Wan Tras we I Semmak Oltaem mo I Wantem Gohed
Blong trastem Lod i tekem tu blong trastem taem blong Hem mo i nidim longfala tingting mo fasin blong stap strong we i save winim ol strong win blong laef.
Boe blong mitufala Daniel i bin sik tumas long misin blong hem long Afrika mo oli bin karem i go long wan hospital we i no gat tumas risos long hem. Taem mitufala i ridim leta blong hem we hem i raetem long mitufala afta long sik blong hem, mitufala i ting se bae tingting blong hem i foldaon, be no, hem i raetem, “Iven taem mi stap ledaon long imejensi rum, mi filim pis.” Mi neva bin hapi semmak oltaem olsem mo wantem blong gohed long laef blong mi.”
Taem waef blong mi mo mi i ridim ol toktok ia, filing blong krae i kam fulap long mitufala. Wan Tras we I Semmak Oltaem mo I Wantem Gohed Mitufala i neva harem oli tokbaot hapines long wei ia, be ol toktok blong hem oli tru. Mitufala i save se hapines we hem i tokbaot i no nomo blong harem gud, o i wan gudfala taem, be i wan pis mo glad we i kam taem yumi sarenda yumiwan long God mo putum tras blong yumi long Hem long evri samting.1 Yumi tu, yumi gat ol taem ia long laef blong yumi taem God i toktok pis long sol blong yumi mo mekem yumi blong gat hop long Kraes iven taem laef i had mo i no sua.2
Lihae i tijim se, sapos Adam Mo Iv i no bin foldaon “bae oli stap long wan ples we oli no gat rong from oli no save samting, oli no gat glad, from oli no save wanem i bigfala harem nogud; …
“Be luk, evri samting i bin hapen long waes tingting blong hem we i save evri samting.
“Adam i bin foldaon blong mekem se man i save stap; mo ol man oli stap, blong oli save gat glad.”3
Long wan nara wei, ol hadtaem mo ol bigfala harem nogud oli mekem yumi rere blong eksperiensem glad sapos yumi trastem Lod mo plan blong Hem blong yumi. Trutok ia wan poet blong 13 senturi i putum long wan naes wei: “Harem nogud i rere yu blong stap glad. Hem i swipim wetem kros evri samting aot long haos blong yu, blong mekem se niufala glad i save faenem spes blong kam insaed. I seksekem ol yelo lif long branj blong hat blong yu, blong mekem se, niu, grin lif i save gro long ples blong olgeta. I pulumaot i kam antap ol roten rus, blong mekem se ol niu rus andanit oli gat rum blong gro. I nomata wanem harem nogud i seksekem hat blong yu, ol moa gud samting bae oli tekem ples blong olgeta.”4
Presiden Russell M. Nelson i tijim: “Glad ia we Sevya i givim long yumi, i stap oltaem, i talem gud long yumi se ‘ol hadtaem blong yumi bae oli blong smol taem nomo’ [Doktrin mo Ol Kavenan 121:7] mo i blong gud blong yumi.”5 Ol tes mo ol hadtaem blong yumi oli save mekem spes blong wan glad we i moa bigwan.6
Gud nius blong gospel i no promes blong wan laef we i fri long harem nogud mo hadtaem, be wan laef we i fulap long stamba tingting mo mining—wan laef we ol bigfala harem nogud mo ol hadtaem blong yumi, “glad blong Kraes i kavremap olgeta.”7 Sevya i talem: “Long wol, ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis.”8 Gospel blong Hem i mesej blong hop. Bigfala harem nogud we i go wetem hop long Jisas Kraes i holem promes blong wan glad we i stap strong.
Stori blong wokbaot blong Ol Man blong Jared we oli krosem solwota i go long graon blong promes, yumi save komperem long wokbaot blong yumi tu i go long laef long wol ia. Lod i promesem brata blong Jared mo ol pipol blong hem se bae hem i “go fored blong [olgeta] long wan graon we i moa gud bitim evri graon blong wol.”9 Hem i komandem olgeta blong bildim ol sip, mo oli bin obei mo go wok blong bildim olgeta folem instraksen blong Lod. Be, taem wok i stap gohed, brata blong Jared i stap wari se plan blong Lod blong ol sip ia i no inaf. Hem i prea long Lod:
“O Lod, mi bin mekem wok ia we yu talem long mi blong mekem, mo mi bin mekem ol sip ia folem wanem we yu bin talem long mi.
“Mo luk, O Lod, insaed long olgeta i no gat eni laet.”10
“O Lod, ?bae yu letem se bae mifala i krosem bigfala wota ia long tudak?”11
?Yu bin kapsaetem sol blong yu long God long wei ia finis? Taem yumi traehad blong laef olsem Lod i komandem mo ol tingting we oli stret mo gud oli no gat ansa, ?yu neva askem yuwan se ating bae yu go tru long laef long tudak nomo?12
Brata blong Jared i tokbaot wan moa bigfala wari long saed blong olsem wanem bae oli save laef insaed long ol sip ia. Hem i prea mo talem: “Mo tu, mifala bae i ded, from insaed long olgeta, bae mifala i no save pulum win, be win we i stap insaed long olgeta nomo”13 Ol hadtaem blong laef oli mekem i had long yu blong pulum win mo mekem yu blong tingting, ?olsem wanem yu save mekem tru long dei ia, mo tu, blong save gobak long hom blong yu long heven?
