Seken Hae Komanmen Ia
Glad we i bigwan olgeta, blong yumi, i kam taem yumi helpem ol brata mo ol sista blong yumi.
Ol dia brata mo sista blong mi. Tangkyu from evri samting we yufala i stap mekem blong help mekem Isrel i kam tugeta long tugeta saed blong vel, blong mekem ol famli blong yufala oli kam strong moa, mo blong blesem laef blong olgeta we oli stap long nid. Tangkyu blong stap laef olsem ol tru pipol we i stap folem Jisas Kraes.1 Yufala i save mo lavem blong obei tufala bigfala komanmen ia—blong lavem God mo blong lavem ol neiba blong yufala.2
Long ol las sikis manis, Sista Nelson mo mi i bin mitim ol taosen blong Ol Sent taem mifala i bin travel i go long Sentrol mo Saot Amerika, ol aelan blong Pasifik, mo ol defren taon long Yunaeted Stet. Taem mifala i stap travel, hop blong mifala i blong bildimap fet blong yufala . Be yet, oltaem mifala i kambak wetem fet blong mitufala i kam strong moa from ol memba mo ol fren we mifala i mitim. ?Bae mi save serem trifala bigfala taem blong ol las eksperiens blong mitufala?
Long manis Mei, Sista Nelson mo mi i bin travel wetem Elda Gerrit W. mo Sista Susan Gong i go long Saot Pasifik. Taem mifala i stap long Oklan, Niu Silan, mifala i gat ona blong mitim ol imam blong tufala moske long Kraesjos, Niu Silan, we tu manis bifo, oli bin sutum ded ol man we oli bin stap wosip.
Mifala i sendem sore blong mifala i go long ol brata ia blong nara fet mo talemaot bakegen se mifala i gat komitmen long fridom blong relijin.
Mifala i bin givim fri wok mo smol help long mane blong bildimbak ol moske ia. Miting blong mifala wetem ol Muslim lida ia i fulap wetem ol kaen fasin blong talem se yumi ol brata nomo.
Long manis Ogis, wetem Elda Quentin L. mo Sista Mary Cook, Sista Nelson mo mi i bin mitim ol pipol long Buenos Aeres, long Ajentina—plante i no blong jos—we laef blong olgeta i jenis wetem ol wiljea we ol Lata-dei Sent Jariti blong yumi i givim long olgeta. Mifala i kasem insperesen taem oli bin talemaot glad mo tangkyu from niufala jea blong olgeta.
Wan nambatri taem i bin hapen jes sam wik i pas, long ples ia, long Sol Lek Siti. I kam long wan spesel leta we mi bin kasem long bon dei blong mi, we i kam long wan yang woman we bae mi singaotem Meri—14 yia.
Meri bin i raet abaot ol samting we, hem mo mi, i gat we i semmak: “Yu gat 10 pikinini. Mifala i gat 10 pikinini. Yu toktok Mandarin. Seven long ol pikinini long famli, wetem mi, oli adoptem mifala long Jaena, mekem se Mandarin i fas lanwis blong mifala. Yu yu dokta blong hat. Sista blong mi i gat tu open hat operesen. Yu laekem 2 aoa jos. Mifala i laekem 2 aoa jos. Yu singsing stret. Brata blong mi tu i singsing stret. Hem i blaen olsem mi.”
Toktok blong Meri i tajem bigwan hat blong mi, mo i soemaot gud se hem i gat strong spirit, be tu, i soem konsekresen blong mama mo papa blong hem.
Ol Lata-dei Sent, semmak olsem ol narawan we oli folem Jisas Kraes, oltaem oli lukaotem ol wei blong help, leftemap man, mo lavem ol narawan. Olgeta we oli glad blong oli singaotem olgeta ol pipol blong Lod, oli “glad blong karem ol hevi samting blong wanwan long [olgeta]; … oli glad blong krae sore wetem olgeta we oli krae sore, … mo leftemap tingting blong olgeta we oli nidim.”3
Oli tru blong lukaotem blong laef folem fas mo seken bigfala komanmen. Taem yumi lavem God wetem ful hat blong yumi, Hem i tanem hat blong yumi long gudlaef blong ol narawan long wan sekol we i naes mo gat klin tingting.
Bae i no posibol blong kalkuletem hamas seves ol Lata-dei Sent oli stap givim raon long wol evri dei blong evri yia, be, hem i posibol blong kalkuletem gud, we Jos, olsem wan oganaesesen i mekem blong blesem ol man mo ol woman—ol boe mo ol gel—we oli nidim wan han blong help.
Yumaniterian wok blong Jos i stat long 1984. Afta, oli bin holem wan taem blong livim kakae raon long ful Jos, blong help resemap mane blong helpem olgeta we wan drae taem i spolem olgeta long Is Afrika. Ol memba blong Jos oli givim 6.4 milien dola long wan dei ia nomo blong livim kakae.
