Japta 53
Moronae mo Ol Tijing blong Hem
Afta Momon i ded, Moronae i stap hemwan. Hem i finisim ol histri we papa blong hem i givim long hem.
Moronae i save se, wan dei, bae oli karemaot ol buk we oli wokem long gol andanit long graon.
Ol toktok long ol buk we oli wokem long gol oli stap tokbaot Jisas Kraes. Oli testifae mo tijim ol pipol long wei blong laef long wan stret mo gud fasin.
Ol Man blong Leman we oli nogud oli kilimded evri Man blong Nifae we oli no wantem tanem baksaed blong olgeta long Jisas Kraes.
Moronae bae i neva save tanem baksaed blong hem long Jisas Kraes. Hem i muv raon, i stap haed long Ol Man blong Leman.
Moronae i raetem plante moa samting long buk ia we oli wokem long gol; ol toktok ia oli go speseli long Ol Man blong Leman long ol lata dei.
Hem i raetem plante impoten samting, mo hem i raetem tu ol toktok blong prea blong sakramen.
Moronae i raetem se, olgeta nomo we oli save kasem baptaes oli olgeta we oli glad blong sakemaot ol sin blong olgeta mo wok blong Jisas Kraes.
Moronae i wantem se evriwan blong bilif long Jisas Kraes mo kam blong save Hem. Hem i se evri samting we i gud, i kam long Kraes.
Moronae i raetem se sapos ol man oli lavem God mo folem Hem, oli save kam stret mo gud evriwan.
Moronae i save se, afta we bae hem i ded, bambae hem i laef bakegen long ded, mo bae i laef wetem Papa long Heven mo Jisas Kraes.