Japta 25
Eron i Tijim Papa blong King Lamonae
Spirit i lidim Eron mo ol kompanion blong hem i go long graon blong Nifae blong tijim papa blong Lamonae, king blong Ol Man blong Leman.
Eron i talem long king se hem i brata blong Amon. King i bin stap tingting abaot fasin blong Amon we i kaen mo tu abaot wanem we Amon i bin talem long Hem.
Eron i askem long king sapos hem i biliv long God. King i talem se hem i no save gud be hem i talem se bae hem i biliv sapos Eron i talem se God i stap laef. Mi save se God i stap laef.
Eron i ridim ol skripja mo prea. Hem i tijim king abaot taem we God i krietem wol, foldaon blong Adam, mo misin blong Jisas Kraes.
King i askem wanem hem i nidim blong mekem blong kasem Tabu Spirit mo stap rere blong laef wetem God. King hem i wantem blong mekem eni samting, iven blong givim kingdom blong hem.
Eron i talem long king blong hem i mas sakem ol sin blong hem fulwan. Hem i nid blong prea mo gat fet long God.
King i prea blong save sapos i tru i gat wan God. Hem i talem se bae hem i sakem evri sin blong hem.
King i foldaon i go long graon mo i luk olsem we hem i ded. Taem kwin i luk hem, hem i ting se Eron mo ol kompanion oli bin kilimded hem.
Kwin i givim oda long ol wokman blong hem blong kilimded Eron mo ol kompanion blong hem, be ol wokman oli fraet tu. Hem i sendem olgeta blong faenem ol narafala pipol we oli save mekem.
Bifo wan bigfala grup i save kam mo mekem trabol, Eron i tekem han blong king mo i talem long hem blong stanap. King i stanap.
King i mekem tingting blong woman blong hem we i fraet tumas i kam daon mo ol wokman blong hem mo i tijim gospel long olgeta. Olgeta evriwan o biliv long Jisas Kraes.