Japta 16
King Limhae mo Ol Pipol blong Hem Oli Ronwe
Ol Man blong Nifae oli mekem Limhae i kam niufala king blong olgeta. Limhae hem i boe blong King Noa, be hem i no rabis tumas olsem papa blong hem. Hem i wan gudfala man.
King Limhae i traem blong mekem pis wetem Ol Man blong Leman, be oli gohed blong holemtaet Ol Man blong Nifae mo stap tritim nogud olgeta.
Long wan dei King Limhae i luk sam strenja aotsaed long taon blong hem. Hem i mekem olgeta i go insaed long kalabus. Ol strenja ia oli Ol Man blong Nifae long Sarahemla.
Lida blong olgeta, nem blong hem Amon. King Limhae i glad tumas blong luk hem. Hem i save se Amon i save helpem ol pipol blong hem blong oli ronwe long Ol Man blong Leman.
King Limhae i singaotem ol pipol blong hem i kam tugeta. Hem i talem long olgeta se hem i from ol rabis mo nogud fasin blong olgeta we i mekem se naoia oli stap long han blong Ol Man blong Leman.
Hem i talem long ol pipol blong hem blong sakem sin, trastem God mo obei long ol komanmen. Mo God bae i helpem olgeta blong oli ronwe.
Ol Man blong Nifae oli bin lanem se Ol Man blong Leman, we oli stap lukaotem taon long naet, oli stap drong.
Long naet ia King Limhae i sendem plante moa waen i go long ol gad olsem wan presen.
King Limhae mo ol pipol blong hem oli wokbaot pasem ol gad ia we oli drong mo oli ronwe.
Amon i soem rod long King Limhae mo ol pipol blong hem tru long waelples i go kasem Sarahemla, we long ples ia nao oli welkamem olgeta.