Paoa long Saed blong Spirit

Taem yu yusum raet blong yu blong mekem joes blong mekemaot taem evri dei blong kam moa kolosap long voes blong God, speseli long Buk blong Momon, afta sam taem i pas, bae voes blong Hem bae i kam moa klia mo bae yu save harem save.

Be i defren, taem ol samting we i pulum tingting mo ol noes we i fulumap wol mo ol hom mo laef blong yumi, i save mekem i moa had blong harem voes blong Hem. Ol samting we i stap pulum tingting blong yumi i save fulumap maen mo hat blong yumi mekem se yumi no gat rum blong smol kwaet voes blong Tabu Spirit.

Profet Josef Smit i bin tijim se plante taem God i soemaot Hemwan “long wanwan man mo woman long praevet, long ol rum blong olgetawan, long waelples o long garen, mo long ples wei nogat noes long hem o ples we bae man i no hambak long yu.”³

Setan i wantem blong seperetem yumi long voes blong God taem i stap blokem yumi long ol kwaet ples ia. Sapos God i toktok long wan kwaet smol voes, yu mo mi i mas kam kolosap blong harem Hem. !Pikjarem long maen blong yu sapos i hapen se yumi wantem blong stap konek wetem Heven olsem we yumi stap konek oltaem long Intanet!. Jusum wan taem mo ples blong stap lisin long voes blong God evri dei. Mo folem tabu plan stret evriwan, from plante samting i dipen long hemia.

Taem yu kasem ol kwaet smol voes ia mo wok folem, Lod bae i save yusum yu. Oltaem yu mekem olsem, bae yu kam blong harem save moa klia voes blong Spirit. Bae yu kam antap moa blong luksave se God i stap lidim yu, mo Hem i wantem blong talemaot maen mo tingting blong Hem.”⁴ Sapos yu pusumbak, maet yu fogetem kwaet smol voes o mestem janis blong helpem wan narawan blong God.

Prea we Papa long Heven i wantem blong harem tumas i taem yumi prea mo toktok from wan narawan we i nidim help blong yumi. Presiden Eyring i bin tijim yumi blong lukaotem revelesen taem yumi askem God huia yumi save helpem, long bihaf blong Hem. “Spos yu askem ol kwestin olsem, Tabu Spirit bae i kam mo bae yu filim i toktok long yu abaot ol samting we yu save mekem blong ol nara pipol. Taem yu go mo mekem ol samting ia, yu stap long wok blong God, mo taem yu stap long wok blong God, yu kwalifae from presen we i Tabu Spirit.”⁵

Yu save prea mo askem Lod from wan wok blong Hem. Taem yu mekem olsem, Hem i save yusum ol skil blong yu blong mekem ol bigbigfala wok blong Hem oli hapen.

Pikja

Bubuman blong Sista Craig, Fritz Lundgren

Bubuman blong mi, Fritz Hjalmar Lundgren, i kam stap long Swiden taem hem i gat 19 yia. Hem i kasem Amerika hemwan, wetem wan sutkes mo hem i bin skul kasem klas 6 nomo. Hem i no save toktok Inglis, i go wok long Oregon olsem man blong katemdaon ol tri, mo afta, wetem bubuwoman mo mama blong mi, oli joenem Jos. Hem i neva prisaed long wan wod, be olsem wan fetful hom tija, hem i karem i kam long Jos ova 50 defren famli i kam long Jos aktiviti. ?Hao nao hem i mekem hemia?

Afta we bubuman i ded, mi stap lukluk long bokis blong blong ol pepa blong hem mo faenem wan leta we wan man i bin raetem we i bin kambak long jos from lav blong bubuman. Leta ia i rid olsem: “Sikret blong brata Fritz, mi bilivim se, hem i oltaem stap long wan wok blong Papa long Heven.

Leta ia i kam long brata Wayne Simonis. Apu man i bin visitim hem mo kam blong save wanwan memba blong famli. Long stret taem, bubuman i talem se oli bin nidim olgeta, mo hem i invaetem olgeta blong kam long jos. Be long Sandei ia, Brata Simonis i girap wetem wan situesen we hem i mas mekem sam joes—hem i no finisim blong putum ruf long haos blong hem mo oli luk se bae i gat ren tu long wik ia. Hem i disaed blong go long jos mo sekhan wetem bubuman nomo, mo gobak long haos blong finisim ruf blong haos. Ol famli blong hem oli save go long jos nomata sapos hem i no go wetem olgeta.

