Japta 52
Ol Man blong Jared oli Ded Evriwan
Ol Man blong Jared oli kam plante mo oli kam rij. Oli Jusum wan king blong kam wan lida.
Plante yia i pas, mo Ol Man blong Jared oli kam rabis olgeta. Lod i sendem ol profet blong talem long olgeta blong sakem sin o bambae oli distroem olgeta.
Ol pipol oli no lisin long ol profet. Oli traem blong kilim olgeta
I gat ol wo mo bigfala taem we i no gat kakae long graon. Plante long Ol Man blong Jared oli ded
Lod i sendem wan narafala profet nem blong hem Ita. Hem i prij long moning kasem naet, i stap talem long Ol Man blong Jared blong biliv long God mo sakem ol sin blong olgeta.
Ita i talem long Ol Man blong Jared se sapos oli biliv long God, bambae oli save laef wetem Papa long Heven wan dei long wan moa gudfala wol
Ita i talem plante impoten samting long Ol Man blong Jared, be oli no biliv long hem. Oli mekem hem i livim taon ia.
Ita i haed insaed long wan hol blong ston long dei taem blong mekem se oli no save kilim hem. Long naet hem o go aot mo luk wanem i stap hapen long Ol Man blong Jared.
Hem i finisim blong raetem histri blong Ol Man blong Jared long taem we hem i stap haed.
Lod i sendem Ita i go long Koriantum, we hem i wan rabis king blong Ol Man blong Jared. Ita i talem long hem blong sakem sin o bae hem i laef nomo blong luk oli kilim ol pipol blong hem.
Koriantum mo ol pipol blong hem oli no sakem sin. Hem i traem blong mekem rod blong oli kilim ded Ita, be Ita i ronwe mo i haed insaed long wan hol blong ston.
Ol man oli rabis tumas mekem se Lod i putum kes long graon. Oli no save luk ol tul o ol naef blong faet blong olgeta daon, long nekis dei ol samting ia oli lus finis.
Evriwan long Ol Man blong Jared oli faet long wo, olgeta wetem ol woman mo ol pikinini blong olgeta. Koriantum i lidim wan ami mo wan man we nem blong hem Siz i lidim narawan.
Koriantum mo Siz tufala tugeta i ol rabis man. Tabu Spirit i lego Ol Man blong Jared finis from ol rabis fasin blong olgeta. Setan i gat ful paoa ova long olgeta.
Ol Man blong Jared oli faet kasem taem we Koriantum mo Siz nomo i stap. Taem Siz i hafded from we hem i lusum plante blad tumas, Koriantum i katemaot hed blong hem
Profesi blong Ita i kam tru: Koriantum hem i laswan long Ol Man blong Jared we i stap laef. Ol pipol blong Sarahemla nao i faenem hem.
Ita i finis blong raetem histri blong Ol Man blong Jared. Oli bin distroem evriwan from ol rabis fasin blong olgeta. Mo afta Ol Man blong Nifae nao oli faenem ol rekod blong Ol Man blong Jared .