Japta 51
Ol Man blong Jared Oli Go long Promes Graon
Taem Ol Man blong Jared oli stap kamp long solwota, brata blong Jared i foget blong prea. Lod i kam insaed long wan klaod blong talem long hem blong sakem sin.
Brata blong Jared i sakem sin mo i prea. Lod i fogivim brata blong Jared, be i talem long hem blong hem i no mas sin bakegen.
Lod i talem long brata blong Jared blong bildim ol baj blong karem ol pipol blong hem oli go long promes graon.
Lod i bin talem long brata blong Jared hao blong bildim baj ia.
Ol baj ia i no gat ea i save go insaed long olgeta, blong mekem se wota i no save go insaed.
Brata blong Jared i stap askem hemwan se, olsem wanem nao ol pipol bae oli pulum win insaed long ol baj ia. Hem i askem Lod wanem bae hem i save mekem.
Lod i bin talem long hem blong mekem wan hol long top mo wan andanit long wanwan baj ia. Hol ia, oli save open blong letem ea i go insaed mo oli save sarem blong mekem wota i no kam insaed.
Brata blong Jared i talem long Lod se insaed long ol baj ia, ples i tudak. Lod i bin talem long hem blong tingbaot wan wei blong letem laet i go insaed.
Laet blong ol baj ia i no save kam long faea o long ol windo from bae i save brekem ol baj.
Brata blong Jared i go long wan bigfala hil mo i katem16 smol ston aot long wan bigfala ston. Ol ston ia, oli luk olsem ol klia glas. Hem i mekem tu ston blong wanwan long ol baj ia.
Brata blong Jared i karem ol ston ia i go antap long top blong wan bigfala hil. Long ples ia, hem i prea long Lod.
Brata blong Jared i askem Lod blong tajem ol ston ia blong oli save givim laet insaed long ol baj ia.
Lod i tajem wanwan long ol ston ia wetem fingga blong Hem.
From se brata blong Jared i gat bigfala fet, hem i luk fingga blong Lod. Fingga ia olsem fingga blong wan man.
Mo afta, Lod i soemaot Hemwan long brata blong Jared.
Jisas i talem se olgeta we oli biliv long Hem bae oli kasem laef we i no save finis.
Jisas i tijim mo soem plante samting long brata blong Jared Jisas i talem long hem blong raetem ol samting we hem i bin luk mo harem.
Brata blong Jared i tekem ol ston ia wetem hem i kam daon long bigfala hil. Hem i putum wan ston long wanwan en blong wanwan baj ia. Oli givim laet insaed long baj ia.
Ol Man blong Jared oli go insaed long ol baj ia wetem ol kaekae mo ol animol blong olgeta. Lod i mekem wan strong win blong i blo long ol baj ia i go stret long promes graon.
Lod i bin protektem olgeta long nogud solwota. Oli talem tangkyu long Lod mo singsing i go long Hem.
Afta 344 dei long wota, ol baj ia oli lan long so blong promes .
Taem Ol Man blong Jared oli kamaot long ol baj ia, oli nildaon mo oli krae mo wota blong ae blong olgeta i ron from oli glad.
Ol Man blong Jared oli bildim ol hom mo planem ol kaekae long promes graon. Oli tijim ol pikinini blong olgeta blong lisin long Lod mo obei long ol toktok blong Hem.