Blong Save, Blong Lavem, mo Blong Gro
Bae yumi evriwan i kam blong andastanem pat blong yumi long bigfala givhan wok ia, blong yumi kam moa olsem Hem.
Long 2016, Tabenakol Kwaea long Tempol Skwea oli kam visitim Nedelan mo Beljiom. Mo from se mi bin tekempat long naesfala program ia, mi bin gat janis blong enjoem miusik blong olgeta tu taem.
Long taem blong so, mi bin tingting abaot wan bigfala wok we i blong blong muvum wan kwaea blong wan bigfala saes olsem. Maen blong mi i bin gobak long bigfala gong plet we i bin had mo ating i sas tumas blong sendem i go mo bitim vaeolin, trampet, o nara tul blong miusik we yu save karem nomo andanit long han blong yu. Be taem mi lukluk long ril pat blong gong plet ia, mi luksave se oli kilim hem wanwan taem nomo, be ol nara smol tul blong miusik, oli tekpat moa long ful konset. Mi tingtingbak se, sapos i nogat noes blong gong plet ia, bae saon blong miusik ia bae i no semmak mo plante hadwok i mas hapen blong muvum bigfala gong plet ia i go krosem solwota.
Samtaem bae yumi filim olsem gong plet ia, yumi gud nomo blong plei wan smol pat long saon blong miusik. Be bae mi talem long yu se saon blong yu i mekem bigfala jenis.
Yumi nidim evri tul blong miusik. Sam long yumi oli lanem samting i isi nomo mo oli mekem gud long skul, be ol narawan oli gat ol talen long saed blong miusik. Sam oli krietem mo bildim samting o lukaot long ol narawan, protektem, o tijim ol narawan. Yumi nidim evriwan blong karem kala mo mining i kam long wol ia.
Long olgeta we oli filim se oli nogat eni samting blong kontribiut long hem, o biliv se oli no impoten, o oli ting se oli no gud inaf long eniwan, blong ol narawan we oli filim se oli stap long top blong wol, mo eniwan long medel, mi laekem blong tokbaot mesej ia.
Wea ples we yu stap wokbaot long rod blong laef, sam long yufala oli filim se yu fulap long ol harem nogud we i mekem se yu no save luk yuwan long rod ia. mi wantem blong invaetem yu blong kamaot long tudak i go long laet. Laet blong gospel bae i givim wom filing mo hiling mo bae i helpem yu blong andastanem stret huia yu mo wanem nao stamba tingting blong yu long laef ia.
Sam long yumi oli stap yet long rod we i no stret mo traem blong faenem hapines long ples ia.
Papa long Heven we i gat lav i stap invaetem yumi blong wokbaot long rod blong stap olsem wan disaepol mo blong gobak long Hem. Hem i lavem yu wetem wan lav we i stret evriwan.1
?Wanem nao hem i rod? Rod ia i blong helpem wanwan long yumi blong andastanem huia nao yumi, tru long wok blong givhan long wanwan long yumi.
Long mi, fasin blong givhan i blong eksasaesem tabu lav.2 Long wei ia yumi krietem envaeromen we tugeta, man we i givim mo man we i kasem, tufala i kasem wan tingting blong wantem blong sakem sin. Long nara toktok, yumi jenisim rod blong yumi mo kam kolosap long mo kam moa olsem Sevya Jisas Kraes.
Eksampol, i no nid blong oltaem talem long woman o man blong yu o ol pikinini long wea ples oli save kam antap long hem; oli save hemia finis. Hem i taem yumi krietem envaeromen blong lav we bae oli kasem paoa blong mekem ol jenis we oli impoten long laef blong olgeta mo kam moa gud pipol.
Long wei ia, sakem sin i kam wan evri dei proses blong karemaot ol nogud fasin, we bae i tekem tu fasin blong talem sore from ol pua fasin. Mi tingbaot mo eksperiensem yet ol situesen we mi bin kwik blong jajem man o slo blong lisin. Mo long naet, taem mi mekem prea blong miwan, mi filim wan kaonsel we i kam wetem lav long heven blong sakem sin mo kam moa gud. Envaeromen we papa mo mama blong mi i krietem faswan, brata, mo sista mo afta tru long waef blong mi, ol pikinini, mo tu ol fren oli bin helpem mi blong kam wan moa gud man.
Yumi evriwan i save wea ples yumi save mekem moa gud long hem. I nogat nid blong ripripitim mo rimaenem wanwan long yumi, be i gat nid blong lavem mo givhan long wanwan long yumi mo taem yu mekem, i givim ples blong wan tru jenis.
Long semmak envaeromen yumi lanem stret huia nao yumi mo wanem nao wok blong yumi long las japta blong histri blong wol bifo Sevya bae i kambak blong seken kaming.
