Paoa blong Winim Enemi
?Olsem wanem nao yumi save faenem pis, tingbaot huia yumi, mo winim ol trifala toktok blong enemi?
Ol brata mo sista, tangkyu long evri samting we yu stap mekem blong kam olsem, mo blong helpem ol narawan oli kam, tru man blong folem Jisas Kraes mo glad long ol blesing blong holi tempol. Tangkyu long gudfala wok blong yufala. Yufala i gud tumas mo yufala i naes tumas.
Hem i prea blong mi se bae yumi luk save paoa blong Tabu Spirit taem yumi andastanem fulwan se yumi ol pikinini blong God. “Ofisol toktok i stat wetem”: “Evri famli blong man—man mo woman—oli mekem olgeta folem imej blong God. Wanwan long olgeta hem i wan spirit pikinini boe o spirit pikinini gel blong papa wetem mama long heven we oli laekem olgeta tumas, mo from we oli olsem wan spirit, wanwan long olgeta i gat gudfala fasin mo oli gat bigfala janis blong save kam olsem God.”1 Yumi ol “nara spirit we oli gud tumas we Lod i holemtaet olgeta i stap blong oli kam long wol long en blong taem we evri wok blong God i kamtru, blong tekem pat long wok blong putum ol fandesen blong bigfala wok blong lata-dei.”2 Presiden Russel M. Nelson i talem: “Oli bin tijim yufala long spirit wol blong priperem yufala from eni samting mo evri samting we bae yufala i fesem long ol las pat ia blong lata dei.(luk long D&K 138:56). Tijing ia i stap insaed long yu.”3
Yufala ol pikinini boe mo pikinini gel blong God. Yufala i gat paoa blong winim enemi. Be enemi, i save huia yu. Hem i save long saed blong tabu fasin blong yu mo lukaotem blong stopem yu long wanem yu save kasem long wol ia mo long heven taem hem i yusum ol trifala toktok ia:
-
Giaman
-
Pulumaot tingting
-
Tingting i foldaon
Giaman
Enemi i yusum tul ia blong giaman long ol dei blong Moses. Lod i talemaot long Moses:
Mo luk, yu yu boe blong mi. …
“Mo mi gat wan wok blong yu, … mo yu yu ripresentem Wan Stret Pikinini blong Mi ia Nomo.”4
I no longtaem afta long naesfala visen ia, Setan i traem blong giaman long Moses. Ol toktok we hem i yusum oli interesting: “Moses, pikinini blong man, yu wosipim mi.”5 Giaman ia i no nomo insaed long invitesen blong wosipim Setan, be giaman ia i bin stap tu long wei we hem i tokbaot Moses olsem wan pikinini blong man. Tingbaot se, Lod i jes talem long Moses se hem i wan pikinini blong God, we oli krietem hem olsem Wan Stret Pikinini ia Nomo blong hem;
Enemi hem i no stop blong traem blong giaman long Moses, be from hem i bin prea long God, hem i bin kasem paoa: “Setan, yu kamaot long mi, from se wan God ia nomo bae mi wosipim, we i God we i gat glori.”6 Moses i tingbaot huia hem—wan pikinini blong God.
Ol toktok blong Lod i go long Moses i kam tu long yu mo mi. Wanwan long yumi oli mekem olgeta folem imej blong God, mo Hem i gat wok blong yumi mekem. Enemi i traem blong giaman taem hem i mekem yumi fogetem huia nao yumi stret. Sapos yumi no andastanem huia yumi, bae i had blong luk save huia nao yumi save kam olsem.
Pulumaot tingting
Enemi i traem tu blong pulumaot tingting blong yumi long Kraes mo kavenan blong Hem. Elda Ronald A. Rasband i serem hemia: “ Plan blong enemi, hem i blong pulumaot yumi long ol witnes blong spirit, be tingting blong Lod i blong givim laet, mo blong yumi joenem wok blong Hem.”7
Long ol dei blong yumi, i gat plante samting blong pulumaot tingting, olsem Twita, Fesbuk, Instagram, ol gem, mo plante moa. Ol teknoloji ia oli gud, be sapos yumi no lukaot gud, oli save pulumaot tingting blong yumi blong mekem gud ol tabu samting blong yumi. taem yumi yusum gud ol samting ia i save karem i kam paoa blong heven mo letem yumi blong witnesem ol merikel taem yumi lukaot blong karem i kam tugeta Isrel we i go wanwan long tugeta saed blong vel.
Letem yumi lukaot mo no tingting nating long olsem wanem yumi yusum teknoloji.8 Gohed blong lukaotem ol rod we teknoloji i save karem yumi kam kolosap long Sevya mo letem yumi finisim wok blong Hem taem yumi rere long seken kaming blong Hem.
Tingting i foldaon
Laswan, enemi i wantem se tingting blong yumi i foldaon. Tingting blong yumi i foldaon taem yumi komperem yumi wetem ol narawan o filim se yumi no laef folem wanem ol man oli wantem, mo tu wanem yumi wantem.
Taem we mi statem dokta program blong mi, mi filim se tingting blong mi foldaon. Program ia i akseptem fo studen nomo long yia ia, mo oli nara studen oli waes. Oli gat ol hae sko long tes blong olgeta mo gat moa eksperiens long senia manejmen posisen, mo oli soem strong tingting long olgeta wan long wanem oli save mekem. Afta fes tu wik blong mi long program, ol filing blong tingting i foldaon mo tu tingting i stat blong tekem ples—i kolosap i kam ova long mi.
