Japta 46
Jisas Kraes I Tij mo I Prea wetem Ol Man blong Nifae
Long nekis moning Nifae mo ol nara disaepol oli tijim grup ia we i bin kam tugeta. Ol disaepol oli bin prea se bae oli save kasem Tabu Spirit.
Nifae i go insaed long wota mo i kasem baptaes. Mo i baptaesem ol narafala disaepol.
Afta oli bin kasem baptaes, ol disaepol oli kasem Tabu Spirit. Faea i go raonem olgeta, mo ol enjel oli kam daon long heven mo oli givhan long olgeta.
Taem ol enjel oli stap wetem ol disaepol, Jisas i kam mo stanap long medel blong olgeta.
Kraes i talem long evri Ol Man blong Nifae blong oli nildaon i go long graon. Hem i talem long ol disaepol blong Hem blong prea.
Taem oli stap prea, Jisas i wokbaot i go aot smol long ol pipol mo i nildaon mo i prea long Papa long Heven.
Jisas i talem tangkyu long Papa long Heven from we Hem i givim Tabu Spirit long ol disaepol blong Hem. Mo Hem i askem blong Tabu Spirit oli save givim long eni wan we i biliv long ol toktok blong ol disaepol.
Jisas i blesem ol disaepol blong Hem taem oli stap prea. Hem i smael long olgeta, mo oli kam waet olsem fes blong Hem mo klos blong Hem.
Jisas i prea bakegen from ol disaepol blong Hem. Hem i glad tumas from bigfala fet blong olgeta.
Kraes i talem long ol pipol blong oli stop blong prea be oli mas gohed blong prea long hat blong olgeta. Mo i givim sakramen long olgeta.
I no gat i bin karem i kam bred mo waen, be Sevya i bin provaedem long wan merikel.
Jisas Kraes i talem long Ol Man blong Nifae se gospel blong Hem bae i kambak long wol ia long ol las dei.
Hem i talem long olgeta blong oli stadi long ol skripja, mo Hem i mekem Nifae i raetem long ol rekod wei we ol profesi blong Samuel we i wan Man blong Leman bae oli kamtru.
Mo Jisas i tijim ol pipol long skripja. Hem i tijim long olgeta wanwan ol olgeta ol samting we hem i bin tijim long olgeta.
Jisas i go bak long heven, mo ol disaepol oli tijim ol pipol. Olgeta we oli biliv oli kasem baptaes mo oli kasem Tabu Spirit.
Ol Man blong Nifae oli stat blong obei long ol komanmen.