Japta 7
Taem blong Bildimap Sip
Nifae i no bin save olsem wanem blong bildim wan sip, be Lod i bin talem long hem se bae i soem long hem. Hem i talem long Nifae ples we hem i save faenem ol metol blong i save mekem ol tul we bae hem i nidim.
Leman mo Lemyul oli stap jikim Nifae from hem i wantem blong bildim wan sip. Oli no save bilivim se Lod i bin soem long Nifae olsem wanem blong mekem. Oli no bin wantem blong help.
Nifae i bin talem long Leman mo Lemyul blong sakem sin mo no strong hed tumas. Hem i rimaenem tufala se tufala i bin luk wan enjel. Hem i gohed blong talem long tufala se God i gat paoa blong mekem evri samting.
Leman mo Lemyul tufala i kros tumas long Nifae mo tufala i wantem blong sakem hem i go long solwota.
Taem tufala i kam kolosap long Nifae, Nifae i givim oda long tufala blong tufala i no mas tajem hem from we hem i fulap wetem paoa blong God. Leman mo Lemyul tufala i bin fraet blong plante dei.
Mo Lod i bin talem long Nifae blong tajem Leman mo Lemyul. Taem Nifae i mekem, Lod i bin jokem tufala. Leman mo Lemyul i bin save se paoa blong God i stap wetem Nifae.
Nifae i talem long Leman mo Lemyul blong obei long papa mo mama blong tufala mo obei long God. Nifae i talem se sapos tufala i save mekem olsem, bae tufala i kasem blesing.
Leman mo Lemyul i bin sakem sin mo tufala i helpem Nifae blong bildim sip.
Nifae i bin go antap long hil plante taem blong prea from help. Lod i bin tijim hem olsem wanem blong bildim sip.
Taem we Nifae mo ol brata blong hem oli bin finis blong bildim sip, oli save se hem i wan gudfala sip. Oli talem tangkyu long God from we Hem i bin helpem olgeta.