Mi disaed se sapos mi wantem blong finisim ol fofala yia program ia, mi sut ridim finisim Buk blong Momon evri semesta. Evri dei taem mi rid, Mi luk save toktok blong Sevya we i talem se Tabu Spirit bae i save “tijim [yumi] olgeta samting mo bambae hem i save mekem [yumi] tingbaot olgeta samting ia bakegen.9 Hem i konfemem huia mi olsem wan pikinini blong God, mekem mi tingbaot blong no komperem mi wetem ol narawan, mo givim mi strong tingting long tabu rol blong win.10
Ol dia fren blong mi, plis no letem eni man i stilim hapines blong yu. No mas komperem yu wetem ol narawan. Plis tingbaot ol kaen toktok blong Sevya: “Pis Mi putum i stap wetem yufala, pis blong mi mo pis ya we mi mi givim: i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.”11
?Olsem wanem nao bae yumi mekem? ?Olsem wanem nao yumi save faenem pis ia, tingbaot huia yumi, mo winim ol trifala toktok blong enemi?
Faswan, tingbaot se fas mo bigfala komanmen i blong lavem God wetem ol hat blong yumi, ful paoa blong tingting, ful maen, mo paoa blong yumi.12 Evri samting we yumi wantem blong mekem, yumi sut mekem from lav blong yumi long Hem mo pikinini blong Hem. Taem yumi mekem lav blong yumi blong tufala i kam antap tru fasin blong folem ol komanmen, fasin blong lavem yumiwan mo blong lavem ol narawan i kam antap. Bae yumi stat blong givim seves long famli, ol fren, mo ol neiba from bae yumi luk olgeta olsem Sevya i luk olgeta— olsem ol boe mo oli gel blong God.13
Seken, prea long Papa long nem blong Jisas Kraes evri dei, evri dei, evri dei.14 Hem i tru long prea we yumi save filim lav blong God mo soem lav blong yumi from Hem. Tru long Prea yumi soem tangkyu mo askem paoa mo strong tingting blong mekem wanem we yumi wantem i go folem hemia blong God mo bae Hem i gaedem mo lidim yu long evri samting.
Mi leftemap tingting blong yufala blong “prea long Papa wetem evri paoa blong hat, blong [yumi] save fulap wetem lav ia, … blong [yumi] save kam ol boe mo [ol gel] blong God blong taem we bae hem i kamkamaot, bae yumi kam olsem hem.”15
Nambatri, ridim mo stadi long Buk blong Momon evri dei, evri dei, evri dei.16 Stadi blong Buk blong Momon blong mi i stap kam moa gud taem mi rid wetem kwestin long maen blong mi. Taem yumi rid wetem wan kwestin, yumi save kasem revelesen mo luk save se Profet Josef Smit i bin talem trutok taem hem i talem: “Buk blong Momon i moa stret bitim eni narafala buk long wol, … mo wan man bae i kam moa [ o wan woman bae] kam kolosap long God sapos hem i folem ol tijing blong hem, bitim eni narafala buk.”17 Buk blong Momon i holem ol toktok blong Kraes mo i helpem yumi tingbaot huia yumi.
Laswan, tekem sakramen wetem wan tru hat evri wik, evri wik, evri wik. Hem i tru long ol kavenan mo odinens blong prishud, we i tekem tu sakramen, we paoa blong God i kamtru long laef blong yumi.18 Elda Deved A. Bedna i tijim:“Odinens blong sakramen i tabu mo i wan invitesen blong sakem sin fulwan we i stap ripit mo yumi riniu wetem spirit. Blong tekem pat long sakramen, insaed mo long hemwan, i no karemaot sin. Be taem yumi rere gud mo tekem pat long tabu odinens ia wetem wan hat we i fulap wetem sore mo wan spirit we i wantem blong sakem sin afta promes ia i we bae oltaem oli gat Spirit blong Lod i stap wetem olgeta.”19
Taem yumi tekem pat long sakramen wetem wetem tingting i stap daon, yumi tingbaot safaring blong Hem long tabu garen ia we oli singaotem Getsemane mo sakrifaes blong Hem long kros. Yumi talem tangkyu long Papa blong sendem stret pikinini ia nomo blong Hem, Ridima blong yumi, mo soem tru tingting blong yumi blong kipim ol komanmen mo blong oltaem tingbaot Hem.20 I gat laet blong spirit we i go wetem sakramen—hem i blong yuwan, i gat paoa, mo yumi nidim.
Ol fren blong mi, mi promes se taem yumi traehad blong lavem God wetem ful hat blong yumi, prea long nem blong Jisas Kraes, stadi long Buk blong Momon, mo wetem tru tingting tekem pat long sakramen, bae yumi save wetem paoa blong Lod, blong winim ol giaman praktis blong enemi, blong daonem giaman tingting we i limitim yumi blong kasem ol tabu samting, mo blokem tingting we i foldaon we i stap putum daon wanem yumi save mekem blong filim lav blong Papa long Heven mo pikinini blong Hem. Bae yumi kam blong andastanem fulwan huia nao yumi olsem ol boe mo ol gel blong God.
Ol brata mo sista, mi serem wetem yu lav blong mi mo talemaot witnes blong mi long yu se mi save se Papa long Heven i stap laef mo Jisas hem i Kraes. Mi lavem Tufala. Jos Ia blong Jisas Kraes blong Ol Lata-dei Sent i kingdom blong God long wol ia. Yumi gat wan tabu wok blong mekem rere wol ia blong seken kaming blong Mesaea. Long nem blong Jisas Kraes, amen.