Japta 43
Jisas Kraes i Kamaot long Ol Man blong Nifae
Plante long Ol Man blong Nifae oli kam tugeta long tempol long Baontiful. Oli sapraes tumas long plante jenis long lan ia.
Ol pipol oli stap tokbaot Jisas Kraes mo ol saen blong ded blong Hem.
Taem oli stap toktok, oli harem wan kwaet voes long heven. We i bonem ol hat blong olgeta.
Long fas ples oli no bin harem save voes ia, be taem Hem i toktok namba tri taem oli harem save.
Voes ia i voes blong Papa long Heven. Hem i talemaot Jisas Kraes mo i talem long ol pipol blong ol lisin long hem.
Jisas Kraes i km daon long heven mo i stanap long medel blong ol pipol. Oli bin fraet blong toktok from oli no bin save wanem i stap hapen. Oli ting se Jisas i wan enjel.
Hem i talem long olgeta se Hem i Jisas Kraes, Hem ia we ol profet oli bin talem se bae i kam.
Jisas i talem long ol pipol blong kam mo filim ol mak blong nil long saed blong Hem mo long ol han mo leg blong Hem, we oli bin nilim Hem long kros.
Jisas i wantem ol pipol i save se Hem i God blong olgeta mo Hem i bin ded from ol sin blong olgeta.
Ol pipol oli kam wan afta wan mo filim ol mak long saed blong Jisas, mo long ol han mo leg blong Hem. Ol pipol oli save se Hem i Sevya.
Mo ol pipol oli givim glori long Jisas mo oli foldaon long leg blong Hem mo oli wosipim Hem.
Jisas i singaotem Nifae mo 11 narafala man blong kam long Hem. Hem i givim prishud paoa long olgeta mo i tijim olgeta raet wei blong mekem baptaes.
Hem i talem long ol Man blong Nifae blong biliv long Hem, sakem sin, mo kipim ol komanmen. Sapos oli no mekem samting ia bae oli no save go long kingdom blong Hem.
Jisas i tijim Ol Man blong Nifae olsem wanem blong prea long Papa long Heven. Hem i tijim olgeta abaot fasin blong livim kakae mo i talem long olgeta se bae oli kasem fogivnes sapos olgeta tu i fogivim wanwan long olgeta.
Afta Jisas i bin tijim ol pipol plante samting, Jisas i talem long olgeta blong go hom mo tingting mo prea abaot wanem Hem i bin talem.
Ol Man blong Nifae oli stat blong krae. Oli no wantem blong Jisas i livim olgeta yet.
Jisas i lavem Ol Man blong Nifae. Hem i talem long olgeta blong tekem i kam olgeta we oli sik mo harem nogud mo bae Hem i hilim olgeta.
Jisas i bin hilim ol pipol. Evriwan i nildaon mo wosipim Hem.