Japta 50
Ol Man blong Jared Oli Aot long Babel
Jared mo brata blong hem, tufala i ol stret mo gud man we tufala i stap long wan taon we nem blong hem Babel. Oli laef long ples ia plante handred yia i pas bifo olgeta Man blong Nifae.
Plante long ol pipol long Babel oli ol rabis man. Oli bildim wan taoa blong traem blong kasem heven. Lod i kros tumas long olgeta, nao Hem i jenisim lanwis blong olgeta.
Jared i askem brata blong hem blong prea long Lod, mo askem long Lod blong no jenisim lanwis blong ol famli mo fren blong olgeta.
Brata blong Jared i prea, mo Lod i ansarem prea blong hem. Jared, brata blong hem, mo ol famli mo fren blong olgeta oli stil save andastanem wanwan long olgeta.
Lod i talem long brata blong Jared blong tekem tugeta, ol famli mo fren blong hem, mo lego graon ia. Oli tekem wetem olgeta ol animol mo ol sid.
Lod i talem se bae Hem i lidim Ol Man blong Jared oli go long wan promes graon.
Ol Man blong Jared oli bin kasem ol pijin mo fis mo oli tekem wetem olgeta.
Oli tekem plante sugabag.
Ol Man blong Jared oli travel long waelples. Lod i bin toktok long olgeta long wan klaod mo i talem long olgeta wanem rod blong folem.
Lod i talem se ol pipol we oli laef long promes graon bae oli mas wok blong God, o sapos no, bae Hem i prapa spolem gud olgeta.
Taem Ol Man blong Jared oli kasem so, oli stanemap ol tenet blong olgeta. Oli stap kolosap long solwota blong fo yia.