Lod i bin wok wetem brata blong Jared blong ansarem wanwan wari blong hem, mo afta, Hem i eksplenem: “From yu no save krosem bigfala dip solwota ia, sapos mi no mekem rere wan wei blong yufala] agensem ol wef blong solwota, mo ol win we oli blo i go, mo ol wota we bae oli kam antap bigwan.”14
Lod i mekem i klia se i tru we Ol Man blong Jared oli no save go long promes graon olgeta nomo. Oli no gat kontrol, mo wei nomo we i save mekem olgeta blong krosem bigfala dip solwota ia, i blong putum tras blong olgeta long Hem. Ol eksperiens ia mo tijing we i kam long Lod, oli mekem fet blong brata blong Jared i kam dip moa mo mekem i kam strong moa, tras ia blong hem long Lod.
Luk olsem wanem ol prea blong hem oli jenis stat long ol kwestin mo wari i go kasem wei blong soemaot fet mo tras:
“Mo mi save, O Lod, se yu yu gat evri paoa, mo save mekem eni samting we yu wantem, blong helpem man; …
“Mo luk, O Lod, yu save mekem samting ia. Mifala i save se yu yu save soemaot bigfala paoa, we i luk smol long haremsave blong ol man.”15
Oli raetem se afta, Ol Man blong Jared oli “go insaed long ol sip blong olgeta, mo oli go aot long solwota, putum tras blong olgeta long Lod, God blong olgeta.”16 Blong putum tras i minim blong putum yu long han blong narawan o blong sarenda. Ol Man blong Jared oli no bin go insaed long ol sip from oli save stret olsem wanem ol samting bae oli wokaot long rod blong olgeta. Oli bin go insaed from oli bin lanem blong trastem paoa, gud fasin, mo sore blong Lod, mo from hemia, oli bin glad blong sarenda olgetawan mo eni tu tingting o fraet we oli bin gat, i go long Lod.
Sam taem i pas apuboe blong mifala Abe i fraet blong ron long wan long meri-go-raon blong animol we i muv i go antap mo go daon. Be hem i wantem hemia we i no muv. Bubuwoman blong hem i talem long hem se bae i sef nomo, mekem se, i trastem hem, mo hem i jiam long hem. Hem i talem wetem wan bigfala smael long fes blong hem: “Mi no filim se mi sef, be mi sef.” Ating hemia nao Ol Man blong Jared oli filim olsem. Blong trastem God bae i no oltaem i fil sef blong fas taem, afta glad i folem.
Travel i no bin isi blong Ol Man blong Jared. I bin gat plante taem we dip solwota i bin berem olgeta, “from ol hil blong ol wef we i bin brok long olgeta.”17 Yet “win i neva stop blong blo [long olgeta] i go long promes graon.”18 Olsem we i had blong andastanem, speseli long ol taem long laef blong yumi taem ol win we oli blo i kam long fored oli strong mo ol si oli muvmuv, yumi save kasem kamfot long save ia we God long gudfala fasin blong Hem we i no gat en i stap oltaem blong pusum yumi i gohom.
Rekod i gohed, “Mo olsem ia nao win i pusum olgeta i go fored; mo i no gat bigfala animol blong solwota i save brekem olgeta, o i no gat welfis we i save smasem olgeta; mo oli gat laet oltaem, nomata we oli stap antap long wota o andanit long wota.”19 Yumi laef long wan wol we ol bigfala wef blong ded, sik long bodi mo tingting, mo ol tes mo ol hadtaem blong evri kaen oli brok oli kam long yumi. Yet, tru long fet long Jisas Kraes mo joes blong trastem Hem, yumi tu, i save gat laet oltaem nomata sapos hem i antap long wota o andanit long wota. Yumi save gat sua tingting se God i neva stop blong blo long yumi i go long promes graon.
Nomata we solwota i bin saksakem olgeta olbaot insaed long ol sip, Ol Man blong Jared “oli bin singsing ol pres long Lod; … mo [oli] bin talem tangkyu mo presem Lod long ful dei; mo taem we naet i kam, oli no stop blong presem Lod.”20 Oli bin filim glad mo oli talem tangkyu long medel blong ol hadtaem blong olgeta. Oli no bin kasem promes graon yet, be oli stap glad long ol promes blesing, from se oltaem oli stanap strong tras long Hem.21
Ol Man blong Jared oli bin go fored long wota blong 344 dei.22 ?Yu save pikjarem hemia?” Blong trastem Lod i tekem tu blong trastem taem blong Hem mo i nidim longfala tingting mo fasin blong stap strong we i save winim ol hariken blong laef.23
Long en, Ol Man blong Jared “oli bin kam so long so blong promes graon. Mo taem we oli putum ol leg blong olgeta long ol so blong promes graon, olgetawan oli bodaon long fes blong graon, mo oli putum tingting blong olgeta i stap daon long fored blong Lod, mo wota blong ae blong olgeta i bin ron from glad long fored blong Lod, from plante sore mo lav blong hem ova long olgeta.”24
Sapos yumi stap fetful blong kipim ol kavenan blong yumi, bae yumi tu, wan dei, bae yumi kasem hom sef mo bae yumi bodaon long fored blong Lod, mo wota blong ae blong olgeta bae i ron from glad from plante sore mo lav blong Hem ova long laef blong yumi, mo tu, bigfala harem nogud we i mekem spes blong gat moa glad.25
Mi testifae se taem yumi jusum blong wan tras we i semmak oltaem mo i wantem gohed wetem Kraes mo ol tabu stamba tingting blong Hem long laef blong yumi, bae Hem i visitim yumi wetem sua fasin, i toktok pis long sol blong yumi, mo mekem yumi blong “hop from paoa blong hem blong mekem yumi kam fri.”26
Mi witnes se Jisas Hem i Kraes. Hem i stamba blong evri glad.”27 Hem i rere wan wei mo Hem i strong blong sevem man.28 Hem i laet, mo laef, mo hop blong wol.29 Bambae Hem i no save lego yumi go ded.30 Long nem blong Jisas Kraes, amen.