Japta 33
Ol King-Man agensem Ol Friman
Sam long Ol Man blong Nifae oli wantem se jif jaj, Pahoran, i jenisim sam long ol loa.
Taem Pahoran i no wantem, ol man oli kros, mo oli wantem blong karemaot Pahoran olsem jif jaj. Oli wantem blong gat wan king, be i no ol jaj.
Oli singaotem olgeta ol king-man mo oli hop se wan long olgeta bae i kam king mo gat paoa ova long ol pipol.
Ol Man blong Nifae we oli wantem blong kipim Pahoran olsem jif jaj oli singaotem olgeta, ol friman. Oli wantem blong kam fri blong laef mo wosip olsem we oli wantem.
Ol pipol oli vot bitwin ol friman mo ol king-man. Plante long olgeta oli vot long ol friman.
Long semtaem ia Amalekaea i stap putum tugeta wan bigfala ami blong Ol Man blong Leman blong atakem Ol Man blong Nifae.
Taem ol king-man oli harem se Ol Man blong Leman oli stap kam, oli harem gud tumas mo oli no wantem blong difendem kantri blong ol.
Kapten Moronae i kros tumas long ol king-man from oli no bin faet. Hem i bin wokhad blong kipim Ol Man blong Nifae oli fri.
Hem i askem gavna blong i givim hem paoa blong mekem ol king-man oli faet agensem Ol Man blong Leman o kilim olgeta i ded.
Taem Gavna, we i Pahoran, i givim paoa long Moronae, Moronae i lidim ami blong hem agensem ol king-man.
Oli bin kilimded plante king-man; sam long olgeta oli putum olgeta long kalabus. Olgeta narawan oli bin agri blong help blong difendem kantri blong olgeta agensem Ol Man blong Leman.