Japta 3
Lihae I Aot long Jerusalem
Lod i bin glad tumas long Lihae, mo wan naet, Hem i bin toktok long Lihae long wan drim. Lod i talem long Lihae blong tekem famli blong hem mo aot long Jerusalem. Lihae i obei long Lod.
Famli blong Lihae i tekem tugeta ol kaekae mo ol tenet. Oli bin lego haos blong olgeta, mo ol gol mo silva blong olgeta, mo oli travel i go long waelples.
Lihae mo woman blong hem, Saraea, tufala i gat fo boe. I gat Leman, Lemyul, Sam, mo Nifae.
Afta we oli bin travel blong tri dei, famli blong Lihae i bin kamp long wan vale kolosap long wan reva.
Lihae i bildim wan olta wetem ol ston, mo i mekem wan ofring i go long God. Hem i talem tangkyu long God from we Hem i bin sevem famli blong hem blong mekem se oli no ded.
Lihae i givim nem blong reva ia i, Leman, mo vale ia i, Lemyul. Lihae i wantem ol boe blong hem oli olsem reva mo vale ia, bae oli gogohed blong ron i go long God mo stap strong blong kipim ol komanmen.
Leman mo Lemyul, tufala i ting se papa blong tufala i krangke from we oli aot long Jerusalem mo lego ol gudgudfala samting blong olgeta. Oli no bin biliv se bae God i prapa spolem gud Jerusalem.
Nifae i wantem blong andastanem ol samting we Lihae i bin luk. Hem i prea blong save sapos papa blong hem i bin mekem gudfala joes blong aot long Jerusalem.
Jisas Kraes i visitim Nifae, mo i talem long hem se ol toktok blong Lihae oli tru. Nifae i biliv mo i no agensem papa blong hem olsem we Leman mo Lemyul i bin agensem.
Nifae i talem long ol brata blong hem wanem we Jisas i bin talem long hem. Sam i bin bilivim Nifae, be Leman mo Lemyul, tufala i no save bilivim hem.
Lod i bin promesem Nifae se bae hem i kasem blesing from fet blong hem. Hem, bae i kam wan lida ova long ol brata blong hem.