Japta 5
Taem blong Travel long Waelples
Lod i wantem ol boe blong Lihae blong oli tekem ol woman we bae oli save tijim ol pikinini blong olgeta abaot gospel. Hem i talem long Lihae blong oli gobak long Jerusalem blong tekem famli blong Ismael wetem olgeta.
Nifae mo ol brata blong hem oli gobak long Jerusalem. Oli talem long Ismael wanem Lod i wantem hem blong mekem. Ismael i biliv long olgeta, mo hem mo famli blong hem oli go wetem ol boe blong Lihae.
Taem we oli stap travel long waelples, Leman mo Lemyul mo sam long ol famli blong Ismael oli kros. Oli wantem blong gobak long Jerusalem.
Nifae i rimaenem Leman mo Lemyul long plante samting we Lod i bin mekem blong olgeta. Hem i talem long olgeta blong gat bigfala fet. Oli kros long Nifae be oli no gobak long Jerusalem.
Nifae, ol brata blong hem, mo Soram oli bin maredem ol gel blong Ismael.
Lod i talem long Nifae blong gohed long wokabaot blong hem. Long nekis moning, Lihae i faenem wan bras bol we oli singaotem Liahona aotsaed long tenet blong hem. Hem i poenem wei blong go long waelples.
Famli blong Lihae i putum tugeta ol sid mo ol kaekae mo ol tenet blong olgeta. Oli travel long waelples blong plante dei, oli stap folem daereksen blong Liahona.
Nifae mo ol brata blong hem ol yusum ol bo mo ol aro blong lukaotem ol wael animol blong kakae taem oli stap travel.
Bo blong Nifae we oli mekem wetem stil i brok, mo ol bo blong ol brata oli lusum paoa. Ol brata oli no save kilimded eni animol, mekem se evriwan oli hanggri. Leman mo Lemyul, tufala i kros tumas.
Nifae i mekem wan bo we i mekem wetem wud mo i askem papa blong hem wea ples blong i go lukaotem wael animol. Lihae i kasem daereksen tru long Liahona. Nifae i folem ol daereksen ia mo i faenem sam animol.
Liahona i wok nomo taem famli blong Lihae i stap fetful, gat hop, mo stap obei.
Nifae i kambak wetem ol animol we hem i bin faenem. Evriwan i glad blong oli save kasem kaekae. Oli talem sore from we oli bin stap kros, mo oli talem tangkyu from we hem i stap blesem olgeta.
Rod blong olgeta blong travel, hem i no isi. Samtaem famli blong Lihae i stap taed, hanggri, mo oli nidim wota. Ismael i ded mo ol gel blong hem oli harem nogud. Oli komplen agensem Lihae.
Leman mo Lemyul tu i stap komplen. Oli no save bilivim se Lod i bin toktok long Nifae. Oli wantem blong kilimded Lihae mo Nifae, mo gobak long Jerusalem.
Voes blong God i toktok long Leman mo Lemyul. Hem i bin talem long tufala blong oli no kros long Lihae mo Nifae. Leman mo Lemyul, tufala i sakem sin.
Famli blong Lihae i gohed long wokbaot blong olgeta we i had. God i helpem olgeta mo i leftemap tingting blong olgeta. Ol pikinini oli bon. Lihae mo Saraea i gat tu moa boe, Jekob mo Josef.
Afta oli travel long waelples blong eit yia, famli blong Lihae i kamtru long wan ples long saed blong solwota. Long ples ia, oli faenem frut mo hani. Oli singaotem ples ia se Plante.