Japta 32
Kapten Moronae mo Taetol blong Fridom
Wan rabis man we nem blong hem Amalekaea i wantem blong kam king ova long Ol Man blong Nifae. Plante long Ol Man blong Nifae oli livim Jos blong folem hem
Sapos Amalekaea i kam king, hem bae i traem blong prapa spolem gud Jos blong God mo tekemaot fridom blong ol man ia.
Taem kapten Moronae, lida blong ami blong Ol Man Nifae, i harem abaot plan blong Amalekaea blong kam king, hem i kros.
Moronae i brekem kot blong hem blong mekem flag. Long flag ia hem i raetem wan mesej blong rimaenem ol man blong difendem relijin, fridom, mo pis blong olgeta.
Moronae i putum flag long wan longfala pos mo i singaotem se taetol blong fridom. Mo i werem klos blong faet blong hem, mo hem i nildaon blong prea.
Hem i askem Lod blong protektem olgeta we oli biliv long Jisas Kraes mo prea from fridom long graon, mo i singaotem graon ia se, graon blong fridom.
Moronae i go daon long ol pipol. Taem hem i stap saksakem taetel blong fridom, hem i singaotem olgeta blong kam mo help blong protektem fridom blong olgeta.
Ol pipol oli kam long evri ples long graon ia. Oli promes blong obei long ol komanmen blong God mo faet from fridom.
Taem Amalekaea i luk hamas Man blong Nifae oli bin joenem Moronae, hem i fraet. Hem mo olgeta we oli stap folem hem, oli aot mo joenem Ol Man blong Leman.
Moronae mo ol ami blong hem oli traem blong stopem olgeta, be Amalekaea mo sam man blong hem, oli ronwe.
Moronae i putum taetol blong fridom ia long evri taoa insaed long graon blong Ol Man blong Nifae. Ol Man blong Nifae oli bin kipim fridom mo oli gat pis bakegen.