Plan blong hem i bin wokaot gud nomo kasem taem hem i stap long ruf mo harem wan i stap klaem i kam antap long lada. Long toktok blong hem, hem i talem: “Taem mi lukluk i go antap … long top blong lada, mi luk brata Fritz. Hem i lukluk mi wetem wan bigfala smael. Fastaem mi sem mo filim olsem wan smol pikinini we tija i faenemaot hem from i ronwe long klas. Afta, Mi bin filim kros. Be Brata Fritz i tekemaot sut kot blong hem mo hangem long lada. Taem hem i rolem han blong waet set blong hem i go antap, i tanem hem i kam long mi mo talem: ‘Brata Simonis, ?yu gat wan nara hama? Wok ia i mas impoten tumas ia long yu mekem se yu no save stap wetem famli blong yu, mo sapos i impoten long yu, mi wantem helpem yu.’ Taem mi luk insaed long ae blong ae blong hem, mi luk nomo kaen fasin mo lav blong Kraes. Kros blong mi i aot. … Mi putumdaon ol tul blong mi long Sandei ia mo folem gudfala fren blong mi i godaon long lada mo gobak long japel.

Bubuman i kasem wok blong hem i kam long Lod, mo save se hem i mas lukaotem ol sipsip we oli lus. I semmak olsem ol fo man ia we oli karem fren blong olgeta we i sik i kam antap long ruf blong slakem hem ia go daon blong Jisas i hilim hem,⁶ mo wok ia blong bubuman tu i tekem hem i go long wan ruf top. Lod i sendem revelesen long olgeta we oli stap lukaotem blong helpem ol narawan.

I no longtaem i pas, mi bin rid insaed long ol skripja abaot wan gudfala misinari we i bin kasem wok i kam long Lod. Eron i stap tijim king blong Ol Man blong Leman we oli stap askem olgetawan se from wanem brata blong Eron, Amon i no bin kam tu blong tijim hem. Mo Eron i talem long king: “Luk, Spirit blong Lod i singaotem hem i go long narafala rod.”⁷

Spirit i bin toktok long hat blong mi: wanwan long yumi i gat defren misin blong mekem, mo samtaem Spirit i save singaotem yumi long “narafala rod.” I gat plante wei blong bildimap kingdom blong God olsem ol disaepol blong Jisas Kraes, i blong mekem kavenan, mo blong kipim ol kavenan. Olsem wan fetful disaepol blong Hem, yu save kasem ol insperesen mo revelesen blong yuwan oltaem wetem ol komanmen blong Hem we i stret blong yuwan nomo. Yu gat ol spesel misin mo rol blong mekem long laef mo bae i gat ol spesel help blong fulfilim olgeta.

Nifae, brata blong Jared, mo iven, Moses, oli bin gat wan bigfala wota blong krosem—mo wanwan long olgeta oli bin mekem long ol defdefren wei. Nifae i wokem “ol timba long fasin we i defren.”⁸ Brata blong Jared i bildim “ol sip we i sat gud olsem wan dis.”⁹ Mo Moses “oli wokbaot long drae graon long medel blong solwota.”¹⁰

Olgeta wanwan oli kasem ol daereksen we i kam stret blong olgetawan mo wanwan i trastem mo mekem folem. Lod i save gud olgeta we oli stap obei mo, long toktok blong Nifae, bae i mekem rere wan rod blong yumi, blong mekem samting ia we hem i talem long yumi blong mekem”¹¹ Tingbaot se Nifae i talem, “wan wei”—be i no “wei ia.”

?Yumi stap mestem mo no stap luksave wanwan wok we Lod i stap givim from se Hem i rere long “wan wei” we i defren long wanem we yumi stap tingting long hem?

Spirit i lidim mi long wan ples we i no stret—long wan sut, long wan ruf top, long wan Sandei. Trastem God se bae i lidim yu, iven sapos wei ia i luk defren long wanem we yu stap tingting long hem, o i defren long ol narawan.

Ol Lata-dei Sent oli kam long plante defren sep mo saes, be “Evriwan oli semmak long God”—“blak o waet, prisena o fri, man mo woman,” yangfala mo mared, rij mo pua, yangfala mo olfala, memba blong longtaem o oli jes stap konvet.¹² Nomata huia yu o wanem yu stap fesem, Lod i stap invaetem yu long tebol blong Hem.¹³

Taem yu lukaotem mo mekem tingting blong Papa i kam wan fasin blong evri dei laef blong yu, yes, bae yu wantem blong jenis mo sakem sin.

Jos niu program blong ol pikinini mo ol yut oli bildim antap long fandesen blong stap lanem blong lukaotem revelesen, faenemaot wanem we Lod i wantem yumi blong mekem, mo afta, tekem aksen folem daereksen ia. Wanwan long yumi, nomata long yia o situesen, yu save wokhad blong lukaotem, kasem mo tekem aksen. Taem yu folem paten ia we i no save finis ia we oli putum ia long dei blong yumi, bae yu kam moa kolosap long Jisas Kraes—Lav blong Hem, laet blong Hem, daereksen blong Hem, pis blong Hem, mo hiling mo paoa blong Hem blong mekem samting. Mo bae yu save kam antap long paoa blong yu long Spirit blong kam wan evri dei tul long han blong Hem blong mekem ol bigfala wok blong Hem i hapen. Long nem blong Jisas Kraes, amen.