Sapos yu stap lukaotem pat blong yu, mi laekem blong invaetem yu blong faenem wan ples we yu save stap yuwan mo askem Papa long Heven blong letem yu save wanem pat nao bae yu plei long hem. Ansa bae i kam sloslo mo afta bae i kam klia moa taem yumi putum leg blong yumi strong moa long rod blong kavenan mo givhan.
Yumi stap eksperiensem sam long ol semmak hadtaem we Josef Smit i bin fesem taem hem i stap “long medel blong wo ia blong ol toktok mo raorao blong ol tingting.” Taem yumi rid long stori blong hemwan, plante taem, hem bin askem hemwan: ?Wanem nao i nid blong mekem? ?Huia long ol grup ia i raet; o, ?olsem wanem? ?Ating evriwan long olgeta oli rong? Sapos i gat eniwan long olgeta we i raet, ?wijwan ia nao long olgeta, mo olsem wanem nao bambae mi save?”3
Hem i mekem wanem i stap long Buk blong Jemes: “Sapos wan long yufala i no gat waes, hem i mas askem God blong i givim waes long hem, nao God bambae i save givim long hem from we fasin blong Hem i no save tok nogud long man we i askem samting, mo hem i stap givim long ol man long gladhat blong hem.”4 Josef “long en i mekem tingting blong ‘askem God.’”5
Yumi rid folem se i “bin fas taem long laef blong hem, blong traem mekem wan samting olsem, from long medel blong ol wari blong hem, hem i neva bin traem yet blong talem prea.”6
Mo hemia i save stap olsem fas taem blong yumi blong yumi toktok wetem Man we i Krietem yumi long wei we yumi neva mekem bifo.
From wanem Josef i traem, Papa long Heven mo Pikinini blong Hem, Jisas Kraes, oli bin kamaot long hem, singaotem hem long nem blong hem, mo olsem risal, yumi gat wan moa klia save long huia nao yumi stret mo wanem we yumi stap mekem oli impoten tumas.
Yumi rid folem se long yang yia blong hem, “olgeta we oli sapos stap olsem ol fren blong [Josef,] oli bin tritim nogud hem mo oli no tekem gud kea long hem.7 Mo tu yumi save fesem fasin blong go agens taem yumi stap folem laef ia blong stap olsem wan disaepol.
Sapos yu stap filim naoia se yu no tekem pat long miusik ia o rod blong sakem sin i had tumas long yu, plis save se sapos yumi stap long hem, ol harem nogud bae oli karemaot long ol solda blong yumi mo bae i gat laet bakegen. Papa long Heven bambae i neva lego yumi taem yumi go long Hem. Yumi save foldaon mo girap mo bae Hem i helpem yumi brasem aot ol toti long ol ni blong yumi.
Sam long yumi oli kasem kil, be fas tul blong help blong Lod i gat bandej we i bigwan inaf blong kavremap evri kil ia blong yumi.
Hem i lav ia nao, lav ia we i nogat en we yumi singaotem bigfala lav o stret lav blong Kraes,8 we ol hom blong yumi oli nidim taem papa mo mama i givhan long ol pikinini blong tufala mo ol pikinini oli givhan long papa mo mama. Ol hat bae oli jenis mo ol samting we yumi wantem bae oli bon folem tingting blong Hem.
Hem i lav ia nao we yumi nidim long ol wok blong yumi wetem ol narawan olsem ol pikinini blong Papa long Heven mo ol memba blong Jos blong Hem we bae i letem yumi blong tekem evri tul blong miusik i kam insaed long miusik blong yumi blong mekem se bae yumi save tekempat wetem bigfala glad wetem kwaea blong ol enjel blong heven taem Sevya bae i kambak bakegen.
Hem i lav ia nao, laet ia we i nid blong i saen mo i laet moa raonem ol ples blong yumi taem yumi go aot long laef blong yumi blong evri dei. Ol pipol bae oli luk save laet ia mo bae oli kam kolosap long yu. Hemia i kaen misinari wok ia we bae pulum ol narawan blong “kam mo luk, kam mo help, mo kam mo stap.”9 Plis, taem yumi kasem witnes blong yumi abaot bigfala wok ia mo pat blong yumi insaed long hem, bae yumi stap glad tugeta wetem profet blong yumi Josef Smit we yumi lavem tumas taem hem i talem, “From mi bin luk wan visen, Mi save hemia, mo mi save se God i save hemia, mo mi no save talem se i no tru.”10
Mi testifae long yu se mi save huia mi mo mi save huia yu. Yumi ol stret pikinini blong Papa long Heven we i lavem yumi. Mo Hem i no sendem yumi kam long ples ia blong lus, be blong yumi gobak wetem bigfala glori long Hem. Se bae yumi kam blong save ol pat blong yumi long bigfala wok blong givhan blong mekem se yumi save kam moa olsem Hem taem Hem i kambak bakegen, hem i prea blong mi long nem blong Jisas Kraes, amen.