Japta 42
Ol Saen blong Taem we Kraes bae i Hang long Kros
Naoia oli stap lukluk from ol saen blong ded blong hem: tri dei blong tudak.
Samfala oli no biliv se ol saen ia bae i kam. Oli stap raorao wetem olgeta we oli biliv.
Wan dei wan rabis weta i kam. I bin gat wan strong win.
Laetning i stap laet, mo tanda i mekem ful wol i seksek.
Taon blong Sarahemla i kasem faea. Taon blong Moronae i draon i go long solwota. Taon blong Moronaeha oli berem.
Ful wol ia i bin seksek Ol bigbigfala rod oli brokbrok, mo ol bilding oli brokbrok tu. I bin spolem plante taon, mo plante pipol oli bin ded.
Weta ia mo graon i bin seksek blong abaot tri aoa.
Taem rabis weta ia mo graon we i stap seksek i stop, wan bigfala tudak i kavremap ples ia. I no gat wan laet long eni ples. Ol pipol i save iven filim tudak ia.
Tudak ia i stap blong tri dei. Ol kandel oli no save laet, mo ol pipol oli no save luk san, mun, mo ol sta.
Ol pipol oli krae from se i tudak, ol samting oli nogud, mo ded. Naoia oli harem nogud from se oli no bin sakem ol sin blong olgeta.
Mo ol pipol oli harem voes blong Jisas Kraes.
Jisas i talem long olgeta abaot nogud samting we i hapen long olgeta long lan ia. Hem i talem se ol moa nogud man oli bin ded.
Hem i talem se olgeta we oli no bin ded oli nidim blong sakem sin. Sapos oli mekem samting ia mo kam long hem, bae Hem i blesem olgeta.
Ol pipol oli sapraes tumas afta we oli harem voes ia mo i mekem se oli stop blong krae. Evri samting i kam kwaet blong plante aoa.
Mo Jisas i toktok bakegen, mo i talem se hem i bin traem blong helpem ol pipol. Sapos oli save sakem sin naoia, bae oli save gobak mo stap wetem hem.
Afta tri dei tudak ia i go. Ol pipol oli glad mo oli talem tangkyu long Lod.