Japta 49
Momon mo Ol Tijing blong Hem
I kam kasem en kolosap evri man i kam nogud olgeta, tugeta Ol Man blong Nifae mo Ol Man blong Leman.
Wan stret mo gud man nem blong hem i Amaron, i holem ol rekod. Tabu Spirit i talem long hem blong i haedem olgeta rekod blong mekem se oli sef i stap.
Amaron i talem long Momon, wan boe we i gat 10 yia, wea ples ol rekod ia oli haedem long hem. Amaron i save se hem i save trastem Momon.
Taem hem i gat 24 yia, Momon i mas tekem ol plet blong Nifae mo raet long olgeta abaot ol pipol blong hem.
Taem Momon i gat 11 yia, wan faet i girap bitwin Ol Man blong Nifae mo Ol Man blong Leman. Ol Man blong Nifae oli win mo i gat pis bakegen.
Be Ol Man blong Nifae oli nogud tumas mekem se Lod i tekemaot trifala disaepol, we i mekem se ol merikel mo ol hiling i stop. Tabu Spirit i nomo save givim daereksen long ol pipol.
Taem Momon i gat 15 yia, Jisas Kraes i visitim hem. Momon i lanem moa abaot Sevya mo ol gud samting blong Hem.
Momon i wantem blong prij long ol pipol be Jisas i talem long hem blong i no prij from se ol pipol oli kam nogud tumas. Ol hat blong olgeta oli agensem God.
Afta long hemia wan narafala faet i girap. Momon i wan bigfala man mo i wan strong man, mo Ol Man blong Nifae oli jusum hem blong i lidim ami blong olgeta.
Ol Man blong Nifae oli faenem Ol Man blong Leman blong plante yia. Momon i traem blong leftemap tingting blong ol pipol blong hem blong faet from ol famli mo ol hom blong olgeta.
Ol Man blong Nifae oli kam nogud olgeta, mo Lod i no save helpem olgeta.
Momon i talem long Ol Man blong Nifae se bae oli ded sapos oli no sakem sin mo kasem baptaes. Be ol pipol oli no wantem.
Oli flas long paoa blong olgeta, mo oli talem se bae oli kilim evri Man blong Leman. From ol nogud fasin blong Ol Man blong Nifae Momon i nomo wantem blong lidim olgeta.
Ol Man blong Leman oli stat blong winim Ol Man blong Nifae long evri faet. Momon i disaed blong lidim ami blong Ol Man blong Nifae bakegen.
Hem i save se ol nogud Man blong Nifae ia bae oli no save winim faet ia. Oli no bin sakem sin o prea from help we oli nidim.
Momon i tekemaot evri rekod long hil ia we Amaron i bin haedem olgeta mo i raet o go long ol pipol we wan dei bae oli ridim ol rekod ia.
Hem i wantem evriwan, wetem ol Jiu, blong save abaot Jisas Kraes, blong sakem sin mo kasem baptaes, mo blong laef folem gospel mo kasem blesing.
Spirit i talem long Momon blong putum ol smol plet blong Nifae, we i gat insaed ol profesi blong taem we Kraes bae i kam, wetem ol buk we i gat ol toktok blong Momon.
Momon i lidim Ol Man blong Nifae i go long graon blong Kumora, we oli stap rere blong faet wetem Ol Man blong Leman bakegen.
Momon i stap kam olfala. Hem i save se hemia bae i lasfala faet blong hem. Hem i no wantem Ol Man blong Leman blong faenem ol rekod ia mo spolem olgeta.
Mekem se hem i givim ol plet blong Momon long boe blong hem, Moronae, mo i haedem evri narafala plet long hil Kumora.
Ol Man blong Leman oli atakem mo kilim evriwan be 24 long Ol Man blong Nifae nomo oli laef. Momon i bin kasem kil.
Momon i harem nogud se plante long Ol Man blong Nifae oli ded, be hem i save se oli bin ded from oli bin no wantem Jisas.
Momon i bin traem blong tijim Ol Man blong Nifae trutok. Hem i talem long olgeta olsem wanem i impoten blong gat fet long Jisas Kraes.
Hem i traem blong tijim olgeta blong gat hop tru long Atonmen blong Jisas Kraes mo blong gat jareti, we i klin lav blong Kraes.
Mo Momon i bin raetem ol leta i go long boe blong hem, Moronae, we i bin tijim gospel long Ol Man blong Nifae.
Momon i raet abaot ol nogud samting we Ol Man blong Nifae oli stap mekem. Hem i talem long Moronae blong stap fetful long Jisas Kraes.
Ol Man blong Leman oli kilimded Momon mo evri narafala Man blong Nifae be Moronae nomo, we i finis blong raet long ol rekod.