boe mo tu gel. Kasem tedei, hem i bin akseptem koling ia blong stap wan mama we i lidim tingting blong moa blong wan handred stret memba blong famli, mo plante handred moa we hem i adoptem insaed long mama hat blong hem.

Yu tingbaot stret wei we Presiden Nelson i tokbaot tabu misin blong wan woman—wetem misin blong woman blong stap wan mama: “Olsem wan mama, tija, o sent we i fidim wan, hem i sepem graon ia we i stap laef, blong i tekem sep blong ol hop blong hem. Olsem wan patna wetem God, tabu misin blong hem i blong helpem ol spirit blong oli laef, mo leftemap sol. Hemia mak blong kriesen blong hem.”⁵

Folem hamas mi save luksave, waef blong mi, Kathleen, i bin mekem folem responsabiliti ia we Papa blong yumi i givim long ol gel blong Hem. Long mi, ki i stap long ol toktok ia: “hem i sepem graon ia we i stap laef, blong i tekem sep blong ol hop blong hem … wetem God olsem patna blong hem.” Hem i no fos. Hem i sepem. Hem i gat wan paten blong folem from ol hop blong hem, mo hem i traem blong sepem olgeta we hem i lavem mo lukaot olsem wan mama. Paten ia, i gospel blong Jisas Kraes—olsem we mi bin save luk, wetem prea, ova long ol yia.

Blong kam wan kavenan woman we i patna wetem God, i wei we ol hae mo gud gel blong God oli bin stap olsem mama, oli lidim mo givhan, mo oli givim seves long eni wei mo eni ples we God i bin mekem rere blong olgeta. Mi promes se bae yu faenem glad long wokbaot blong yu i gobak long hom long heven, taem yu gobak long Hem olsem wan gel blong God we i kipim kavenan.

Mi testifae se God Papa i stap laef mo Hem i lavem yu. Bambae Hem i ansarem ol prea blong yu. Pikinini blong Hem we Hem i Lavem, i lidim, long evri smol ditel Jos Ia blong Jisas Kraes blong Ol Lata-dei Sent. Presiden Russell M. Nelson, i profet blong yumi we i stap laef. Mo Josef Smit i bin luk mo toktok wetem God Papa, mo wetem Jisas Kraes long wan bus blong ol tri long Palmaera, Niu Yok. Mi save se hemia i tru. Mi testifae tu se Jisas Kraes i Sevya blong yu’ Hem i lavem yu. Mo tru long Atonmen blong Hem, yu save kam klin evriwan, mo i tekem yu i go long ol hae mo tabu koling we bae i kam long yu. Mi testifae olsem long tabu nem blong Jisas Kraes, amen.