Afta, oli sendem Elda M. Russel Ballard mo Brata Glenn L. Pace i go long Itiopia blong skelem bes wei blong yusum ol tabu mane ia. Hadwok ia i stat blong wanem we, afta, oli save olsem Ol Lata-dei Sent Jareti.
Stat long tetaem ia, Ol Lata-dei Sent Jareti oli givim moa long tu bilian dola olsem help, blong helpem olgeta long nid raon long wol. Help ia, i go long eniwan, i nomata se oli blong wanem Jos, wanem kantri, kala blong skin, seks, o tingting long saed blong seks, o politik oli stap long hem.
Be, i no hemia nomo. Blong helpem ol memba blong Jos blong Lod we oli stap long hadtaem, yumi lavem mo stap laef folem olfala loa blong livim kakae.4 Yumi go hanggri blong helpem olgeta we oli stap hanggri. Wan dei long evri manis, yumi no kakae mo givim mane we bae yumi spendem long kakae (mo moa long hemia) i go blong helpem olgeta long nid.
Bae mi neva fogetem fas visit blong mi long Wes Afrika long 1986. Plante long ol Sent oli kam long ol miting blong yumi. I nomata we plante oli no gat fulap samting, plante oli dresap ful waet oli kam.
Mi bin askem stek presiden hao nao hem i kea long ol memba we oli no gat fulap samting. Hem i talem se ol bisop oli save gud ol pipol blong olgeta. Sapos ol memba oli save kakae tu taem long wan dei, oli no nidim help. Be, sapos oli save kakae wan taem nomo o nogat long wan dei—iven sapos oli gat help blong famli—ol bisop blong olgeta bae oli givim kaekae, we mane i kamaot long fas ofring. Afta hem i ademap tru samting ia: fas ofring kontribusen blong olgeta, plante taem i ova long wanem oli stap spendem. Mane ia we i ova, bae oli sendem i go long ol pipol long nara ples we oli gat moa nid bitim olgeta. Ol strong Sent ia blong Afrika oli tijim mi wan bigfala lesen abaot paoa blong loa mo spirit blong livim kakae.
Olsem wan memba blong Jos, yumi filim se yumi andastanem olgeta we oli stap safa long eni wei.5 Olsem ol boe mo gel blong God, yumi evriwan i ol brata mo sista. Yumi folem wan tijing blong OlTesteman: “[Bambae yufala i mas givhan, long gladhat blong yufala long olgeta laen blong yufala we oli puaman, oli no gat samting.”6
Yumi stap traehad tu blong laef folem ol tijing blong Lod Jisas Kraes olsem we oli raetem long Matiu 25:
“From we taem mi mi hanggri, yufala i givim kakae long mi, mo taem we mi mi tosta, yufala i givim wota long mi. Taem mi mi strenja, yufala i tekem mi mi go long haos blong yufala:
“Mo taem we mi mi neked, yufala i givim klos long mi. Taem we mi mi sik, … yufala i kam luk mi.”
“… Taem we yufala i mekem olsem long wan brata blong mi we i daon moa long ol narafala brata, be i olsem we yufala i mekem long mi nomo.”7
Bae mi talem sam eksampol long wei we Jos i stap folem ol tijing ia blong Sevya.
Blong helpem fasin blong stap hanggri, Jos i stap lukaotem 124 stoahaos blong ol bisop, raon long wol. Tru long olgeta, i gat samples 400,000 oda blong kaekae evri yia we oli givim long wanwan man o woman long nid. Long ol ples we i no gat stoahaos, ol bisop mo ol branj presiden oli karem mane blong fast ofring blong Jos blong givim kaekae mo ol saplae blong ol memba blong olgeta long nid.
Be, jalenj blong fasin blong hanggri i go i bitim ol baondri blong Jos. I stap kam bigwan raon long wol ia. Wan las ripot blong Yunaeted Nesen i talem se namba blong ol pipol long wol we oli no kakae gud i ova long 820 milian—o kolosap wan aot long naen pipol we i stap laef long wol ia.8
!Namba ia i nogud tumas! Mifala i glad tumas from ol kontribusen blong yufala. Tangkyu long bigfala hat blong yufala, ol milian man raon long wol bae oli kasem kaekae we oli nidim, klos, ples blong haed long hem, ol wiljea, meresin, klin wota, mo plante moa.
Plante sik raon long wol oli kamaot from wota we i no klin. Kasem tedei, yumaniterian Jos wok i blong help blong givim klin wota long ol handred komuniti long 76 kantri.
Wan projek long Luputa, long Demokratik Ripablik blong Kongo, i wan gudfala eksampol. Wetem wan populesen we i ova long 100,000, taon ia i no gat wota we i ron. Ol sitisen oli mas wokbaot longlongfala rod blong kasem ol ples blong sef wota. I nomata se oli faenem maonten spring blong wota samples 29 kilometa longwe, ol pipol long taon ia oli no save yusum wota ia oltaem.
Taem ol yumaniterian misinari oli lanem abaot jalenj ia, oli bin wok wetem ol lida blong Luputa blong givim ol tul blong wok mo trenem ol pipol blong pulum paep blong wota i kam long taon. Ol pipol blong Luputa oli spendem tri yia blong digim wan longfala hol blong 1 mita i go daon tru long ol ston mo dak bus. Taem oli bin wok tugeta, dei blong glad i bin kam, we fres klin wota i kam long evriwan insaed long vilej ia.
Jos i stap helpem tu ol rifuji, we oli kamaot long ples blong faet, ol disasta, o from agens from relijin. I gat moa long 70 milian pipol we oli stap olbaot, oli aot long hom blong olgeta.9
Long yia 2018 nomo, Jos i givim ol imejensi saplae i go long ol rifuji long 56 kantri. Antap long hemia, plante long ol memba blong Jos oli givim taem blong olgeta fri blong helpem ol rifuji blong gat niu laef insaed long ol niu komuniti. Mifala i talem tangkyu long wanwan long yufala we i stap kamaot blong helpem olgeta we oli stap traem blong stanemap ol niu hom.
Tru long ol bigfala donesen we i go long Deseret Indastri long Yunaeted Stet, oli stap tekem ol milian kilo blong klos we oli stap seraotem evri yia. Taem we ol lokol bisop oli stap yusum bigfala ples ia blong helpem ol memba long nid, bigfala pat, oli stap donetem i go long ol nara jareti oganaesesen we oli stap serem ol klos ia raon long wol.
Mo las yia nomo, Jos i givim kea long ae long moa long 300 taosen pipol long 35 kantri, ol niubon kea blong ol taosen mama mo pikinini long 39 kantri, mo ol wiljea blong moa long 50 taosen pipol we oli stap laef long plante nara kantri.
Oli save gud Jos from hem i faswan blong givhan long taem blong disasta. Iven bifo wan hariken i spolem wan ples, ol lida blong Jos mo ol wokman long ol ples ia oli stap mekem plan finis long wei we bae oli givhan mo givim help long olgeta we oli no stap gud.
Las yia nomo, Jos i kareaot moa long 100 disasta help projek raon long wol, i helpem ol viktim blong ol hariken, ol faea, ol wota we i ron, ol graon we i seksek, mo ol nara disasta. Taem i posibol, ol memba blong Jos wetem ol yelo klos blong Ol Han blong Help oli kam tugeta long bigfala namba blong helpem olgeta we disasta i spolem olgeta. Kaen seves ia, we plante long yufala i stap givim, i stret stamba blong wok blong givhan.
Ol dia brata mo sista. Ol aktiviti we mi tokbaot oli wan smol pat nomo blong wok blong gudlaef mo yumaniterian blong Jos Ia blong Jisas Kraes blong Ol Lata-dei Sent.10 Mo, yufala, i yufala nao we i mekem evri samting ia i posibol. From eksampol blong laef blong yufala, ol bigfala hat blong yufala, mo ol han blong help, i no wan sapraes we plante komuniti mo lida blong gavman oli stap presem hadwok blong yufala.11
Stat long taem we mi kam Presiden blong Jos, mi bin sapraes long hamas presiden, Praem minista, mo ambasada oli talem tangkyu tru long mi from yumaniterian help long pipol blong olgeta. Mo oli talemaot tangkyu blong olgeta from strong paoa we ol fetful memba oli givim long kantri blong olgeta olsem ol tru sitisen we oli tekpat.
Mi bin glad tu taem ol lida blong wol oli bin visitim Fas Presidensi, mo talemaot hop blong olgeta blong Jos i stanap long kantri blong olgeta wan dei. ?From wanem? From se oli save se ol Lata-dei Sent bae oli help blong bildim ol strong famli mo komuniti, oli mekem laef i gud moa long ol narawan long eni ples we oli stap laef long hem.
I nomata long weaples nao oli singaotem hom, ol memba blong Jos oli filim strong se God i stap olsem Papa, mo yumi evriwan i brata. Long wei ia, glad we i bigwan olgeta, blong yumi, i kam taem yumi helpem ol brata mo ol sista, i nomata weaples yumi stap laef long hem long gudfala wol ia.
Stap givim help long ol narawan—blong hadwok moa wetem tingting blong kea long ol narawan semmak, o moa bitim we yumi stap kea long yumiwan—hemia nao glad blong yumi. Speseli, bae mi ademap, taem we i no stret long laef blong yumi, mo taem i tekem yumi aot long gud ples blong yumi.. Blong stap laef folem nambatu bigfala komanmen ia, hem i ki blong stap kam wan tru disaepol blong Jisas Kraes.
Ol dia brata mo sista blong mi. Yufala i ol laef eksampol blong ol frut we oli kam taem wan i stap folem ol tijing blong Jisas Kraes. !Mi talem tangkyu! !Mi lavem yufala!
Mi save se God i stap laef. Jisas Hem i Kraes. Jos blong Hem i bin kambak long ol las dei ia blong mekem ol tabu stamba tingting blong hem i kamtru. Mi testifae long hemia, long nem blong Jisas Kraes, amen.